Олон Улсын Парламентын Холбоо (ОУПХ)-ны 149 дүгээр чуулга уулзалт Швейцарын Холбооны Улсын Женев хотноо 2024 оны аравдугаар сарын 13-17-нд амжилттай болж өндөрлөлөө.

Энэ удаагийн чуулга уулзалтад дэлхийн 130 орчим гишүүн орны 630 гаруй парламентчид оролцлоо. Монгол Улсын Их Хурлыг төлөөлж УИХ-ын дэд дарга Х.Булгантуяа, УИХ-ын гишүүн О.Номинчимэг, Г.Хосбаяр, УИХ-ых Ерөнхий нарийн бичгийн дарга Б.Баасандорж нар оролцсон юм.

2024 оны аравдугаар сарын 17-ны өдөр зохион байгуулагдсан ОУПХ-ны Удирдах зөвлөлийн хуралдаанаар ОУПХ-ны Парламентчдын хүний эрхийн тусгай хорооны гурван гишүүнийг сонгох сонгууль болж, нийт найман гишүүн орны есөн парламентчид өрсөлдсөнөөс УИХ-ын гишүүн О.Номинчимэг ОУПХ-ны Парламентчдын хүний эрхийн тусгай хорооны гишүүнээр сонгогдлоо.

Тус хороо нь 10 гишүүнтэй бөгөөд гурван гишүүний бүрэн эрхийн хугацаа энэ оны аравдугаар сард дуусгавар болж, шинээр сонгогдсон гурван гишүүн /Монгол, Серби, Уганда/ 2024-2029 онд ажиллах юм. УИХ-ын гишүүн О.Номинчимэг тус хороонд ажиллах Монгол Улсын анхны парламентч болж байна.

ОУПХ-ны Парламентчдын хүний эрхийн тусгай хорооны гишүүд нь чиг үүргээ бие даан хэрэгжүүлэх ба ард түмний дуу хоолой болсон парламентчдын эсрэг халдлага, зөрчлийг хянан шалгах, тэдний эрхийг хамгаалах чиг үүрэгтэй олон улсын цорын ганц бүтэц юм. Түүнчлэн, тусгай хороо нь одоогоор 47 гишүүн орны 760 гаруй парламентчдын эрхийн зөрчлийн талаар хянан шалгаж байгаа бөгөөд үүний дотор парламентч асан С.Зоригийн хэрэг багтжээ.