Аймаг, нийслэл, сум дүүргийн иргэдийн төлөөлөгчдийн хурлын ээлжит сонгууль 07:00 цагт албан ёсоор эхэлсэн. Өнөөдөр 12:00 цагийн үед Ерөнхий сайд Л.Оюун-Эрдэнэ саналаа өгсөн билээ.

    Тэрбээр “Сонгууль өгөх насны иргэн бүрийг саналаа өгөхийг уриалж байна. Үндсэн хуулийн дагуу ардчилсан Монгол Улсын иргэний хувьд саналаа өгнө гэдэг хамгийн чухал эрх чөлөө. Тийм учраас иргэд УИХ-ын сонгуульд оролцдог шигээ саналаа өгөх ёстой. Парламентийн сонгууль бол бодлогын сонгууль байдаг. Төрийн эрх барих дээд байгууллагаа байгуулдаг Засгийн газар үндэсний хэмжээний бодлогыг явуулдаг. Энэ удаагийн парламентийн сонгууль 126 төлөөлөлтэй, парламентийн таван намтай, эмэгтэйчүүдийн төлөөлөл 25-с дээш хувьтай, Ази тивдээ онцлог бөгөөд дэвшилттэй парламентийн сонгууль болсон. Харин орон нутгийн сонгууль бол таны амьдралд ойрхон сонголт гэж болно. Тиймээс иргэдийг бодитой сонголт хийгээсэй гэж бодож байна. Засгийн газрын үйл ажиллагааны мөрийн хөтөлбөр биелэхэд ямар төлөөлөл байвал Засгийн газартайгаа ойрхон ажиллаж чадах вэ. Орон нутгийн асуудлаа хэрхэн шийдэж чадах бол гэдэг асуудлыг бодох нь чухал. Засгийн газар ирэх жилүүдэд орон нутгуудад анхаарал хандуулахаар байгаа. Ирэх дөрвөн жилийн амьдралтай холбоотой сонголт таны гарт байгаа шүү” гэв.