Дундговь аймагт Ардчилсан намын гишүүд уулзалт хийх үеэр УИХ-ын гишүүн, Дундговь аймгийн Ардчилсан намын дарга Ц.Мөнхбат  "Чи УИХ-ын гишүүн болчихоод надтай мэтгэлц" хэмээн МАН-ын гишүүн С.Мөнхчулуунтай маргалдаж, байгаа бичлэг цахим орчинд түгсэн. Тэгвэл  энэ талаар УИХ-ын гишүүн Ц.Мөнхбаттай холбогдож тодрууллаа.

      Тэрбээр "Тухайн бичлэгийг тасалж тавьсан байна. Ардчилсан намын нэр бүхий гишүүд Дундговь аймгийн иргэдтэй уулзалт зохион байгуулж байсан. Гэтэл энэ уулзалтыг Дундговь аймгийн МАН-ын дарга С.Мөнхчулуун тэргүүтэй МАН-ын гишүүд ирж үймүүлсэн. Хоёр талд чанга яригч тавьчихаад байхад тайзан дээр гарч ирж яриад гишүүдийг яриулахгүй байсан.  Тэгэхээр нь би "Чи МАН-ын дарга би Ардчилсан намын дарга. Хэрэв ярих зүйл байвал надтай ярь. УИХ-ын гишүүдийн уулзалтыг үймүүлэх шаардлагагүй. УИХ-ын гишүүдтэй мэтгэлцдэггүй юм. Чи Дундговь аймгийн иргэдийг гутааж, талцуулах юм хийж байна. Ингэж болохгүй" гэж хэлсэн. Гэтэл тэр бичлэгийг тасалж тавиад олон нийтэд түгээж байна.  Дундговь аймагт МАН-ын гишүүд  ч ирж уулзалт хийсэн. Бид үүнд нь хүндэтгэлтэй хандаж байхад МАН ингэж болохгүй биз дээ" гэх тайлбар өглөө.