"Хөдөлмөрийн хөлсний доод хэмжээг 792 мянган төгрөг болгоно" хэмээн Хөдөлмөр нийгэм хамгааллын яамны сайд Л.Энх-Амгалан мэдэгдсэн. Харин Шадар сайд С.Амарсайхан энэ асуудлыг үгүйсгэж, "Хөдөлмөрийн хөлсний доод хэмжээг зүгээр шийдчих асуудал биш. Энэ бол амьдралын нөхцөл байдалтай уялдуулан судалгаа, тооцоотой шийдэх зүйл. Одоогоор Гэр бүл, хөдөлмөр, нийгмийн хамгааллын яамд судалгаа тооцоо хийж байгаа" гэх тайлбар өгөөд буй.

       Энэ асуудалд Хөдөлмөр нийгэм хамгааллын сайд Л.Энх-Амгалан "Хөдөлмөрийн хөлсний доод хэмжээг тогтоох ажлыг Засгийн газар шийддэггүй. Үүнийг гурван талт хэлэлцээр буюу Үйлдвэрчний эвлэл, Ажил олгогч эздийн холбоо, Засгийн газрын сайд нарын төлөөлөл орсон Үндэсний хороогоор хоёр жил тутамд хэлэлцэх хуулийн зохицуулалттай. Өнгөрсөн тавдугаар сард гурван талын хэлэлцээр хийгдсэн. Ингээд хөдөлмөрийн хөлсний доод хэмжээг хоёр шатлалтай нэмэх талаар ярилцсан. Хөдөлмөрийн хөлсний доод хэмжээг жилд нэмэгдэж байгаа өрхийн орлого, инфляцын төвшин, эдийн засгийн өсөлт, цалин хөдөлмөрийн бүтээмж, тэтгэвэрийн доод хэмжээг харгалзан үзэж нэмдэг. Хөдөлмөрийн хөлсний доод хэмжээ нэг сая төгрөгт хүрэх ёстой. Манайд цалин хөлсний тогтолцоог хөдөлмөрийн бүтээмжтэй уясан тогтолцоо байдаггүй юм байна. Зарим ажлын байр маш үнэлгээ багатай юм байна. Энэ талаар манайх анхаарч ажиллах шаардлага байна. Шадар сайд Засгийн газар шийдвэр гаргадаг гэсэн дутуу мэдээлэлтэй байсан юм шиг байна. Хөдөлмөрийн хөлсний доод хэмжээг нэмэх нь төсөвт ачаалал өгөхгүй. Үндэсний хороонд Сангийн сайд багтдаг. Цаашид хөдөлмөрийн хөлсний доод хэмжээг нэг саяд хүргэх шаардлага бий" гэлээ.