Эргэлт.мн мэдээллийн сайт орон нутгийн сонгуулийг угтан аймаг, дүүргийн удирдлагууд хийгээд ИТХ-ын төлөөлөгч нар өнгөрсөн дөрвөн жилийн хугацаанд юу хийсэн, тэд амлалтаа хэрхэн биелүүлсэн болохыг эргэн сануулж байгаа билээ. Тэгвэл энэ удаад бид Дорноговь аймгийн Засаг дарга О.Батжаргал, ИТХ-ын дарга Б.Ганзориг нарыг танилцуулж байна.

      Дорноговь аймгийн Засаг дарга Очирпүрэвийн Батжаргал эрх зүйч мэргэжилтэй. Тэрбээр “Адептус консалтинг фирм” ХХК-д хуульч, өмгөөлөгч, “Адептус консалтинг фирм” ХХК-д гүйцэтгэх захирал, “Адептус консалтинг фирм” ХХК-ийн зөвлөхөөр ажиллаж байсан. Мөн 2009 онд Шүүхийн сахилгын хорооны гишүүнээр томилогдон, 2013 оны дөрөвдүгээр сарын 15-ны өдрөөс Шүүхийн захиргааны хуулийг дагаж мөрдөж эхлэх хүртэл хугацаанд бүрэн эрхээ хэрэгжүүлж ажилласан байна. 2016-2020 онд аймгийн ИТХ-ын төлөөлөгч, тэргүүлэгчээр ажиллаж байгаад Засаг дарга болсон байдаг. Түүнийг УИХ-ын гишүүн Б.Дэлгэрсайханы тавиул гэгддэг. Өөрөөр хэлбэл, тэрээр төрийн албанд ажиллах туршлагагүй, шийдвэр гаргах эрх мэдэлгүй Б.Дэлгэрсайханаас шууд хамааралтай гэсэн үг. Улаанбаатарт ажиллаж байсан түүнийг УИХ-ын гишүүн Б.Дэлгэрсайхан Дорноговь аймагт аваачиж, 2016-2020 онд аймгийн ИТХ-ын төлөөлөгч, тэргүүлэгч, 2020 оны арваннэгдүгээр сарын 4-ний өдрөөс Дорноговь аймгийн Засаг даргаар томилуулсан гэдэг. Тэрбээр Б.Дэлгэрсайханы компанийн хуулийн асуудлыг ерөнхийд нь хариуцаж байгаад Засаг дарга болсон гэж нутгийнхан нь ярьдаг.

Засаг дарга О.Батжаргал “Дорноговь-Их хөгжил сан”-гийн тэргүүнээр ажилладаг. Б.Дэлгэрсайхан түүнийн сангийн тэргүүнээр томилчихоод аймагт нь уул уурхайн чиглэлээр үйл ажиллагаа явуулдаг компанийнхнийг дууддаг гэх. “Бадрах энержи” гэхэд 500 сая төгрөг өгснөөс эхлээд олон компани санд хөрөнгө төвлөрүүлсэн талаар яригддаг. Мөн тэрбээр “Юнайтэд партнерс лоу фирм ХХН Нөхөрлөл”-д хувьцаа эзэмшдэг. Өнгөрөгч онд түүний орлого 186 сая, энэ онд 58 сая төгрөг болж буурсан талаар Хөрөнгө орлогын мэдүүлэгтээ дурджээ. Гэр бүлийн гишүүдийн орлого нь 11 саяас 17 сая төгрөг болж нэмэгдсэн. 292 сая төгрөгөөр үнэлэгдэх нэг орон сууц, хоёр авто зогсоолтой. 266 сая төгрөгөөр үнэлэгдэх “Ниссан партол” автомашинтай гэжээ. Тэрбээр 94 адуугаа 252 сая төгрөгөөр үнэлсэн бол 44 сая төгрөгийн үнэт эдлэлтэй. Хадгаламжиндаа 43 сая төгрөгтэй, 98 сая төгрөгийн авлагатай. 96 сая төгрөгийн зээлтэй юм байна. Түүнд хамаарах хоёр тусгай зөвшөөрөлтэй.

133 сая төгрөгийн хадгаламжтай Дорноговь аймгийн ИТХ-ын дарга Б.Ганзориг

      Дорноговь аймгийн ИТХ-ын даргаар Батцэнгэлийн Ганзориг ажилладаг. 151 сая төгрөгийн орлоготой. Хоёр орон сууц, нэг авто зогсоолтой, 40 сая төгрөгөөр үнэлэгдэх малтай, 14 сая төгрөгийн малтай, 16 сая төгрөгийн үнэт эдлэлтэй, 133 сая төгрөгийн хадгаламжтай хэмээн мэдүүлсэн байдаг. Түүнийг 2023 онд Төрийн хэмнэлтийн хууль зөрчиж, татвар төлөгчдийн мөнгийг хувьдаа ашигласан гэх яриа олны дунд гарч байв. Тодруулбал, Дорноговь аймгийн ИТХ-ын Ажлын албаны дарга Ц.Батсугир захирамж гаргаж, аймгийнхаа ИТХ-ын төлөөлөгчдийг эрүүл мэндийн үзлэг, шинжилгээнд хамруулсан гэгддэг. Ингэхдээ татвар төлөгчдийн буюу улсын 11 сая төгрөг зарцуулсан гэх. Хамгийн чухал нь, тэрбээр улсын 8.8 сая төгрөгөөр Тайванд аялсан гэх мэдээлэл цацагдаж байв. Тэрбээр Дорноговь аймгийн Улаанбадрах суманд төрсөн. Мал зүйч мэргэжилтэй.  Улаанбадрах сумын ЗДТГ-т мэргэжилтэн, аймгийн Мэргэжлийн хяналтын газарт Улсын байцаагч, хэлтсийн дарга, Улаанбадрах сумын Засаг дарга, 2016 онд аймгийнхаа ЗДТГ-ын даргаар ажиллаж байгаад ИТХ-ын дарга болсон байдаг.