Парламент 2.0 “Гурван төгөлдөршил” хэлэлцүүлэг эхэллээ. УИХ-ын дарга Д.Амарбаясгалан хэлэлцүүлгийг нээж, шинэ үеийн парламентын зорилго нь үндэсний хэмжээнд хүчин төгөлдөр үйлчилж буй бүх хууль, тогтоомжийг хүний эрхэд суурилсан, хүн төвтэй, нийгмийн хэрэгцээ, шаардлагад нийцүүлэн уян хатан зохицуулалтыг хийх боломжтой байхад анхаарч, хууль, эрх зүйн “Парламент 2.0 “Гурван төгөлдөршил”-ийн бодлогыг хэрэгжүүлэхээр санаачлан ажиллаж байна гэлээ.

УИХ-аас хууль, эрх зүйн шинэчлэлийг хийхээр 54 ажлын хэсэг байгуулж, 18 ажлын хэсгийн дүгнэлтийг маргааш эхлэх намрын чуулганы хугацаанд хэлэлцэнэ. Ингэснээр “Гурван төгөлдөршил” бодлого бодитоор хэрэгжиж эхлэх юм. УИХ-д таван нам, эвслийн төлөөлөл сонгогдож, жендэрийн тэгш байдал нь дэлхийн дундаж үзүүлэлт рүү дөхөж эхэлсэн. Мөн энэ удаагийн 126 гишүүнтэй парламент нийгмийн олон салбарын дуу хоолойг шингээж чадсанаараа онцлог. Тодруулбал, нийт гишүүний 32 нь эмэгтэй, 81 нь анх удаа УИХ-д сонгогдсон салбар бүрийн төлөөлөл байгаа нь иргэдийн, бүлгийн эрх ашгийг хангахад томоохон хувь нэмэр оруулна гэсэн хүлээлт олон нийтэд байгаа юм. Тиймээс “Гурван төгөлдөршил” бодлогын хүрээнд төр, байгууллага төвтэй хуулийг хүн төвтэй болгож, хуулийн цаг хугацааны хоцрогдлыг арилган, орчин үеийн хэрэгцээ, шаардлагад нийцүүлэхээр УИХ ажиллаж эхэллээ.

Энэ удаагийн хэлэлцүүлэгт салбар бүрийн төлөөллийг урьж, оролцуулан санал авч, нээлттэй хэлэлцүүлж байна.