УИХ-ын дарга Д.Амарбаясгалан баруун бүсийн Баян-Өлгий, Ховд аймагт ажиллаж, орон нутгийн иргэдтэй уулзлаа. УИХ-ын даргын зүгээс хууль эрх зүйн шинэчлэлийн хүрээнд “Гурван төгөлдөршил”-ийг хийхээ зарлаж, 54 ажлын хэсгийг байгуулсан. УИХ-ын намрын ээлжит чуулганаар 18 ажлын хэсгийн дүгнэлт хэлэлцэж, дээрх шинэчлэлээ эхлүүлэхээр ажиллаж буйгаа УИХ-ын дарга  Баян-Өлгий, Ховд аймгийн иргэдэд танилцууллаа. “Гурван төгөлдөршил”-ийг тодруулбал, хүн төвтэй хуулийн үзэл баримтлалыг бий болгох, хууль тогтоомжийг тодорхой ойлгомжтой болгох, нийгмийн шаардлагад нийцүүлэн эрх зүйн зохицуулалтыг цаг алдалгүй хийдэг байх юм. Ингэснээр иргэд, олон нийтийн шаардлагад нийцсэн, хүнээ дээдэлдэг, эрхийг нь хангадаг хууль эрх зүйн орчин бүрдэнэ гэж үзэж байна.

Тухайлбал, манай улсад 880 хууль, 2768 журам мөрдөгдөж буйгаас харахад нийгмийн харилцааг хууль биш журам зохицуулж байна. Өөрөөр хэлбэл хуулиар зохицуулбал зохих харилцааг журам зохицуулснаар албан тушаалтан, төрийн байгууллага нийтээр дагаж мөрдөх хэм хэмжээг тогтоож байгаа юм. Энэ нь хуулийг үзэмжээр биелүүлэх, хүний эрхийг зөрчих үндэслэл болж байгаа учраас хуулиас давсан журмын зохицуулалт хийхээр ажиллаж байгааг УИХ-ын дарга онцоллоо. Эдгээрээс харахад иргэд, олон нийт 126 гишүүнтэй шинэ парламентаас хүний эрхийг хангасан эрх зүйн шинэчлэлийг хүлээж байна. УИХ-ын дарга Д.Амарбаясгалангийн зүгээс нийгмийн олон бүлгийн дуу хоолой парламентад орж ирсэн нь салбар бүрийн асуудлыг авч хэлэлцэн, хууль тогтоох үйл ажиллагаа илүү боловсронгуй, мэргэжлийн болж байна гэв.

​