Өнгөрсөн долоо хоногийн Засгийн газрын хуралдаанаар ХХААХҮ-ийн яамыг Дархан-Уул аймаг руу нүүлгэн шилжүүлэх шийдвэр гарсан талаар ЗГХЭГ-ын дарга Н.Учрал мэдээлсэн. Тэрбээр "Хөдөөгийн сэргэлтийн хүрээнд ХХААХҮ-ийн яамыг Төвийн бүс буюу газар тариалангийн бүс болох Дархан-Уул аймаг руу нүүлгэн шилжүүлэх шийдвэр гаргасан" хэмээн мэдэгдсэн. Тэгвэл өнөөдөр ХХААХҮ-ийн сайд Ж.Энхбаяраар ахлуулсан баг Дархан-Уул аймагт ажиллаж, яамын байр хүлээлцэх ажлыг зохион байгуулж байгаа юм байна.

Энэ асуудлыг бид ХХААХҮ-ийн сайд Ж.Энхбаярын зөвлөх Н.Амарсанаатай холбогдож тодрууллаа. Тэрбээр "Өнөөдөр Ж.Энхбаяр сайдаар ахлуулсан баг ХХААХҮ-ийн яамны байрыг хүлээлцэхээр Төрийн өмчийн хорооныхонтой уулзаж байна.  Дархан хотод шинээр байгуулсан "Юнайтед Арена"-гийн оффисын байранд Дархан-Уул аймгийн нутгийн захиргаа удирдлагын байртай хамт ашиглаж, эхний ээлжинд  орохоор ярьсан. Засгийн газрын 100 хоногт багтааж, Дарханы арьс ширний үйлдвэрийг нүүлгэнэ. Цаашид яамны агентлагуудыг үе шаттай нүүлгэх арга хэмжээ авна. Ажилчдын хувьд хөдөө орон нутагт нүүлгэн шилжүүлэхтэй холбоотой цалин, хөлсийг нь 40 хүртэл хувиар нэмнэ. Мөн ипотекийн гурван хувийн хөнгөлөлттэй зээл олгох асуудлыг эхний ээлжинд шийднэ. Эхний ээлжинд хэчнээн ажилчин шилжин суурьших талаар одоохондоо мэдээлэл алга. ХХААХҮЯ-ыг нүүлгэн шилжүүлэхтэй холбоотой ажлын хэсэг томилогдон ажиллаж байна" гэлээ.