Д.ЗАГДЖАВ: “ТАВАН ТОЛГОЙ ТҮЛШ” ХХК-ИЙН 1.1 ТЭРБУМЫН ЗӨРЧИЛ НЬ ДООД ШАТАНДАА САНХҮҮГИЙН САХИЛГА БАТ АЛДСАН БАЙЖ БОЛЗОШГҮЙ ГЭДЭГ АУДИТЫН ДҮГНЭЛТ ГАРСАН

2024-08-30, 985

Монгол Улсын 2023 оны төсвийн гүйцэтгэлийг Төсвийн байнгын хороогоор хэлэлцүүлэх үеэр Шахмал түлшний үйлдвэр алдагдалтай ажиллаж байгаа талаар УИХ-ын гишүүд байр сууриа илэрхийлсэн.

Үүнтэй холбоотойгоор Улсын Ерөнхий аудитор Д.Загджав "Шахмал түлшний үйлдвэр “Эрдэнэс Монгол”-оос “Эрдэнэс Тавантолгой”-д оруулсан хөрөнгө оруулалт. Үүнтэй холбоотой 1.1 их наяд төгрөгийн зөрчил илрүүлсэн. Энэ нь гэмт хэргийн шинжтэй үйлдэл учраас Улсын Ерөнхий прокурорт хэргийг шилжүүлсэн" гэсэн бол энэ талаар Төсвийн байнгын хорооны дарга Ц.Даваасүрэн "Тухайн үед одоогийн Ерөнхийлөгч Ерөнхий сайд байсан шүү дээ. Чи ямар хариуцлагагүй юм яриад байна. Засгийн газрын шийдвэрээр Эрдэнэс Тавантолгой татаас өгөх шийдвэр тухайн үед гарч байсан шүү дээ. Ерөнхийлөгчийгөө буруу юм хийсэн гэх юм" хэмээн хариу тайлбар хийсэн.

Харин үүнд Ерөнхий аудитор Д.Загджав "Тэр бол татаас биш. Гүйцэтгэлийн аудитын тайланд ийм зүйл туссан. Гэмт хэргийн шинжтэй гэж үзээд, хуулийн дагуу Монгол Улсын Ерөнхий прокурорт шилжүүлсэн. Гэмт хэргийн шинж чанартай зөрчил байсан" хэмээн хариулсан нь олны анхаарал татаад байгаа юм.

Энэ асуудлаар бид Ерөнхий аудитор Д.Загджаваас дараах тодруулгыг авлаа.

-Төсвийн байнгын хорооны хуралдааны үеэр "Таван толгой түлш" ХХК-ийн баяжуулах үйлдвэр барих төсөлд 1.1 тэрбум төгрөгийн зөрчил илэрсэн гэсэн. Энэ талаар та тодорхой мэдээлэл өгөөч?

“Эрдэнэс-Тавантолгой” ХК-ийн 2023 оны санхүүгийн тайлангийн аудитыг Үндэсний аудитын газар гүйцэтгэсэн. “Эрдэнэс-Тавантолгой” ХХК-ийн 2023 оны санхүүгийн тайланд хийсэн аудитаар тус компаниас эргэн төлөгдөх нөхцөлтэй олгосон урт хугацаатай санхүүжилтийн эргэн төлөлт хийгдээгүй, хугацааг хойшлуулж ирснээс их хэмжээний буюу 2.8 их наяд төгрөгийн авлагатай гарсан. Авлагын 38.4 хувийг агаарын бохирдлыг бууруулах, сайжруулсан шахмал түлшний чанарыг сайжруулах, “Тавантолгой түлш“ ХХК-ийн компанийн эдийн засгийн үр өгөөжийг дээшлүүлэх, ашигтай ажиллуулах зорилгоор тус компанид 2019-2023 онд эргэн төлөгдөх нөхцөлтэй олгосон 1.1 их наяд төгрөгийн санхүүжилт эзэлж байна.

“Тавантолгой түлш” ХХК 2019-2023 онуудад компанийн урсгал зардал, хөрөнгө оруулалтын зориулалтаар “Эрдэнэс-Тавантолгой” ХК-тай 1,2 тэрбум төгрөгийн 10 жил хүртэлх хугацаанд хуваан төлөх урт хугацаатай санхүүжилтийн 15 гэрээ байгуулж, нэг тэрбум төгрөгийн санхүүжилт авсан боловч дээрх хугацаанд ашигтай ажиллаагүй, санхүүжилтийн эргэн төлөлтийг огт хийгээгүй байна.

Иймд Төрийн аудитын тухай хуульд заасны дагуу Улсын прокурорын ерөнхий газарт 2024 оны дөрөв дүгээр сарын 3-нд 907 дугаартай албан бичгээр “Тавантолгой түлш” ХХК-тай холбоотой гурван асуудлыг шалгуулахаар нотлох баримтын хамт шилжүүлсэн.

-Хаана нь зөрчил гарсан юм бэ. Тухайн үед Ерөнхий сайдаар одоогийн Ерөнхийлөгч ажиллаж байсан гэх асуудал хүртэл яригдсан. Энэ талаар тодруулахгүй?

-“Эрдэнэс-Тавантолгой” ХК-ийн 2023 оны санхүүгийн тайланд хийсэн аудитаар “Тавантолгой түлш” ХХК-ийн “Эрдэнэс-Тавантолгой” ХК-аас авсан санхүүжилтээр хэрэгжүүлэх төсөл, хөтөлбөр, гүйцэтгэгчийг сонгох, гэрээ байгуулах, ажлын гүйцэтгэлд хяналт тавих, хүлээж авах зэрэг үйл явцад үүссэн тул тухайн үеийн Ерөнхий сайд, Сангийн яам хамааралгүй гэж үзэж байна.

Харин “Тавантолгой түлш” ХХК эргэн төлөгдөх нөхцөлтэй урт хугацаат санхүүжилтийн гэрээгээр их хэмжээний авлага үүсгэсэн, авлагыг хэзээ барагдуулах нь тодорхойгүй, олгосон санхүүжилтийн хүрээнд хийсэн ажлын гүйцэтгэл хангалтгүй, санхүүжилтийн зарим хэсгийг зориулалт бусаар зарцуулсан зэргийг харгалзан. Тухайн үеийн Ерөнхий сайд, одоогийн Монгол Улсын Ерөнхийлөгчийн нэр төр, Засгийн газрын бодлого, шийдвэрийг алдаатай, буруу зөрүү гэсэн дүгнэлт манай аудитын тайланд байхгүй. Тухайн ажлыг хэрэгжүүлэхдээ доод шатандаа алдаатай, санхүүгийн сахилга бат алдсан байж болзошгүй гэдгийг аудитаар илрүүлж, хууль хяналтын байгууллагаар шалгуулах шаардлагатай гэж үзэж холбогдох байгууллагад нь шилжүүлсэн асуудал юм.

Д.ЗАГДЖАВ: “ТАВАН ТОЛГОЙ ТҮЛШ” ХХК-ИЙН 1.1 ТЭРБУМЫН ЗӨРЧИЛ НЬ ДООД ШАТАНДАА САНХҮҮГИЙН САХИЛГА БАТ АЛДСАН БАЙЖ БОЛЗОШГҮЙ ГЭДЭГ АУДИТЫН ДҮГНЭЛТ ГАРСАН

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0

Шинэ мэдээ

Нийтлэлчид