Ерөнхийлөгч Ухнаагийн Хүрэлсүхийн урилгаар Швейцарын Холбооны Улсын Ерөнхийлөгч Виола Амхерд 2024 оны наймдугаар 02-04-ний өдрүүдэд анх удаа төрийн айлчлал хийж байна.Энэ үеэр Швейцарын Холбооны Улсын Ерөнхийлөгч Виола Амхерд, Монгол Улсын Ерөнхийлөгч Ухнаагийн Хүрэлсүх нар санамж бичигт гарын үсэг зурлаа.

          Монгол Улсын Ерөнхийлөгч У.Хүрэлсүх “Эрхэм хүндэт Ерөнхийлөгч. Энд цугласан хэвлэлийн төлөөлөгч нарт энэ өдрийн мэнд хүргэе. Монгол Улс, Швейцарын Холбооны Улс хооронд дипломат харилцаа тогтоосны түүхт 60 жилийн ойг тохиолдуулан Монгол Улсын Ерөнхийлөгчийн урилгаар Швейцарын Холбооны Улсын Ерөнхийлөгч Виола Амхерд төрийн айлчлал хийж байгаад чин сэтгэлээсээ баяртай байна. Эрхэм Ерөнхийлөгч таны энэ айлчлал Швейцарын Холбооны Улсын төрийн тэргүүн манай улсад айлчилж буй анхны түүхэн айлчлал болж байна. Швейцар, Монголын ард түмний найрсаг харилцаа, хамтын ажиллагааны түүхийн нэгэн шинэ хуудсыг бид хамтдаа нээж байна. Газарзүйн байршлын хувьд алс хол Швейцарын Холбооны Улсыг бид манай улсын гурав дахь хөрш, европ дахь итгэлт түншээ хэмээн үздэг. Энэхүү төрийн айлчлалын үеэр бид Монгол, Швейцарын хамтын ажиллагааны өнгөрсөн 60 жилийн ололт амжилтыг бататгах цаашид улам өргөжүүлэн хөгжүүлэх, харилцан ашигтай төсөл хөтөлбөр хэрэгжүүлэх талаар санал бодлоо солилцлоо” гэлээ.