Үндэсний баяр наадмын хүчит бөхийн барилдаанд шөвгөрсөн 32 бөх болон 16 хараач, нийт 48 тамирчнаас допингийн шинжилгээ авч, хариу нь гарсан талаар бид мэдээлсэн. Тодруулбал, допингийн шинжилгээ өгсөн 48 тамирчны дөрвөн хүний шинжилгээний хариу эргэлзээтэй гарч, нэг хүний шинжилгээний хариу гараагүй гэх мэдээлэл бий. 

Тэгвэл өнөөдөр шинжилгээ нь эргэлзээтэй гарсан гурван бөхийг Үндэсний баяр наадмыг зохион байгуулах комисс хүлээн авч уулзсан гэх мэдээлэл байна.

Энэ талаар бид ХЗДХЯ-ны Төрийн нарийн бичгийн дарга, Үндэсний бөхийн салбар хорооны дарга Н.Мягмартай холбогдож тодруулахад "Үндэсний баяр наадмын допингийн шинжилгээтэй холбоотой асуудлыг Үр дүнгийн удирдлага хэрэгжүүлэх олон улсын стандартын дагуу баг томилон ажиллуулж байна. Үр дүнгийн баг гурван бөхийг дуудаж уулзсан байх. Салбар хороо энд оролцохгүй байгаа. Өөрөөр хэлбэл, допингийн шинжилгээний хариуг танилцуулах эсэхийг Үр дүнгийн баг шийднэ. Шинжилгээний хариуг бөхчүүд танилцуулж, бөхчүүд хүлээн зөвшөөрсний дараа зарлах байх. Харин Үр дүнгийн удирдлагыг хэрэгжүүлсэн баг салбар хороонд мэдээлэл танилцуулсны дараа хариуцлага хүлээлгэх эсэх асуудлыг шийднэ. Тэгэхээр энэ хариу ирээгүй учраас шийдвэр гараагүй гэсэн үг. 44 тамирчны шинжилгээний хариу зүгээр гарсан. Тухайн тамирчдын шинжилгээ зүгээр гарсан учраас танилцуулах шаардлага байхгүй" гэлээ.