УИХ-ын сонгуулийн үр дүнгээр бүрдсэн хамтарсан Засгийн газар анхны хуралдаанаа хийлээ. Хуралдаанаар хэлэлцсэн асуудлын талаар ЗГХЭГ-ын дарга Н.Учрал мэдээлэл хийлээ.

Тэрбээр "Засгийн газрын үйл ажиллагааны хөтөлбөрийг УИХ-д өргөн мэдүүлэх учиртай. Үйл ажиллагааны хөтөлбөрийг боловсруулах ажил эхэлсэн.

Хамтарсан Засгийн газрыг бүрдүүлж байгаа гурван намын төлөөллөөс ажлын хэсэг томилогдон гарч, гэрээ байгуулах юм. Ингэхдээ Германы Засгийн газрын гэрээг туршлага болгон судалж байна. Мөн Шинэ Зеланд, Голланд Улсын жишгийг сайн жишээ болгон ашиглах юм. Хамтарсан Засгийн газрын хувьд хамтдаа хэрэгжүүлэх төсөл хөтөлбөрүүдээ эрэмбэлдэг. Бид салбар дундын уялдааг хангах нь чухал гэж харж байгаа. Гурван намын мөрийн хөтөлбөрүүдийн 80 хувь нь уялдах боломжтой гэж харсан. Засгийн газрын үйл ажиллагааны хөтөлбөрийг хангахын тулд улсын төсөвт тодотгол хийхээр болсон. Нэг сарын дотор төслийг бид УИХ-д өргөн мэдүүлэхээр болсон. 

Ерөнхий сайдын зүгээс төрийн албаны хуулийг чанд мөрдөж, тогтвортой ажиллах чиглэлийг хангахыг үүрэг болгосон. Хэдийгээр зарим яамдын нэр солигдсон ч үүрэг чиглэл өөрчлөгдөөгүй. Мөн Засгийн газрын 100 хоногийн төлөвлөгөөг боловсруулахаар ажиллаж байна. Цаашлаад Засгийн газрын хуралдааны дэг журам, баримтлах зарчмыг боловсруулж байна. Улс төрийн гурван нам төрийн бүтээмжийг нэмэгдүүлэх, төр иргэндээ үйлчлэх, цаасгүй, шилэн нээлттэй төрийг би болгохоор ажиллана. Түүнчлэн хот төлөвлөлт, бүсчилсэн хөгжил, хүлээгдэж байгаа ажлуудаа хурдтай хийхэд анхаарч ажиллахыг үүрэг болгосон. Ирэх долоо хоногийн Засгийн газрын хуралдаанаар яамдын бүтэц зохион байгуулалтыг оруулж ирүүлэхээр болсон. Өнөөдрийн Засгийн газрын хуралдаанаар төрийн өмчит компаниудыг нэгдсэн вэб хуудастай болгож, төр иргэнтэй нэг л сувгаар харилцах боломжтой нөхцлийг бий болгохыг ЗГХЭГ-ын дарга болон ИЦХХХ-ын сайдад үүрэг болгосон" гэлээ.