Хамтарсан Засгийн газарт ажиллах АН, МАН, ХҮН намын удирдлагууд “санамж бичиг”-т гарын үсэг зурлаа. Энэ үеэр Ерөнхий сайд, МАН-ын дарга Л.Оюун-Эрдэнэ “Шинэ 30 жилийг тогтолцооны хувьд эхлүүлэх шаардлагатай байсан.  “Алсын хараа-2050” урт хугацааны бодлогыг хамтарсан Засгийн газар байгуулснаар шинэчлэх бүрэн боломжтой. Хоёрдугаарт, парламент зөвхөн дарга нарын байгууллага биш. Парламент бол ард түмний төлөөлөл. Тиймээс АН, ХҮН намтай хамтарч байгаа. 76 гишүүнийг 126 болгож, Эвслийн Засгийн газраар үйл ажиллагаагаа явуулах боломжтой болж байгаа. Энэ нь тогтолцооны реформ руу хамт орж байна гэсэн үг. Улс төрийн хувьд тогтвортой, таван намын тогтолцоотойгоо илэрхийлж байгаа. Нөгөөтэйгүүр, эрх мэдэлтэй холбоотой асуудал бүхэнд намын төлөөллүүд биенийгээ хянаж, эргэлцээтэй асуудалд хяналтын үүднээс ажиллах бололцоо бүрдэж байгаа. Энэхүү санамж бичиг нь илүү хурдан байх агуулгатай. Бид 30 хоногийн дотор мөрийн хөтөлбөр боловсруулж, 250 гаруй хуудастай гэрээ байгуулна. Үүнд бүх намынхан оролцох боломжтой. Зарим судлаач үүнд тусална гэсэн үг. Үндсэн хуулийн үзэл санааг эхлүүлэхийн тулд дэд бүтцийн асуудал, эрчим хүчний асуудлаас ажлаа эхэлнэ. Монгол Улсад хөгжлийн түүхэнд шинэ 30 жил эхэлж байна” гэв.