Гадаа +29 хэмийн халуун байгаа ч сайдын суудалд санаархагчдын дотор халуу шатам байна.

“Намайг дэмжээрэй, намайг дэмжээрэй” гэх нялуун үг Төрийн ордон, Тусгаар тогтнолын ордонд “хангинаж” байна гэнэ дээ. Ерөнхий сайдын өрөө сайдын суудалд санаархагчдын хөлд дарагдаж байгаа бололтой. Хот, хөдөөгөөс ирсэн 126 гишүүн нь шинэхэн оюутнууд шиг “төөрөлдөж” ангийн дарга, салааны дарга, фракцын ахлах болохоор санаархаад тамлаж байгаа сурагтай. Ер нь сонгуулийн дараа ийм л зүйл болдог, зарчмаараа л явж байх шиг байна. Сонгуульд өрсөлдөх, ялах, УИХ-ын гишүүн болох нэг хэцүү, дараа нь “ахлах” албан тушаалд томилогдох бүүр ч хэцүү. Эрх баригч нам энэ зовлонг гурвантаа амсаж байна.

            Сонгуульд унасан, өнжсөн сул гишүүд намын даргаасаа ам асууж, “Амласандаа хүрнэ биз дээ. Би нөгөө суудалдаа баараггүй биз дээ” гээд байлгаж суулгахгүй байгаа бололтой. Хажуунаас нь, дөнгөж сонгогдсон шинэ гишүүд нь “Давхар дээл” өмсөхөөр улайрч, Төрийн ордонд бужигнуулж байх шиг байна. Ерөнхий сайд албан тушаалын хуваарилалт хийж, Засгийн газраа бүрдүүлэхэд хүндхэн сорилттой нүүр тулж байгаа бололтой. Ах, дүүгүй, танил талгүй л түүнийг тарчлааж байгаа нь баараггүй. Ерөнхий сайдын өмнө хүн чанар, улс эх орны эрх ашгиг гэх “айхтар” сорилт байна. Хэдийгээр улс орны эрх ашгийг эхэнд эрэмбэлж байгаа ч эгзэгтэй цаг үе ирж байна.

            Сонгуульд ялалт байгуулж олонх болсон МАН-ын хувьд АН, ХҮН намтай хамтарсан Засгийн газар байгуулах тохироотой байгаа гэх мэдээлэл бий. Ямартай ч Ерөнхий сайд Л.Оюун-Эрдэнэ сайд Ч.Учрал, С.Бямбацогт, Л.Энх-Амгалан нараа улирааж, холын замд хамтдаа дөрөө харшуулахаар шийдсэн байна. Харин Сангийн сайдад Т.Доржханд, Хууль зүй, дотоод хэргийн сайдад Л.Мөнхбаатар нар зүтгэж байгаа аж. Харин хамгийн өрсөлдөөнтэй, тохироотой, марафоныг тэргүүлж байгаа гишүүн нь С.Одонтуяа гэнэ. Тэрбээр шинэ Засгийн газарт Эрүүл мэндийн сайдаар ажиллахаар санаархаж, “уралдаж” эхэлжээ. Эрүүл мэндийн салбараас хоёр ч гишүүн сонгогдсон нь Т.Мөнхсайхан, Б.Чинбүрэн нар. Нэг нь сайдаар ажиллаж, нөгөөх нь гишүүнээр улирч байгаа. Салбарын хүнийг нь сайдаар тавих яриа яригдсан ч С.Одонтуяа гишүүн шийдсэн бололтой.

Түүнийг өнгөрсөн цар тахлын үед Ерөнхий сайд Л.Оюун-Эрдэнэ "Ковидын үеийн вакциныг гацаасан" хэмээн мэдэгдэж байлаа. Ингэж мэдэгдсэн хүнээ Засгийн газартаа урьж, Эрүүл мэндийн сайдаар ажиллуулахаар яригдаж байгаа нь тун ч хачирхалтай байна.

Өнгөрсөн хугацаанд авлига, албан тушаал, ашиг сонирхлын зөрчлийн хэргээр АТГ-т шалгагдаж байсан гишүүн олон. Тэднээс зарим нь сахилгын шийтгэлтэй мултарсан бол зарим нь прокурорт, тэндээсээ шүүхэд шилжилж ял сонссон, харин заримынх нь хэрэг хэрхэн шийдэгдсэн, эсхүл хаана, хэн дээр гацсан нь тодорхойгүй мартагдсан байгаа. Үүний нэг нь Эрүүл мэндийн сайдын суудалд санаархаж байгаа гишүүн С.Одонтуяа.

Тодруулбал, УИХ-ын гишүүн С.Одонтуяа мх хэмжээний брэндийн бараа хуурамч гаалийн бүрдүүлэлтээр оруулж ирж, тойрогтоо тараасан байж болзошгүй хэргээр АТГ-т шалгагдаж байсан. Тодруулбал, УИХ-ын 2020 оны ээлжит сонгуулийн өмнөхөн Дорноговь аймагт байрлах “Арвижих хоршоо” гэх аж ахуйн нэгжийн нэрээр 10 гаруй чингэлэг буюу 15 тонн бэлэн хувцас хилээр нэвтрүүлсэн байдаг. Ингэхдээ “Комиссын бараа” хэмээн гаалийн бүрдүүлэлт хийсэн байгаа юм. Гэтэл уг хувцас нь “комиссын хувцас” биш, нэр бүхий брэндийн хувцас байсан нь илэрч, их хэмжээний ам.долларын өртөг бүхий брэндийн хувцсыг хуучин хувцас хэмээн татвараас зайлуулсан. Энэ луйврыг тэрбээр Дорноговь аймгийн гаалийн байцаагч Э-тэй үгсэн хуйвалдах замаар үйлдсэн болох нь мөрдөн байцаалтын явцад тогтоосон гэдэг. Ноцтой нь, татвараас зугтаалгаж, хуурамч гаалийн бүрдүүлэлтээр оруулж ирсэн брэндийн хувцаснуудаа 2020 оны сонгуулиар тойргийнхоо сонгогдчдод тараасан баримтууд ч илэрсэн гэгдэж байлаа.