2024 оны УИХ-ын ээлжит сонгууль амжилттай болж өнгөрлөө. Анхны 126 УИХ-ын гишүүнийг сонгуулийн холимог тогтолцоогоор сонгож, сонгогчид хүчний тэнцвэрийг хангаж чадлаа. Шинээр бүрдэх парламентад хөгжлийн бэрхшээлтэй иргэн, багш, инженер гээд нийгмийн бүлгийн төлөөллүүд багтсан. Мөн эмэгтэйчүүдийн төлөөлөл 38.8%-тай нэр дэвшиж, 25.4 хувиар сонгогдсон нь Монгол Улсын парламентын түүхэнд шинэ амжилт байлаа. Ийнхүү өнгө алагласан, таван намын төлөөлөл багтсан шинэхэн парламент Засгийн газраа байгуулж, Спикерээ сонгох ажилд шуурхайлан оржээ.

   Шинэ парламентын даргад Ж.Энхбаяр, С.Бямбацогт, Д.Амарбаясгалан нар яригдаад эхэлжээ. Хэн байхаас үл хамааран шинэ спикер хуучин спикер шигээ хүний эрхийн мэдрэмжтэй, олон талын дуу хоолой, оролцоог эрхэмлэдэг хүн сонгогдоосой. Үгүй бол олон жилийн тэмцэл шинэ парламентын танхимд замхран одохвий гэдэг айдас байгааг нуух юун.

   Төрт улс үүссэн цагаас эхлэн эрэгтэйчүүдийн соёл давамгайлсан улс төрд эмэгтэйчүүд орох үүд хаалгыг нээсэн эрэгтэй манлайлагч нарын гавьяа их. Манай улсын тухайд сонгуулийн холимог тогтолцоог ҮХНӨ-өөр хийх, 20 жилийн туршид унаж босож ирсэн квотыг 30 хувь, 2028 оноос 40 хувьд хүргэх, намын жагсаалтыг хүйсээр сөөлжлөх ажлыг манлайлж хийсэн эрэгтэйчүүдийн төлөөлөл бол УИХ-ын дарга Г.Занданшатар, ЗГХЭГ-ын дарга Д.Амарбаясгалан, УИХ-ын гишүүн Ж.Сүхбаатар, О.Цогтгэрэл нар юм. Энэ удаагийн парламентад ЗГХЭГ-ын дарга Д.Амарбаясгалан, УИХ-ын гишүүн О.Цогтгэрэл нар сонгогдлоо. Д.Амарбаясгалан бол жагсаалтад 50:50 хувиар эрэгтэй, эмэгтэйчүүдийг оруулах санаачилгыг гаргасан хүн. Түүний энэ санаачилга өнөөдрийн парламентыг төлөөллийг хангасан чадавхитай парламент болгоход хүч нэмсэн. Хүний эрхийн мэдрэмж, хүйсийн эрхийн мэдрэмж улстөрчдөд бас тийм амар суудаггүй. Спикер ялангуяа ийм байх нь чухал. Олонхийн санал авсан МАН Бага хурлаараа шинэ спикерээ сонгох биз.

   Шинэ парламентдаа ч тэд энэ үйл хэргээ үргэлжлүүлж, манлайлж ажиллана гэдэгт олон түмэн итгэж байгаа. Тэдэнд хүч нэмж, хүний эрхийн мэдрэмжтэй дуугарах олон олон эрчүүд ч энэ парламентад багтсан гэдэгт ч эргэлзэхгүй байна.