Ардчилсан намаас сонгуулийн үйл явц, цаг үеийн асуудлаар мэдээлэл хийлээ.

     Тус намын Хэрэг эрхлэх газрын дарга Н.Лхагвадорж "Хэсгийн хороодын дарга нар сонгогчдыг саналаа өгөх явцад нөлөөлөх үйл ажиллагаа их болж байна. Сонгогч саналаа өгч байх үед ширээн дээр нь очиж зогсоод бөглөх зааварчилгаа өгсөн байна. Энэ талаар 18:00 цагаас хэвлэлийн бага хурал хийж ээлжит мэдээллийг хүргэнэ. Бид эдгээр зөрчлийн дагуу аль хэсгийн хороонд, хэн гэдэг ажиглагч хийснийг ил болгоно. Иймээс хэсгийн хороодод ажиллаж байгаа ажиглагч нарыг хуулиа дагахыг шаардаж байна" гэв.

       Харин энэ үеэр АН-ын хуульч Б.Батхуяг "Өнгөрсөн шөнө хоёр ноцтой үйл явдал боллоо. Ардчилсан намаас нэр дэвшигч Л.Мөнхбаясгалангийн байр, машинд үзлэг, нэгжлэг хууль бусаар хийсэн үйлдэл гарсан. Мөн өчигдөр Сонгинохайрхан дүүрэгт нэр дэвшигч Б.Даваажавын гэр, оффист хууль бусаар нэгжлэг хийсэн байна. Сонгууль эхэлсэнтэй холбоотойгоор ард түмэндээ мэдээллэхгүй байхын аргагүй төрийн сонгуульд нөлөөлсөн үйдлүүд илэрч байна. Тухайлбал, Чингэлтэй дүүрэгт МАН-аас нэр дэвшигч Г.Дашням өөрийн эзэмшлийн скүүтерийг олноор саналын байранд байрлуулах үйлдлүүд үзүүлж байгаа нь сонгогчдын саналыг татах хууль бус үйлдэл болж байна. Өчигдөр зөөврийн саналын хайрцгаар санал авсан байгаа. Гэтэл Өвөрхангай аймгийн Арвайхээр сумын Х баг дээр үнэгүй эд зүйл өгөх нэрийдлээр сонгогчийн иргэний үнэмлэх авч явсан үйлдэл гарсан. Ардчилсан намын нийт ажиглагч нарыг сонгуулийн үеэр дуу, дүрсний бичлэг хийлгэхгүй байх шаардлага тавьж байна. Энэ бол хуулиар зөвшөөрсөн үйл ажиллагаа. Мөн Хөвсгөл аймагт "МАН-ын хоёр нэр дэвшигчийг заавал дугуйлна" гэсэн зөвлөмжийг цаасаар хэвлээд байршуулсан асуудлыг тус аймгийн цагдаагийн хэсэг шалгаж байна. Түүнээс гадна МАН-аас тусдаа аппликейшнд сонгогчдыг бүртгэж байгаа нь хуульд нийцэж байгаа эсэхийг бид шалгуулж байна. Мөн Улаанбаатар хотын нийт саналын байруудад хэсгийн ахлагч нар олноор зогсож, "МАН-ыг заавал дэмжинэ шүү" гэсэн ухуулга, сурталчилгаа хийсэн байгаа нь тогтоогдсон. Мөнгө тараах асуудал гаарч байгааг бид дэлгэрэнгүй танилцуулна. Төрийн албаны автомашин сурталчилгаандаа хэрэглэсэн асуудал ч гарлаа. Тухайлбал, Завхан аймгийн Тосонцэнгэл суманд хүн эмнэлгийн машинтай чанга яригчаар МАН-ын сурталчилгаа хийж байсан үйлдэл тогтоогдож, цагдаагийн байгууллагаас 20 сая төгрөгөөр торгуулсан " гэв.