Ардчилсан намаас сонгуулийн үйл явц, цаг үеийн асуудлаар мэдээлэл хийлээ.

        Энэ үеэр тус намын Хэрэг эрхлэх газрын дарга Н.Лхагвадорж "Сонгуулийн ерөнхий хорооноос өгсөн мэдээллээр энэ жилийн сонгуулийн ирц 13:00 цагийн байдлаар өмнөх сонгуулиас харьцангуй өндөр байгааг мэдээлж байна. Гэхдээ сонгуулийн үеэр олон зөрчил гарч байгаа мэдээлэл бидэнд ирсэн. Тухайлбал, Орхон аймаг дахь Зэвсэгт хүчний 186, 111 дүгээр ангийн цэргүүдэд МАН-аас нэр дэвшиж буй найман хүний нэрийг дугуйлах үүрэг өгсөн байна. Цэргүүд нэр бичсэн хуудсаа санал өгч байх үедээ гаргаж ирж саналын хуудсаа бөглөж байгаад ажиглагч нарт баригдсан байна. Энэ асуудал тухайн тойргийн холбогдох цагдаагийн байгууллагад манай хуулийн албанаас гомдол хэргээр хүргэгджээ. Иймээс Монгол Улсын өнцөг булан бүрд байгаа Зэвсэгт хүчний байгууллагын албан хаагч, удирдлагууд та бүхнийг хэн нэгэн эрх баригчдын үүрэг даалгавраар төрийн сонгуулийг худалдах, өөрсдийн албан тушаалаа ашиглан сонгуульд нөлөөлөхгүй байхыг шаардаж байна" гэв.