Монгол Улсын Ерөнхий сайд Л.Оюун-Эрдэнэ УИХ-ын ээлжит сонгуульд саналаа өглөө.

Тэрбээр "Монголын ард түмэн 1992 оноос эхлэн нутаг дэвсгэрийн нэгжид тулгуурласан төлөөлөлтэй байсан. Харин өнөөдөр бид хамтдаа үүнийг жааз болгон үлдээж байна. УИХ-ын энэ удаагийн сонгуулиар бид салбар бүрийн дуу хоолой бүхий 126 төлөөлөлтэй анхны парламентыг бүрдүүлнэ. Энэ агуулгаараа сонгуулийн ирц өмнөх жилүүдээс өндөр байна гэж ажиглаж байна. Хилийн чанадад байгаа монголчуудын төлөөлөл жагсаалтаар нэр дэвшиж байгаа. Мөн хөгжлийн бэрхшээлтэй иргэд тойргоос сонгогдож чадалгүй 34 жил явсан бол өнөөдөр анх удаа парламентад орж ирэх боломж бүрдлээ. Энэ утгаараа нийгэм маш идэвхжиж байна гэж харлаа. Иргэд, залуус бүгд саналаа өгөөсэй гэж уриалж байна. Ардчилал гэдэг иргэд өөрсдийн төлөөллөө сонгосноор ардчиллын индекс өсдөг. Миний бие өнгөрсөн хугацаанд 30 гаруй уулзалт хийсэн. Иргэд өнгөрсөн 30 жилийг дүгнэн ярьж байна. С.Зориг "Улс орны эрх ашиг нэгдүгээр байх ёстой. Дараа нь намын эрх ашиг, хувийн эрх ашиг байна" гэсэн байдаг. Парламент илүү ард түмэнжээсэй гэж Үндсэн хуульд нэмэлт, өөрчлөлт оруулсан. Өнөөдөр Монголын ард түмний шинэ 30 жил эхэлж байна" гэв.