СЕХ-ны дарга П.Дэлгэрнаран цаг үеийн асуудлаар мэдээлэл өглөө. Тэрбээр “2024 оны ээлжит сонгуулийн санал хураалтын ажил амжилттай үргэлжилж байна. Улсын хэмжээнд 2198 хэсгийн хороонд санал авч байгаа.  11:40 цагийн байдлаар сонгуулийн ирц 20 гаруй хувьтай байна. Энэ жилийн сонгуульд иргэд идэвхтэй оролцож байна. Өмнөх жилүүдийн сонгуулийн өдий үеийн саналтай харьцуулахад ирц хангалттай байна. Энэ байдлаараа иргэд саналаа өгвөл сонгууль амжилттай үргэлжлэхээр байна. 17:00 цагаас  ирцийн дараагийн мэдээлэл өгнө.

     Харин 22:00 цагаас хэсгийн хороод хаагдаж, саналын дүнг автомат машинаар болон гараар тоолж, нэгдсэн дүнг танилцуулна. Одоогоор улсын хэмжээнд цаг агаар хэвийн байгаа учир улсын хэмжээнд санал хураалтад асуудал гараагүй. Санал авч байгаа байр бүрд 10 гаруй бүхээг бий. Одоогийн байдлаар санал хураалттай холбоотой гомдол, мэдээлэл ирээгүй байна. Цагдаагийн байгууллагад мөн гомдол мэдээлэл ирээгүй. Гомдолтой холбоотой мэдээллийг цагдаагийн байгууллагаас өгөхөөр ярилцсан” гэв.