Монгол Улсын Ерөнхийлөгч У.Хүрэлсүх Тэргүүн хатагтай Л.Болорцэцэгийн хамт УИХ-ын ес дэх удаагийн сонгуульд саналаа өглөө.  

    Тэрбээр “Ард түмэндээ энэ өдрийн мэндийг өргөн дэвшүүлье. 1992 оноос хойш УИХ-ын ес дэх удаагийн сонгууль болж байна. Одоогоос 100 жилийн өмнө үндэсний ардчилсан үзэл санааг дэлгэрүүлж, сонгох, сонгогдох эрх олгож байсан түүхтэй.  Үндсэн хуулийн ой давхар тохиож байгаа нь сайхан байна. Энэ жилийн сонгууль хэд хэдэн зүйлээрээ онцлог. Хуучин бид 76 гишүүн сонгодог байсан бол энэ жил 126 гишүүн сонгож байгаа. Бүсчилсэн хөгжлийн үзэл баримлалтын дагуу бүсээрээ нэр дэвших боломжтой болсон. Энэ нь Монгол Улсын цаашдын хөгжил, дэвшилд ихээхэн ач холбогдолтой. Мөн энэ удаагийн сонгуульд олон нам,  эвсэл, бие даагч нар оролцож, 1341 иргэн нэр дэвшсэн байна. Тэдний хамгийн залуу нь 25 настай, хамгийн ахмад нь 79 настай нэр дэвшигч байна. Нэр дэвшигчдийн 40 хувь нь эмэгтэй хүн байгаа нь сайхан үзүүлэлт. Төр улсаа засах үйл хэрэгт Монголын ард түмэн бүгд оролцож, саналаа өгөх ёстой. Монгол Улсын иргэн бүхэн сонгох, сонгогдох эрхээ хэрэгжүүлж байна гэсэн үг. Төрийн эрх мэдэл ард түмний гарт байдаг. Ард түмэн санал өгөхөө эрхээ хэрэгжүүлж, идэвхтэй оролцохыг Төрийн тэргүүний хувьд ард түмэндээ уриалж байна. Төр төвшин, шашин тунгалаг, дэлхий амгалан байх болтугай” гэв.