Сэлэнгэ аймгийн Шаамар сумын Ерөө голд 19 настай залуу живж амиа алдсан харамсалтай хэрэг гарсан. Тодруулбал, тэрээр тус голд живж байсан хоёр хүүхдийн амийг аварч өөрөө амь эрсдсэн байдаг. Тухайн үед чухам юу болсон талаар Дулаанхаан тосгоны Захирагчийн албаны дарга У.Цогтбаяраас тодрууллаа. Тэрбээр “Өнгөрсөн амралтын өдрүүдэд Ерөө голын ойролцоо хүн ихтэй байсан. Тухайн үед 17-19 насны есөн залуу Ерөө голын ойролцоо амарч байсан юм билээ. Гэтэл тэдний ойролцоо байрласан хүмүүсийн хоёр хүүхэд голд хөл алдан живж байсныг аврахаар 19 настай залуу хойноос нь орсон юм билээ. Эхний хүүхдийг аварч, уснаас гараад хоёр дахь хүүхдийг бусадтайгаа элбэж гаргаж байхдаа хөл алдан живж амиа алдсан байдаг" гэв.