Өвөрхангай аймгийн Сант сумын Ардчилсан намын дарга Б.Батмөнхийг Г.Сайханбаярын ухуулагч П.О зодож, амийг нь хөнөөсөн хэрэг гарсан. Үүнтэй холбоотойгоор МАН-ын Ерөнхий нарийн бичгийн дарга Д.Амарбаясгалан мэдэгдэл хийсэн. Тэрбээр “Өвөрхангай аймгийн Сант суманд энэ сарын 15-16-нд шилжих шөнө хүний амь хохирсон харамсалтай хэрэг гарсан. Хохирогчийн ар гэр, төрөл төрөгсдөд эмгэнэл илэрхийлж байна. Энэ хэрэгт холбогдон шалгуулж буй П.Отгонбаатар нь МАН-ын нэр дэвшигч Г.Сайханбаярын ухуулагчаар ажиллаж байсан тул Г.Сайханбаярт ёс зүйн хариуцлага хүлээлгэж, нэр дэвших эрхээс хасах улс төрийн шийдвэр  МАН-ын сонгуулийн Төв штабаас гаргаж байна. Хууль хяналтын байгууллагын дүгнэлт гартал уг асуудлыг улстөржүүлэхгүй байхыг бусад нам эвслээс хүсэж байна” гэлээ.

    Харин дээрх шийдвэрийн МАН-ын дарга албажуулж, Сонгуулийн Ерөнхий хороонд хүргүүлж, тус хороо эцсийн шийдвэрийг гаргах үүрэгтэй аж. Тэгвэл Сонгуулийн тухай хуулийн 75 дугаар зүйлд заасан Нэр дэвшигчийг хасах үндэслэлийг танилцуулж байна.  

75.1.Нэр дэвшигч бүртгүүлсний дараа тухайн нэр дэвшигчийг бүртгэхээс татгалзах үндэслэл тогтоогдсон бол Сонгуулийн ерөнхий хороо тухайн нэр дэвшигчийг бүртгэсэн тухай шийдвэрээ хүчингүй болгож, нийтэд мэдээлнэ.

75.2.Нэр дэвшигч энэ хуулийн 35.3, 38.2, 48.1, 48.5.1, 48.5.2, 56.2-т заасныг зөрчсөн болох нь санал хураалтын дүн гаргахаас өмнө тогтоогдсон бол Сонгуулийн ерөнхий хороо тухайн нэр дэвшигчийг бүртгэсэн тухай шийдвэрээ хүчингүй болгож, нийтэд мэдээлнэ.

75.3.Саналын хуудас хэвлэгдэхээс өмнө нэр дэвшигчийг бүртгэсэн тухай шийдвэрийг хүчингүйд тооцсон бол түүний нэрийг саналын хуудаст бичихгүй.

75.4.Саналын хуудас хэвлэгдсэний дараа нэр дэвшигчийг бүртгэсэн тухай шийдвэрийг хүчингүйд тооцсон бол саналын хуудсыг дахин хэвлэх бөгөөд дахин хэвлэх боломжгүй бол уг саналын хуудсаар санал авч, хасагдсан нэр дэвшигчид өгсөн саналыг санал хураалтын дүнд оруулан тооцохгүй.