Өвөрхангай аймгийн Сант сумын АН-ын дарга нас барсан харамсалтай хэрэг гарсан. Тодруулбал, өчигдөр буюу зургадугаар сарын 15-16-нд шилжих шөнө “Сант суманд гадны нөлөөтэй хүн нас барлаа” гэсэн дуудлага, мэдээлэл цагдаагийн байгууллагад иржээ. Дуудлагын дагуу шалгалтын ажиллагаа явуулахад Сант сумын Ардчилсан намын дарга Б нь гадны нөлөөтэй амиа алдсан байсан нь урьдчилсан байдлаар тогтоогдоод байна

Уг хэргийн талаар АН-аас өнөөдөр мэдээлэл хийж, МАН-ын ухуулагч аминд хүрсэн талаар мэдэгдсэн. Тодруулбал, хуульч Р.Булгамаа “2024 оны зургадугаар сарын 15-ны 19:00-20:00 цагийн хооронд УИХ-ын дарга Г.Занданшатар тэргүүтэй нэр дэвшигчдийн уулзалт Өвөрхангай аймгийн Сант суманд зохион байгуулагдсан. Уулзалт тарсны дараа АН-ын гишүүд, дарга нар уулзалт тарж байгааг харж байх үеэр О гэх иргэн ирж халдсан байна. Эхлээд “Их хурлын даргын уулзалт болж байхад яагаад ирж уулзалтад ордоггүй юм" гэх шаардлага тавиад буцсан. Гэхдээ удалгүй буцаж ирээд олон гэрчийн хажууд амь хохирогчийн хоолой тус газарт өшиглөсөн. Ингээд төвөнх нь цаашаа орсон байдалтайгаар амиа алдсан” гэсэн юм.

Тэгвэл талийгаач Б-ийн биед халдаж, аминд нь хүрсэн гэх П.Отгонбаатар нь 1984 онд төрсөн 40 настай эрэгтэй аж. Тэрбээр МАН-ын нэр дэвшигчийн ухуулагчаар ажиллаж байжээ.

      Бид хүний аминд хүрсэн гэх МАН-ын ухуулагч, П.Отгонбаатарын эхнэртэй холбогдоход “Манай нөхөр нам бус байсан. Намын ухуулагчаар ажиллаагүй. Ийм хэрэг гарсанд харамсаж байна. Өөр мэдээлэл өгөхгүй” гэлээ.