Монголын төрд олон л “хог” байгаа. Тэр болгоноосоо салах гэж үйлээ үзэж, үсээ зулгааж байна, үнэндээ. Гэтэл дахиад хүн “хог”-ууд нэмэгдэх гээд улайрч, чичрэн дайрч байна. Бүхэл бүтэн ийм арми байна гээд боддоо. Үүний нэг нь УИХ-ын сонгуулийн зургадугаар тойрогт нэр дэвшиж буй Төрмөнхийн Пүрэвхатан гэх эмэгтэй.

       Шуудхан хэлэхэд, Хэнтий, Дорнод, Сүхбаатар аймагт нэр дэвшиж байгаа Т.Пүрэвхатан Монголын төрд хэрэггүй юм байна. Тэр үүнийгээ ганцхан мэдэгдлээрээ илчилж орхив. Тодруулбал, Сүхбаатар аймагт АН-ын сонгуулийн штабт ажиллахаар очсон зургаан охин хүчирхийлүүлсэн байж болзошгүй гэх мэдээлэл хэвлэл мэдээллийн хэрэгслээр хөвөрлөө. Үнэндээ, бүгд л “Өрсөлдөгч намынхны захиалгаар хийгдэж байгаа ажил байх. Цэвэр, ёс зүйтэй өрсөлд. Хүний нялх охидыг ийм бусармаг, гүтгэлгийн хэрэгтээ бүү оролцуул” гэх зэргээр шүүмжилж, албаны мэдээг ул суурьтайгаар хүлээж байлаа. Гэтэл гэмт хүн гэлбэлзэнэ гэгчээр нэр дэвшигч Т.Пүрэвхатан хамгийн түрүүнд өөрийгөө өмөөрсөн, өөрөөсөө холдуулсан, журмын нөхдөө тонгорсон мэдэгдэл хийж, постер болгоод цацжээ.

       Тэрбээр мэдэгдэлдээ “Төрмөнх овогтой Пүрэвхатан миний бие Монгол Улсын УИХ-ын сонгуулийн зургадугаар тойрогт Ардчилсан намаас нэр дэвшиж байгаа билээ. Сонгуулийн сурталчилгаа эхэлсэнтэй холбоотойгоор нэр бүхий мэдээллийн сайтуудад “Сурталчилгаанд ажиллахаар очсон зургаан охин хүчиндүүлжээ” гэсэн гүтгэлгийн шинжтэй мэдээллийг зохион байгуулалттайгаар олон нийтэд түгээж байгаад харамсаж байна. Сүхбаатар аймагт сурталчилгаа хийхээр очсон охид надтай хамааралгүй болно. Иймд өрсөлдөгч, эрх баригчдад шударгаар өрсөлдөхийг хүсэж, энэхүү мэдэгдлийг гаргаж байна” гээд овог, нэрээ бичжээ.

        Тун ч харамсалтай юм, эмэгтэй хүн гэхэд ийм мэдэгдэл гаргаж байх ч гэж дээ. Тэр тийм их мэдэгдэл гаргаж, өөрийгөө нэр цэвэр гэдгийг батлахыг хүсэж, төрийн жолоод шунаж байгаа бол сэтгэлтэй байх хэрэгтэй. Ядахдаа “Эмэгтэйчүүд, охид хүчирхийлүүлсэн гэдэг мэдээлэл сэтгэл эмзэглүүллээ. Тэр нь манай тойрогт, миний нэртэй холбоотой байгаад маш их цочирдлоо. Ээж, эмэгтэй хүн учраас энэ асуудлыг үнэн, зөвөөр нь тогтоолгож, олон нийтэд мэдээлэл өгнө. Сонгуулийн сурталчилгаа эхэлсэн учраас гүтгэлгийн шинжтэй, зохион байгуулалттай ажлыг хийж байгаа бол хүний нялх үрсийг бүү оролцуулаач” гэх уянгын ч юм шиг, уярмаар ч юм шиг сэтгэлийг тэр мэдэгдэлдээ худлаа ч гэсэн хэлхэх байлаа. Гэтэл тэгсэнгүй, надад хамаагүй, миний нэр хүнд гээд л “хашхираад” байна.

Тэгээд олон нийтийн шүүмжлэлд өртсөн даруйдаа мэдэгдлээ засаж, “Сүхбаатар аймагт сурталчилгаа хийхээр очсон охид надтай хамааралгүй болно” гэх хамгийн ноцтой, харгис өгүүлбэрээ аваад хаячихав.

     Сонгуулийн сурталчилгаанд ажиллахаар очсон охид хүчирхийлүүлсэн байж болзошгүй хэргийн талаар ЦЕГ-ын Хэвлэл мэдээллийн төвөөс өгсөн мэдээллээр “Сүхбаатар аймгийн Баруун-Урт сумын Дарьганга зочид буудалд манай дүү охиныг хүчирхийлэхийг завдсан байж болзошгүй гэх дуудлага, мэдээлэл бүртгэгдсэн. Хэргийг шалгаж байгаа учраас дэлгэрэнгүй мэдээлэл өгөхгүй боломжгүй” гэсэн юм.

Ийм ноцтой хэргийн сэжүүр цагдаагийн байгууллагад ирэхийн хувьд иржээ. Харин одоо энэ нь хуурамч уу, эс хуурамч уу гэдэг нь мөрдөн шалгах ажиллагааны хүрээнд тодорхой болно. Эндээс хардаж харвал, Т.Пүрэвхатан хүчирхийллийн хэргийг мэдэж байсан бололтой. Тэгээд ийм мэдэгдэл гаргаж, миний хүмүүс биш, манай намын бусад нэр дэвшигчдийн гэж “илчилсэн” бололтой.

       Ийм мэдэгдэл гаргаснаараа тэр уснаас хуурай гарчихгүй. Түмнийг төлөөлж, төр түшилцэх хүн амиа хичээж, ардчилал ярих нь эмгэнэлтэй бөгөөд инээдэмтэй. Төрийн түшээ болчихвол энэнээс ч хэцүү, хэрцгий, хүний санаанд оромгүй хэргүүдтэй нүүр тулна. Тэр болгонд олон нийт тусламж, эрх зүйн орчин нэхнэ. Энэ болгонд нь Т.Пүрэвхатан зугтааж, өөрийгөө хамгаалах юм байна. Тэгэхээр тэр Монголын төрд хэрэггүй хүн гэдэг нь эндээс тодорхой харагдаж байгаа биз ээ. Гэхдээ нэг талаараа Т.Пүрэвхатанд баярлах хэрэгтэй. Өөрийгөө төрд хэрэггүй, хүн “хог” гэдгийг сурталчилгааныхаа эхний өдрүүдэд харуулж, иргэдэд өөрийгөө таниулчихлаа. Сонгочихоод “уйлж” суух зовлонд иргэдийг тэр унагасангүй. Т.Пүрэвхатан шиг сэтгэлгүй, ёс зүйгүй, хүн чанаргүй “хог”-ууд Монголын төрөөр дүүрэн бий шүү, хэрсүү сонгогчдоо.

Хүн чанарын өчүүхэн ч хэлтэрхийгүй Т.Пүрэвхатаны талаар зарим баримтыг хүргэе.

3.7 ТЭРБУМЫН ОРОН СУУЦТАЙ Т.ПҮРЭВХАТАН

Тэр дөрвөн жилийн өмнөөс өөрийгөө төрд бэлдэж эхэлсэн. Гэхдээ бэлдээд, бэлдээд энэ учраас түүнээс өөр юу ч хүлээлтгүй, хүсэлтгүй.

   АН-ын дэд дарга Төрмөнхийн Пүрэвхатан нь Хэнтий аймгийн Өндөрхаанд төрж, өссөн. 2002 оноос хойш Баянгол дүүргийн ЗДТГ-т мэргэжилтэн, Баянзүрх дүүргийн Газрын албанд мэргэжилтэн, Нийслэлийн Өмчийн харилцааны газарт мэргэжилтэн, Ашигт малтмалын газарт мэргэжилтэн, Эрчим хүчний зохицуулах хороонд Хуулийн хэлтсийн даргаар тус тус ажиллаж байсан. 2017 онд төрийн албанаас гарч, Хэнтий аймгийн Ардчилсан эмэгтэйчүүдийн холбооны тэргүүн болсон. 2020 оны УИХ-ын сонгуульд АН-аас Э.Бат-Үүлтэй ханьсаж нэр дэвшсэн ч өвдөг шороодсон. Өнгөрсөн онд Х.Баттулгын дэмжлэгээр АН-ын дэд даргаар томилогдсон. Улмаар Т.Пүрэвхатан Х.Баттулгатай хамт МоАХ-ын “Хөх туг” аянаар 21 аймгийг тойрсон. Ингэхдээ Х.Баттулга зүүн бүсийн гурван аймгийн сонгогчдод Т.Пүрэвхатанг онцгойлон танилцуулж, түүнийг дэмжихийг аминчлан захиж байв.

Х.Баттулгын хүн гэдгээ баталж, тэрбээр "Х.Баттулга дарга гишүүнчлэлээ сэргээсэн манай намын нэг гишүүн. Зөв залуучуудыг тэрний хүн гэж цоллодог байдлаа болимоор байна гэж уриалъя" гэж хүртэл мэдээлэл хийж байлаа.

  VI тойрогт нэр дэвшигч Т.Пүрэвхатан 3.7 тэрбум төгрөгийн дөрвөн орон сууцтай, нэг зуслангийн байшинтай. Мөн Lexus 570, Lexus RX 350 загварын 480 сая төгрөгийн хоёр жийптэй. Т.Пүрэвхатангийн “Шинэ хужирт” ХХК нь хүүхдийн “Найрамдал” зуслангийн хажууд, “Натур мед” нэртэй дөрвөн давхар сэргээн засах сувиллын эмнэлэг ажиллуулдаг.

ГАЗРЫН НАЙМААНД “ГАРШСАН” Т.ПҮРЭВХАТАН

      Ноцтой нь, Т.Пүрэвхатан газрын наймааны хоёр ч хэрэгт холбогдсон хар түүхтэй нэгэн. Нэгдүгээрт, Т.Пүрэвхатангийн хуучин дарга нар буюу Баянзүрх дүүргийн Өмч, газрын харилцааны албаны дарга асан Н.Батсүх, Баянгол дүүргийн Өмч, газрын харилцааны албаны дарга асан С.Бямбадорж, Нийслэлийн өмчийн харилцааны газрын Захиргаа, удирдлагын хэлтсийн дарга асан Б.Амаржаргал нар хуйвалдан, 2015 онд Баянзүрх дүүргийн 20-р хороо, Улиастайн Их цуурайтын аманд хууль бусаар 103 хүний нэр дээр газар олгож, хариуд нь БНХАУ-ын иргэн Лин Суй Лин гэгчээс их хэмжээний авлига авсныг АТГ-аас илрүүлж, улмаар тэд шүүхээс 1-3 жилийн ял сонссон. Ноцтой нь, Н.Батсүх нь Т.Пүрэвхатангаар зуучлуулан БНХАУ-ын иргэн Лин Суй Лин гэгчээс авлига авснаа хүлээж, анхан шатны шүүхээс гурван жилийн ял сонсож, давж заалдаад нэг жилийн хорих ял болгуулсан. Харин авлига зуучилсан Т.Пүрэвхатан ялгүй мултарсан байдаг. 

Хоёрдугаарт, Т.Пүрэвхатангийн нөхөр Б.Ууганбаяр нь 2019 онд Нийслэлийн Ерөнхий архитектор бөгөөд Хот байгуулалт, хөгжлийн газрын даргаар ажиллаж байсан. Ноцтой нь,  Б.Ууганбаяр эрх мэдлээ ашиглан хүүхдийн “Найрамдал” зуслангийн газраас эхнэр Т.Пүрэвхатангийнхаа “Шинэ хужирт” ХХК-д газар олгуулсан хэрэгт холбогдож, ажлаа өгсөн. Өдгөө Б.Ууганбаяр, Т.Пүрэвхатан хоёрын “Шинэ хужирт” ХХК нь хүүхдийн “Найрамдал” зуслангийн хажууд, хууль бусаар авсан гэх газар дээрээ “Натур мед” нэртэй хувийн эмнэлэг барьчихаад буй.

Бид үргэлжлүүлэн “яллагдагч” Т.Пүрэвхатанаас хураан авсан 103.980.000 /нэг зуун гурван сая есөн зуун наян мянга/ төгрөгийг 16 дугаар хавтаст хэргийг бүрэн эхээр нь хүргэх болно.