Хоёрхон хоногийн өмнө сонгосон тойргийнхон нь бараг таньдаггүй байсан Э.Бат-Амгалан гишүүнийг гишүүдийн нэр дуудаж, босож ирдэг гэдгээр нь хүмүүс андахгүй боллоо. Баянзүрх дүүргээс сонгогдсон УИХ-ын гишүүн Э.Бат-Амгалан олон нийтэд танигдаж амжаагүй гишүүдийн нэг гэгддэг. Харин улстөрийнхөн түүнийг “Ч.Хүрэлбаатар” хэмээн хэлд орсон бол “Б.Пүрэвдорж” хэмээн агсарч эхэллээ хэмээж буй.  

     Тэрбээр Хууль зүйн байнгийн хорооны хуралдааны үеэр УИХ-ын гишүүн Э.Бат-Амгалан “Б.Пүрэвдорж оо чамайг ална аа, гараад ир чи” хэмээн заналхийлсэн. Тэр цагаас түүнийг архи уусан, уугаагүй хэмээн хүмүүс талцаж байна.  Зарим нь түүнийг архичин гишүүнтэй байж болохгүй яаралтай эгүүлэн тат, ёс зүйн хариуцлага тооц хэмээн өндөр дуугаар хашхирч байв. Харин зарим нь Э.Бат-Амгалан гишүүн согтуу байгаагүй, архи уудаггүй гэсэн” хэмээн цагаатгаж байх жишээтэй. Тодруулбал, Ёс зүйн байнгийн хорооны дарга Б.Баттөмөр сэтгүүлчдэд тайлбар өгөхөө “УИХ-ын гишүүн Э.Бат-Амгалантай өглөө уулзаж, юу болсон талаар тодруулсан. Э.Бат-Амгалан гишүн “Би архи уугаагүй. Намайг хэн архи уусан гээд байгаа юм бэ. Би хэвлэлд өөрөө тайлбар, мэдээлэл өгнө. Хууль батлуулах явцад Б.Пүрэвдорж гишүүнтэй маргасан нь үнэн. Гишүүд хоорондоо маргаж л байдаг шүү дээ. Би архи уудаггүй” гэж хэлсэн. Тэгэхээр Э.Бат-Амгалан гишүүнийг архи уусан, хүн заналхийлсэн эсэхийг нотлох л хэрэгтэй. Хэрэв архи уусан Ёс зүйг сахиулах байнгын хороо гурван арга хэмжээ авна. Нэгдүгээрт, сануулах, хоёрдугаарт, уучлалт гуйхыг шаардана, гуравдугаарт, цалингийн 20 хувиар торгох. Харин архидан согтуурсан үедээ хүн заналхийлж, гэмт хэрэгт холбогдсон бол прокурор хэлэлцэж, УИХ-д оруулж ирнэ. Тэгээд УИХ саналыг нь авч хэлэлцэнэ. Ийм л дэг журам, хуультай. Би одоогоор Б.Пүрэвдорж гишүүнтэй уулзаж амжаагүй байна” гэсэн юм.  Харин Э.Бат-Амгалан, Б.Пүрэвдорж гишүүнийг Хууль зүй дотоод хэргийн сайд Х.Нямбаатар салгаж, Э.Бат-Амгалан гишүүнийг авч гарсан гэгддэг. Хууль зүй, дотоод хэргийн сайд Х.Нямбаатар “Э.Бат-Амгалан гишүүн эрүүл байсан. Б.Пүрэвдорж гишүүнтэй маргалдах гэхээр нь би авч гарсан юм” гэсэн. Харин маргалдсан гэх Б.Пүрэвдорж гишүүн “Э.Бат-Амгалан хуралдааны үеэр хэлсэн миний үгэнд уурласан байх. Дандаа над руу хашхирч, өндөр дуугаар ярьдаг юм. Түүнээс согтуу байгаагүй байх” хэмээн тайлбар өгсөн байдаг. Харин гишүүдийн нэр дуудаж хэлд ордог Э.Бат-Амгалан гишүүний намтрыг хүргэе.

ГИШҮҮДИЙН НЭР ДУУДАЖ ХЭЛД ОРДОГ Э.БАТ-АМГАЛАН 169.469.000 ТӨГРӨГИЙН ОРЛОГОТОЙ

     Тэрбээр 1977 онд төрсөн. Гадаад албаны ажилтан, эрх зүйч мэргэжилтэй. 2008-2010 Баянзүрх дүүргийн  ЗДТГ-ын хэлтсийн дарга, 2010-2011 Үндэсний цэцэрлэгт хүрээлэнгийн НӨҮ газар орлогч дарга, 2015 Чингис хаан ОУНБ гадаад харилцааны тасгийн дарга, 2012-2015 Баянзүрх дүүргийн МАН-ын дэд дарга, 2016 Баянзүрх дүүргийн МАН-ын даргаар ажиллаж байгаад 2020 онд УИХ-ын гишүүн болжээ.

    Э.Бат-Амгалан хөрөнгө орлогын мэдүүлэгтээ 169 сая 469 мянган төгрөгийн орлоготой. 2.5 сая төгрөгөөр үнэлэгдэх нэг орон сууцтай, нэг хашаа байшинтай, 226 сая төгрөгийн үнэтэй нэг автомашинтай, 150 сая төгрөгөөр үнэлэгдэх газартай, 120 сая төгрөгөөр үнэлэгдэх үнэт эдлэлтэй, бусдаас 300 сая төгрөгийн авлагатай хэмээн мэдүүлсэн байна. 200-2008 онд “Баян Хадат” тур компанийнхаа захирлаар ажиллаж байсан.