-НҮҮРСНИЙ ХУЛГАЙН ХЭРГИЙГ "АЖНАЙ" Д.БАТ-ЭРДЭНЭ БОЛОН ТҮҮНИЙ ХАМААРАЛ БҮХИЙ ӨМНӨГОВЬ АЙМГИЙН ДАРГА НАРААС ЭХЛЭЖ ШАЛГАВАЛ ХЭРГИЙН ЗАНГИЛАА АМАРХАН ТАЙЛАГДАХ ЮМ БИШ ҮҮ-

    УИХ-ын гишүүн Д.Бат-Эрдэнийн даалгавраар нүүрсний хулгайн хэрэг цадигаа алдсан гэхэд болно. Түүнийг 2018 оноос “Нүүрсний хулгайч” хэмээн жигших болсон шалтгаан нь ухах ёсгүй байсан нүүрсэн мөргөцгийг хулгайлсан гэх дуулианаас үүдэлтэй. Тухайлбал, түүнийг нүүрсэн мөргөцгийг хулгайгаар олборлож, 268 мянган тонн нүүрс Хятад руу нууцаар зөөж, улсад их хэмжээний хохирол учруулсан болохыг нэр бүхий хүмүүс нотлох баримт болгож зарласан байдаг. Д.Бат-Эрдэнийн эзэмшлийн “Таван толгой транс” компани орон нутгийн жижиг “Таван толгой” компанийн 49 хувийг эзэмшдэг. Харин 51 хувийг орон нутаг эзэмшдэг нэртэй ч жижиг “Таван толгой” компани тэр чигтээ Д.Бат-Эрдэнийн эрхшээлд байдаг нь тодорхой болсон. Өөрөөр хэлбэл, жижиг “Таван толгой” Д.Бат-Эрдэнийн авдар гэсэн үг.

    Д.Бат-Эрдэнэ дээрх эрх мэдлийнхээ хүрээнд нүүрсэн мөргөцгийг хулгайгаар олборлож, 268 мянган тонн нүүрсийг хил давуулсан болохыг УИХ-ын гишүүн асан Л.Энхболд ярьсан байдаг. Тэрбээр “Д.Бат-Эрдэнэ 2017 оны тавдугаар сарын 22-ноос зургадугаар сарын 22-ны хооронд Орон нутгийн таван толгойн үйл ажиллагааг бүрэн зогсоож ямар ч хамгаалалтгүй болгоод 220 мянган тонн нүүрсийг сарын дотор Хятад руу зөөсөн. Тэр 220 мянган тонн нүүрсийг хэрхэн зөөсөн бэ гэвэл, Гашуунсухайт авто замын шалган нэвтрүүлэх товчоогоор түүний мөргөцгөөс нүүрс ачиж гарсан машинуудын тоо тодорхой болсон. Түүний хамаарал бүхий компаниуд оройны 18:00 цагаас өглөөний 06:00 цаг хүртэл хулгайн нүүрс ачсан байдаг. Энэ бол тухайн үеийнхээр 20 гаруй сая ам.доллартай тэнцэх нүүрс байсан” хэмээн ярьсан байдаг.

Гэвч дээрх хэргийг тухайн үед  АТГ-аас Эрүүгийн хэрэг үүсгэн шалгаж эхэлсэн боловч хэрэг нь удалгүй замхарсан. Энэ нь Д.Бат-Эрдэнийг  нүүрсний хулгайн хэргээрээ хуулийн хариуцлага хүлээдэггүй, хулгайн хэргээсээ бултаж ирсэн гэдгийг илчилж буй юм. Гэвч сүүлийн үед ээлжит дуулиан болж буй нүүрсний хэргийн гол зангилаа Д.Бат-Эрдэнээс эхлэлтэй гэж үзэх шалтгаан нь мөргөцгийн нүүрсний хулгайтай шууд холбоотой. Мөн Д.Бат-Эрдэнийг “Эрдэнэс Тавантолгой” компанийн эзэмшил талбайгаас нүүрс хулгайлсан гэх дуулиан ч бий. Энэ мэт “Ажнай” Д.Бат-Эрдэнэ нүүрс хулгайлахдаа ямар л бол ямар арга сүвэгчилдэг нь дархлагдсан "нүүрсний хулгайч" болохыг илчилдэг.

АЖНАЙ Д.БАТ-ЭРДЭНИЙГ НҮҮРСЭН МӨРГӨЦГИЙГ ХУЛГАЙГААР УХАЖ, 220 МЯНГАН ТОНН НҮҮРС ХЯТАД РУУ ЗӨӨСӨН ГЭДЭГ

    "Ажнай" Д.Бат-Эрдэнэ тэргүүтэй нүүрсний хулгайн бүлэглэл Өмнөговь аймгийг бүтнээр нь эзэгнэдэг болохыг манай сайтынхан өмнө нь нийтэлж байсан. Тухайлбал, Д.Бат-Эрдэнэ Өмнөговь аймагт хэнд ч хэзээ ч дийлэхээргүй хулгайн бүлэглэлийнхээ гишүүдийг Өмнөговь аймгийн Засаг дарга, ИТХ-ын дарга, төлөөлөгчид болгон “уясан”байдаг нь сонирхолтой. 

     Цаашилбал, “Тавантолгой” ХК-ийн ТУЗ, гүйцэтгэх захирал, дэд захирал, алба, хэлтсийн дарга нар нь хүртэл “Ажнай” Д.Бат-Эрдэнийн ах дүү, хамаатан садан, найз нөхөд нь байдаг гээд л бод. Тийм учраас нүүрсний хэргийг “Ажнай” Д.Бат-Эрдэнэ болон түүний хамаарал бүхий Өмнөговь аймгийн дарга нар, хамаатан садангаас нь эхэлж шалгавал, хэргийн зангилаа амархан тайлагдах нь тодорхой. Тухайлбал, Д.Бат-Эрдэнэтэй нийлж, “Тавантолгой” ХК-ийг тонодог нэр бүхий “хулгайчид”-ын тоонд Өмнөговь аймгийн Засаг дарга Р.Сэддорж, Засаг даргын орлогч, Н.Энхбат, ИТХ-ын төлөөлөгч, АН-ын бүлгийн дарга Ч.Жаргалсайхан, Өмнөговь аймгийн ИТХ-ын төлөөлөгч, "Тавантолгой" ХК-ийн ТУЗ-ийн дарга Б.Түвшинбаяр, Өмнөговь аймгийн Санхүү, төрийн сангийн хэлтсийн дарга Б.Очгэрэл болон “Тавантолгой” ХК-ийн удирдлагууд гээд бүгд хамаардаг.

    Харин сүүлийн өдрүүдэд монголчууд нүүрсний хулгайчдыг зарлаж, хуулийн хариуцлага тооцохыг Ерөнхий сайдаас шаардаж, тав дахь өдрөө жагсаж байна. Иргэдийн жагсаалын үр дүнд Засгийн газраас нүүрсний хулгайн хэрэгтэй холбоотой хэдэн хүнийг зарлаж, нүүрсний хулгайн хэрэгт хэрэг бүртгэл нээн, шалгалтын ажиллагааг үргэлжлүүлж байгаа тухай мэдээлсэн. Ингэхдээ “Эрдэнэс тавантолгой” ХК-ийн захирлаар ажиллаж байсан Д.Ариунболд, Д.Ганхуяг, Худалдан авалтын хэлтсийн дарга Б.Отгонжаргал, Дотоод хяналт, эрсдэлийн удирдлагын газрын дарга Х.Нурлат нарыг шалгаж, Тавантолгой төмөр зам дээр тус компанийн захирлаар ажиллаж байсан Н.Удаанжаргал болон тус компанийнхан, Гаалийн ахлах байцаагч Д.Эрдэнэбаяр, ХХЕГ-ын Гашуунсухайт дахь төлөөлөгч Доржжүгдэр, Дэлгэрдалай нарын 10 гаруй хүнд Эрүүгийн хэрэг үүсгэн шалгаж байгаа тухай зарласан.

    Харин ХЗДХ-ийн сайд Х.Нямбаатар Ерөнхийлөгчтэй уулзах үеэрээ “Нүүрсний хулгайн хэрэгтэй холбоотойгоор 9000 орчим тээврийн хэрэгслийн жолооч болон тээврийн хэрэгслийн эцсийн өмчлөгч нарыг тогтоох ажил үргэлжилж байгаа. Мөрдөн шалгах ажиллагааны явцад одоогийн байдлаар хүний гэм буруугийн асуудлыг тогтоож, Засгийн газарт өргөн мэдүүлэх асуудал байхгүй. Харин хэрэгт холбогдуулан шалгаж буй 2015 оноос нүүрсний хэрэгт холбогдон шалгагдаж байсан 10 хүнд хэрэг бүртгэл нээж шалгаж байгаа” гэх тайлбарыг өгсөн юм.

НҮҮРСНИЙ ХЭРЭГТЭЙ ХОЛБООТОЙ 27 ГАЗАР НЭГЖЛЭГ ХИЙЖ, НАЙМАН ХҮНИЙГ БАРИВЧЛАВ

 Харин өнөө өглөө нүүрсний хэрэгтэй холбоотой 27 газар хуулийн байгуулагынхан нэгжлэг хийж, найман хүнийг баривчилж, Цагдан хорих 461 дүгээр ангид саатуулсан. Тодруулбал, "Эрдэнэс силвер ресурс" ХХК-ийн захирал асан Т.Мөнхбаяр, "Эрдэнэс Тавантолгой" ХК-ийн захирал асан Б.Ганхуяг, түүний эхнэр, мөн эгч Б.Нарантуяа, хүргэн Д.Пүрэвдорж, "Эрдэнэс Тавантолгой" ХК-ийн албаны дарга С.Энхтөр, "Хишиг арвин индустрал" ХХК-ийн эзэн Б.Хишигдорж, тус компанийн гүйцэтгэх захирал М.Хүрэлбаатар нарыг баривчилжээ. Учир нь шалгалтын үеэр тэднээс онц их хэмжээний мөнгө, бусад хориотой хэрэгсэл илэрсэн бөгөөд мөн тэдний нэг нь жагсаал зохион байгуулахад гол үүрэг гүйцэтгэсэн нь урьдчилсан байдлаар тогтоогдсон байна.