-НАМЫН ГИШҮҮДЭЭ ОФФШОР ДАХЬ НЭГ САЯ АМ.ДОЛЛАРТОЙГОО МАРТСАН С.БАЯРЦОГТ-

     Сангажавын Баярцогт нэрээ цэвэрлэчихээд улс төрийн амьдралдаа  эргэн ирж байна. Тэр эргэж ирэхдээ шүүхээр нэрээ цагаадуулчихаад хоёр хуваагдчихаад байгаа Ардчилсан намын дарга болох гэж улс төрийн нүүдэл хийсээр ирэв. Бүр цахим орчимд  С.Баярцогт  шиг   шилдэг улс төрч Ардчилсан намд байхгүй. Энэ хүн л “сэхээн”-ий тасагт  амьсгалын аппраттай хэвтэж байгаа Ардчилсан намыг аврах юм байна” гээд л өөд уруугүй магтуулсан пост хийлгэж байна.  Ерөнхий сайд асан Ч.Сайханбилэг, С.Баярцогт хоёр хориодхон наснаасаа улс төрд орж ирсэн. Хамгийн залуу даргаар тодорч, гадаадад боловсрол эзэмшсэн.  Монголын эдийн засгийг тэтгэх хамгийн зөв бодлогыг хэрэгжүүлж чадна гээд тухайн үедээ рейтенгээрээ тэргүүлж байлаа. Харамсалтай нь, Оюу толгойг монголд үйл ажиллагааг нь явуулах ажлыг гардсан цаг үеэс нэр хүнд нь тасралтгүй унасан. Бүр оффшор дансандаа их үүсвэр нь тодорхойгүй нэг сая ам.доллар хадгалж байгаад баригдахдаа “Хөрөнгө орлогын мэдүүлэгтээ дурдахаа мартчихсан” хэмээн мэлзэж байв. Сүүлдээ сандарч, арга ядахдаа уучлалт гуйж, албан ажлаа хүлээлгэн өгснөөр шуугиан хэсэг намжсан.

-ТӨРИЙН МӨНГӨНИЙ АВДРЫН ТҮЛХҮҮРИЙГ АТГАЖ ЯВСАН С.БАЯРЦОГТ ГУРВАН ШАТНЫ ШҮҮХЭЭР ЦАГААДАВ-

     Нэг сая ам.долларын хадгаламжтай компаниа мартана гэдэг Сэлэнгийн сонгогчдын төдийгүй монголын баячуудын ой тойнд ч буухааргүй байгаа биз. Ингэтлээ баяжиж, мөнгөн дунд “сэлдэг” түүний хувьд нэг сая ам.доллар гэдэг бидний өдөр тутамдаа цуглуулдаг 10, 20 төгрөг юм уу даа, бараг. Мөн үүнээс гадна  Оюутолгойн гэрээг үзэглэж, Төрийн мөнгөний авдрын түлхүүр атгаж явсан. Харин Засгийн газрын хэрэг эрхлэх газрын даргаар ажиллаж байх үедээ “Эрдэнэт” үйлдвэрийн ОХУ-д эзэмших 49 хувийг УИХ-аас нууж, хувийн хэвшилд өгсөн хуйвалдаанд оролцсон хүмүүсийн нэгээр нэрлэгдэж байв. Энэ үед Ч.Сайханбилэгийн нууцаар хийсэн гэх Дубайн гэрээ, “Чингис” бондын мөнгөний зүй бус зарцуулалтыг С.Баярцогт толгойлж, гал тогоог нь барьж байсан Засгийн газрын гишүүдээ гомдоогоогүй биз.

    С.Баярцогт УИХ-д дөрвөн удаа сонгогдохдоо гурван  удаа Засгийн газарт багтаж баярын бялуунаас хоцорч байсангүй. Ингэхдээ дөрвөн удаа сайдын суудал хүртсэн цөөн хүний нэг бол С.Баярцогт. Үүнээс харвал, нэг сая ам.доллар дансандаа мартчих хэмжээний хөрөнгөжсөн болохыг үгүйсгэх аргагүй. Гэвч гурван шатны шүүх түүнийг мартамхай болохоор нь цагаатгачихав уу, яав. Магадгүй “Мартсан гэгдэх нэг сая ам.доллар нь гурван шүүгч, 10 хэвлэлийн байгууллагын зардалд зарцуулсан биз” хэмээн улс төрийн лидерүүд ярьдаг. Ингэхдээ тэд “Оюу толгой”н хувьцааны ханшийн өөрчлөлтийг С.Баярцогт биш  Монголбанк хариуцаж байсан бол өчнөөн эмнэлэг, цэцэрлэг, сургуультай болох байлаа” хэмээн түүнийг хулгайч, луйварчин, тонуулч зэргээр бичсэн. Энэ нь С.Баярцогтыг улс төрд иргэн ирэх хэрэггүй гэдгийг сануулж байгаа хэрэг.