-ЕРӨНХИЙЛӨГЧ ӨӨ, ХЭЛСЭН ҮГ, ХИЙХ ҮЙЛДЭЛ ТАНЬ ТАРХИ УГААЛТ, ХУДАЛ АМЛАЛТ, ПОПРОЛ БҮҮ БАЙГААСАЙ-

            Индэр дээрээс хэлсэн үгэнд чинь итгэж, талархъя, Ерөнхийлөгч өө. Тэр хууль бусаар мод булгалдаг, уулын модыг хайр найргүй зөөж, байгаль орчны эсрэг ноцтой гэмт хэрэг үйлдэж, ирээдүйгээ хумслагч, халаасаа түнтийлдэгддэг модны “шагчидтай” тэмцэхийг ард түмэнд даатгаж, өөрөө “хянаж” ажиллана гэдгээ Төрийн ордны индэр дээрээс улсын тэргүүний хувиар хэллээ.

           Ерөнхийлөгч У.Хүрэлсүх Ойн чуулганы үеэр хэлэхдээ “Тэрбум мод” үндэсний хөдөлгөөнтэй зэрэгцэн ойн сийрэгжүүлэлтийн ажил хийгдэх явцад уулнаас мод сугалж, өөр газар шилжүүлэн суулгах нэрийдлээр модны амь таслах, байгаль орчинд хохирол учруулах зэрэг зүй зохисгүй үйл явдал гарсан гэдгийг ард түмэн шүүмжилж, хэлж байна. Ийм зүйл огт гаргаж болохгүй. “Тэрбум мод” үндэсний хөдөлгөөн эхэлснээс хойш ард түмэн ойн санд анхаарал хандуулдаг болсонд би хувьдаа баярлаж байна. Өмнө нь машин машинаар нь мод хулгайлаад явж байхад нь юу ч хэлдэггүй байлаа. Харин өнөөдөр үүнийг мэдээлдэг болжээ. Хянаж, шалгадаг боллоо. Иргэн хүн үүргээ мэдэрч эхэллээ. Нэг ёсондоо ой мод, ойн сан Монголын ард түмний анхаарлын төвд орж эхэлжээ. Энэ бол “Тэрбум мод” үндэсний хөдөлгөөний ололт, амжилт. Тийм учраас мод тасалж, хулгайлж байгаа хариуцлагагүй этгээдүүдтэй ард түмнээрээ тэмцэх ёстой. Бид бүгдэд гар утас байгаа. Гар утсаараа хаана мод тасалж, хулгайлж, булгаж байгааг бүгдийг нь бичиж, олон нийтэд цацаж байх хэрэгтэй. Ард түмний сэтгэл санааг зовоож, уул, уснаас мод хулгайлж, уул, ус бухимдуулж, бохирдуулж, гол мөрөнг хилэгнүүлж,  хууль бусаар мод огтлох, хөрс шороо, ус, ундны эхээ бохирдуулж, байгаль орчны эсрэг гэмт үйлдлийг Экологийн цагдаагийн байгууллага, байгаль хамгаалах албад нэн яаралтай илрүүлэн, шалгаж, зохих арга хэмжээг даруй авч, ард иргэдэд бодит мэдээлэл өгч байхыг хүсэж байна. Хэвлэл мэдээллийн байгууллага, сэтгүүлчид ойн модыг хамгаалах чиглэлд анхаарч ажиллахыг уриалж байна. Байгаль орчны эсрэг гэмт хэргийг илрүүлэхийн төлөө, бүгдээрээ хамтдаа хүчин зүтгэж тэмцэж байх учиртай. Байгаль орчны эсрэг аливаа гэмт хэрэг, үйлдэл бол хүн төрөлхтөн, ирээдүй хойч үедээ заналхийлсэн, өршөөж болохгүй гэмт хэрэг гэж үзэх хэрэгтэй. Энэ бол хүн төрөлхтний эсрэг үйлдэж байгаа гэмт хэрэг” гэж хэллээ.

       Ерөнхийлөгч өө, хэлсэн үг, биелүүлэх шийдвэр, хатуу тэмцэх аргаа индэр дээрээс хөрс рүү аваад буугаарай. Таны хэлсэн үг тань тархи угаалт, тал засалт, попрол бүү байгаасай. Байгаль орчны эсрэг ноцтой гэмт хэрэг үйлдэгчид бол ард түмэн биш, таны баруун, зүүн гарын салаалагч нар гэдгийг санана биз ээ.

      Зөвшөөрөл, санамж бичиг, сийрүүлэх талбай нэрийдлээр тархи угааж, халаасаа түнтийлгэж, уулын модыг Улаанбаатарт авчирч, “оршуулсан” нэр бүхий, цөөн тооны хүмүүст эх орныхоо эсрэг гэмт хэрэг үйлдсэнийх нь төлөө хатуу хариуцлага тооцоорой. Ойн сан дахь модыг нүүлгэн шилжүүлэхгүй байх хатуу шийдвэрийг тань хэрэгжихийг модод, Монголын ард түмэн тэсэн ядан хүлээж байна. Хэлсэндээ хүрэх хүртэл хүртэл тань бид энэ бүгдийг сануулсаар байх болно.