• Өнөөдөр 2026-09-07

УЛСТӨРЧИД ЯЛААС МУЛТАРЧИХЛАА, ТЭД ТӨРД БУЦАЖ ИРЭХ ҮҮ

2021-08-23,   1442

            Монголын төр улс төрийн хоригдлуудаа бүгдийг нь суллачихлаа. Нэг хэсэг төрийн томчуудыг идэж, уудаг, зальтай, шуналтай гэж олон нийтэд зарлаж, хэвлэлийнхэний өмнө сүр дуулиантай баривчилдаг байсан бол энэ моод ард хоцорчээ. Өнгөрсөн баасан гарагт Сангийн сайд асан С.Баярцогтыг батлан даалтад гаргаж, өмгөөлөгчийн хүсэлтээр сулласнаар улс төрийн томчууд тэр чигтэй суллагдав. Нэг хэсэг улс төрийн нэр нөлөө бүхий хүмүүсээр “дүүрсэн” цагдан хорих ангиуд өнөөдөр эзгүүрэв бололтой.
Санамсаргүй гэмт хэрэгт холбогдсон эгэл ардын хүүхдүүд хийсэн хэргийнхээ төлөө ялын дээд хэмжээг сонсож, нэг нь ч ялаа хөнгөлүүлж чадалгүй цэл залуугаараа насан туршдаа хийсэн алдаандаа гэмшдэг атал улс төрийн нөлөө бүхий томчууд жил гарантай суугаад л хэрэг нь цагаадчихдаг жишиг манайд бий. 
        Улс төрчид олон хүнийг гар хөлөө болгож, хууль хяналтын байгууллагад том артай нь өөрийнх нь эсрэг дуугарсан нэгнээ “Аавын хаалга татуулна” хэмээн айлгаж, баривчилдаг байв. Угтаа бол цагтаа мандаж явсан олны дунд нэр төртэй олон улстөрчийг толгой дараалан баривчилж, олны өмнө улсынхаа аюулгүй байдал, нэр хүндэд  халдсан хэмээн буруутгаж яллаж байсан нь саяхан. Ингэхдээ тэднээс муу хүнгүй мэтээр цоллож, нийгмийг донсолгож, олон жилийн ял ногдуулдаг байсан ч хэн нь хийсэн хэргийнхээ төлөө эгэл жирийн ардын хүүхэд шиг чин шудрагаар хариуцлагаа хүлээж, ялаа эдлээд гарч байсангүй.
 

Өөрөөр хэлбэл, санамсаргүй гэмт хэрэгт холбогдсон эгэл ардын хүүхдүүд хийсэн хэргийнхээ төлөө ялын дээд хэмжээг сонсож, нэг нь ч ялаа хөнгөлүүлж чадалгүй цэл залуугаараа насан туршдаа хийсэн алдаандаа гэмшдэг атал улстөрийн нөлөө бүхий томчууд жил гаруй суугаад л хэрэг нь цагаадчихдаг жишиг манайд бий. Энэ жишгээр өнгөрсөн баасан гарагт хамгийн сүүлчийн улстөрч суллагдаж, томчуудын хэрэг тэр чигтэй цагаатав.

 
      2018-2020 он хар түүхтэй улстөрчдөд суудал нь өнцөгдсөн жил байсан гэдэг. УИХ-ын сонгуульд нэр дэвшигчийн мандатаа авсан улстөрчдийг хүртэл баруун, солгойгүй баривчилж, яллаж, олны өмнө шийтгэж байлаа. Улс төрийн баривчилгааны дуулианууд өрнөсөөр өнгөрсөн оны төгсгөл гэхэд шоронд Ерөнхий сайд асан гурав, салбарын сайд асан тав, УИХ-ын гишүүн асан хоёр хоригдож байсан юм.
 
Тухайлбал, Монгол Улсын 18, 25, 29 дэх Ерөнхий сайд буюу М.Энхсайхан дөрвөн жил зургаан сар, С.Баяр таван жил, Ж.Эрдэнэбат зургаан жилийн ялтай хоригдож байв. Мөн Аж үйлдвэрийн сайд асан Д.Эрдэнэбат дөрвөн жил зургаан сар, Сангийн сайд асан С.Баярцогт дөрвөн жил найман сар, Сангийн сайд асан Б.Болор гурван жил зургаан сар, Хөдөлмөр, нийгмийн хамгааллын сайд асан Н.Номтойбаяр таван жил таван сар, Шадар сайд асан Да.Ганболд нэг жил гурван сар, УИХ-ын гишүүн асан Д.Дамба-Очир гурван жил зургаан сар, УИХ-ын гишүүн асан Г.Солтан гурван жилийн ялтай шоронд байлаа. Одоо бүгд суллагдаж, улс төрийн ажилдаа ханцуй шамлан орцгоосон гэх сураг бий. 
 
          Түүгээр ч зогсохгүй, Монголын төрийн эсрэг гэмт хэрэг үйлдсэн гэгдэж байсан ч гаднын орон руу зугтсан гэх нэр сүүлийн хэдэн жил зүүсэн нөлөө бүхий улстөрчдийн хэрэг ч цагаадаж байгаа гэнэ. Тухайлбал, улс төрийн гэмт хэрэгтэн хэмээн олны өмнө цоллуулж байсан  Ерөнхий сайд асан Ч.Сайханбилэг, УИХ-ын гишүүн Бадамжунай нарын хэргийн хөөн хэлэлцэх хугацаа дуусгавар болж, тэд эх орондоо ирэх сураг дуулдаад буй. 
 
          Хэцүү нэртээс төвөггүйхэн салчихсан тэдэнд одоо хэргээ цагаадуулж, Монголын төрд орж ирэх нь өдрийн будаа идэхээс ч амархан болж хувирав бололтой. Харамсалтай нь, улстөрчдийн муур хулгана болж тоглодог энэ тоглоомны ард Монгол Улс эдийн засгаараа хохироод үлдэх нь тодорхой болов. Угтаа бол дээрх нэр бүхий эрхмүүд улсад хэдэн зуун сая, хэдэн арван арван тэрбумаар тоологдох асар их хэмжээний хохирол учруулсан, иргэдийн боломжийг хулгайлсан зэрэг дуулиантай хэргүүдэд нэр холбогдож байсан. Гэтэл нэг нь ч хохирлоо барагдуулалгүй толгойгоо элүүлж, ялаас чөлөөлөгдөв.
Ерөнхий сайд асан Ч.Сайханбилэг, УИХ-ын гишүүн Бадамжунай нарын хэргийн хөөн хэлэлцэх хугацаа дуусгавар болж, тэд эх орондоо ирэх сураг дуулдаад буй. 
Ийн шудрага шүүхээр яллуулж, төр, ард түмнийхээ өмнө өргөсөн тангаргаасаа буцсан, улсынхаа эсрэг гэмт хэрэг үйлдсэн хэмээж байсан нөлөө бүхий улстөрчид хуулийн цоорхойгоор суллагдаж, эгэл жирийн ардын хүүхдээр Монголын шорон буцаад дүүрэх нь. 
 

УЛСТӨРЧИД ЯЛААС МУЛТАРЧИХЛАА, ТЭД ТӨРД БУЦАЖ ИРЭХ ҮҮ
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188
[email protected]
2026 © Зохиогчийн эрх хуулиар хамгаалагдсан. Мэдээлэл хуулбарлах хориотой.