АТГ-аас УИХ-ын гишүүн асан Д.Оюунхоролыг залилангийн хэргээр шалгаж байсан билээ. Мөн эрх мэдэл албан тушаалаа урвуулан ашиглаж, нөхөртөө Богд уулнаас их хэмжээний газар ашиглах зөвшөөрөл олгосон гэх хэд хэдэн үндэслэлээр шалгаж байсан юм. Түүнчлэн прокурорын зөвшөөрөлтэйгөөр гэрт нь нэгжлэг хийж, ноцтой баримтуудыг хураан авсан гэдэг.

Тэрбээр хууль хяналтын байгууллагад шалгагдаж байхдаа танил талаа ашиглан өнгөрсөн оны аравдугаар сард  тусгай үүргийн онгоцонд билет захиалан нөхрийн хамт улсын хил даван зугтаасан талаар бид мэдээлсэн. Тэгвэл тэрбээр эх орондоо буцаж иржээ. Буцаж ирээд ч зогсохгүй Хөшигийн хөндийн бүтээн байгуулалтын бүрэн эрхт төлөөлөгчөөр томилогдсон байна.

Бид энэ талаар УИХ-ын гишүүн асан Д.Оюунхоролтой холбогдож, тодрууллаа. Тэрбээр “Би яг одоо Засгийн газрын хуралдаанд оролцож байна. Би эх орондоо шинэ жилийн дараа ирсэн. Ирээд удаж байна гэсэн үг. Одоогоор Монголдоо суурин амьдарч байна. Намайг АТГ-аас шалгаж байгаагүй. Надад ямар ч асуудал байхгүй” гэв.