Засгийн газрын ээлжит хуралдаанаар гаргасан шийдвэрийг танилцуулж байна. Энэ үеээр зам тээвэр, хөгжлийн сайд Л.Халтар "Засгийн газраас зам тээвэр, төмөр замын салбарт авч хэрэгжүүлж байгаа ажлын талаар танилцуулъя. Зүүнбаян-Тавантолгой чиглэлийн төмөр замын бүтээн байгуулалтын ажил ажилттай үргэлжилж байна. Тавантолгой-Гашуунсухайт чиглэлийн төмөр замын ажил амжилттай явж байна. Энэ ажил 2022 оны долдугаар сарын 1 гэхэд ашиглалтад орох төлөвлөгөөтэй байгаа. Үүний дараа дөрвөн том төсөл хэрэгжүүлнэ. Нэгдүгээрт, Зүүнбаян-Ханги Мандалын чиглэлийн төмөр замын асуудал байна. Энэ боомт нээгдснээр уул уурхайн бүтээгдэхүүн экспортод гарах хамгийн том түлхэц болно.

Дараагийнх Дорнод аймгийн Чойбалсан хотоос Эрээн цав хүртлэх 237 км зам, Чойбалсангаас Хөөт, Бичигт чиглэлийн зүүн босоо тэнхлэгийн төмөр замын ажилд орохоор шийдвэр гаргалаа. Гуравдугаарт, баруун босоо чиглэлийн Арцсуурь-Шивээхүрэн чиглэлийн ажил байна. Дөрөвдүгээрт, Богд хаан төмөр замын асуудал байгаа. Шинээр барих энэ төмөр зам нь 135 км шинэ төмөр зам барих бөгөөд зургаан зөрлөг гурван өртөөтэй 16.6 км хоёр хонгилтой, 19.3 сая куб.м газар шорооны ажилтай томоохон бүтээн байгуулалтын ажил эхэлнэ. 2021 оны наймдугаар сараас ажлаа эхлүүлнэ. Анхны хувилбар нь Багахангай өртөө байсан ч техникийн зардал өнтөр тул Манти өртөөтэй холбохоор болсон" гэлээ.