• Өнөөдөр 2025-12-29

Д.СУМЪЯАБАЗАР Нийслэлийн бүтцэд өөрчлөлт оруулж, шинэ баг бүрдүүлэх үү

2021-08-05,   931

      Нийслэлийн Засаг дарга бөгөөд Улаанбаатар хотын захирагч Д.Сумъяабазар сүүлийн үед нэлээд завгүй, ажил хэрэгч нэгэн болсон харагдана. Нэг хэсэг Ерөнхий сайдтай сүжирч, намын дарга болоход нь дэмжлэг үзүүлснийхээ дараа тэд хамтдаа МАН-ыг хамтран удирдах болсноор үндсэн ажилдаа орж, дор бүрнээ завгүй байх болов. 
Нийслэлийн бүтцэд нэлээд том өөрчлөлт оруулж, шинэ газар, хэлтэс байгуулна гэх төлөвлөгөө ч гаргасан гэх сураг байна
      Анх нийслэлийн Засаг даргаар томилогдож байхдаа “Би албан тушаал дээшлээд байна уу эсвэл доошлоод байна уу гэдгээ мэдэхгүй байна” хэмээн будилж байсан тэрбээр өнөөдөр эвээ олсон бололтой олны хэл амнаас холуур ажлаа хийх болжээ. 
Нэгэнт ажлын дөртэй болж учраа олох болсон хотын мээр өөрийн хүрээллээ “өөд нь татаж”, шинэ баг бүрдүүлнэ гэх бор шувуу Нийслэлийн Засаг даргын Тамгын газраар нисэх болов. 
    Ингэхдээ нийслэлийн бүтцэд нэлээд том өөрчлөлт оруулж, шинэ газар, хэлтэс байгуулна гэх төлөвлөгөө ч гаргасан гэх сураг байна. Д.Сумъяабазар УИХ-ын гишүүний бүрэн эрхээсээ татгалзан байж, нийслэлийн Засаг даргаар томилогдсон хэргийнхээ гавьяаг одоо л гаргах нь бололтой. Жил орчмын хугацаанд ажиллахдаа тэрбээр С.Амарсайханы ажиллаж байсан хуучин бүтэц дээр ирж, өнөөдрийг хүртэл тодорхой өөрчлөлт оруулаагүй, халаа, сэлээ ч хийлгүй ажилласан.
   
Нэгэнт төрийн албанд томилогдож, улсын нийслэл удирдах болсон хойно ойрын хэдэн хүнээ хажуудаа авсан нь багагүй хэл ам дагуулсан. Ингэхдээ “Нийслэлийн удирдлагууд Сонгинохайрхан дүүргийнхнээр дүүрэх нь” гэх шүүмжлэлүүд хэсэгтэй л хотын даргыг хямраасан. Ямар сайндаа л өөрийн ойрын хүн Ж.Сандагсүрэнг нийслэлийн нэгдүгээр орлогчоор томилж, хэдэн сар зүтгүүлсэн ч олны хэл амны “бай” болж, сольсон удаатай.   Ажлаа мэдэхгүй учраа олохгүйн дээр энэ мэтийн хэл ам Д.Сумъяабазарт дарамт болж байсан нь түүний үг үйлдлээс илэрхий харагддаг байв.

    Тэр үетэй харьцуулахад өдийд хотын дарга хэдийн ажилдаа гаршиж, халаа сэлээ хийсэн ч олны хэл амнаас айхааргүй зоригтой болсон гэхэд хилсдэхгүй. Тиймдээ ч тэрбээр нийслэлийн бүтцэд өөрчлөл оруулах том ажлыг эхлүүлэхээр бэлтгэл ажилдаа ороод байгаа гэнэ.  УИХ-ын хаврын чуулган завсарлахаас өмнө Нийслэлийн эрх зүйн байдлын тухай хуулийг шинэчлэн батлуулсан нь түүний хувьд том алхам болсон. 

1994 оноос хойш шинэчлэл хийгээгүй энэ хуульд гар хүрч, батлуулснаар хотын даргын эрх, үүргийг нэмэгдүүлж, нийслэл бие дааж нийгэм, эдийн засгийн асуудлаа шийдвэрлэх том боломжийг бий болгоод буй. Үе үеийн хотын дарга нар энэ хуулийг шинэчлэн боловсруулж, хуулийн төсөл өргөн барьдаг ч удаа дараа унаж байсан төслийг батлуулчих нь Д.Сумъяабазарын хувьд аз болсон. 

    Одоогоор нийслэлийн бүтцэд ямар өөрчлөлт орох нь тодорхойгүй байгаа гэнэ. 2019 онд нийслэлийн Засаг даргаар С.Амарсайхан ажиллаж байхдаа бүтэц, зохион байгуулалтад өөрчлөлт оруулж, хоёр агентлаг шинээр байгуулж, 12 байгууллагын нэршил өөрчлөн, нийслэл Засаг дарга зургаан орлогчтой байхаар зохицуулалт хийж байв. 
 
Ийн нийслэлийн бүтэц зохион байгуулалтад дахин өөрчлөлт оруулж, Д.Сумъяабазар өөрийнхөө хүмүүсийг багтаа авахаар зэхэж байгаа аж. Бүтэц зохион байгуулалт өөрчлөлт оруулж, нийслэлийнхэн нэлээд бужигнах нь бололтой.
 

Д.СУМЪЯАБАЗАР Нийслэлийн бүтцэд өөрчлөлт оруулж, шинэ баг бүрдүүлэх үү
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188
[email protected]
2025 © Зохиогчийн эрх хуулиар хамгаалагдсан. Мэдээлэл хуулбарлах хориотой.