Ерөнхийлөгч асан Х.Баттулгыг суудлаасаа буусан даруй хэд хэдэн хүн эх орондоо ирэхээр зэхэж, хилийн чанадад “гэгэлзэж” суугаа гэнэ. Үүний нэг нь Ерөнхий сайд асан Ч.Сайханбилэг аж. Тэрбээр эх орноосоо дайжаад гурван хавар өнгөрчээ. Энэ хугацаанд тэр хэд хэдэн удаа эх орондоо ирэхээ мэдэгдэж, хууль хяналтын байгууллагынханд “тайван” байхыг сануулж, ил захидал илгээж байлаа. Өөрөөр хэлбэл, хаа холын АНУ-аас үе үехэн сүржин мэдэгдэл хийж, “Би очно. Өөрийн биеэр мэдүүлэг өгнө” гэж хэлээд хууль хяналтын байгууллагынханд цаасан малгай өмсүүлж, өнөөдөртэй золгосон юм. Харин одоо, ирэх сард тэр эх орондоо ирэхээр төлөвлөж, тэр бүү хэл шинэ Ерөнхийлөгчөөс өршөөл эрэх ил захидлаа хүртэл бэлдчихсэн, ачаа бараагаа зэхэж суугаа гэх бор шувуу нисэж байна.

      Ерөнхийлөгч асан Х.Баттулгыг суудлаасаа буусан даруй хэд хэдэн хүн эх орондоо ирэхээр зэхэж, хилийн чанадад “гэгэлзэж” суугаа гэнэ

        Ерөнхий сайд асан Ч.Сайханбилэгийг 2015 оны тавдугаар сарын 18-нд “Оюу толгой” төслийн далд уурхайн бүтээн байгуулалт, санхүүжилтийн төлөвлөгөөг батлахдаа эрх мэдэл, албан тушаалын байдлаа урвуулан ашиглаж, илт хууль бус шийдвэр гаргаж, бусдад давуу байдал бий болгон хохирол учруулсан байж болзошгүй хэмээн үзэж, АТГ-аас шалгаж эхэлсэн байдаг. Хууль хяналтын байгууллагаас түүнийг дайчлан баривчилж, Шүүхийн шийдвэр гүйцэтгэх ерөнхий газрын харьяа цагдан хорих 461-р ангид нэг сар хорьж, батлан даалтад гаргаж байлаа. Шүүхээс түүнийг батлан даалтад гаргах шийдвэр гаргахдаа хилийг хориг хүртэл тавьсан юм.

        Харин Ч.Сайханбилэг эрүүл мэндийн шалтгаантай, БНСУ-д эмчлүүлэх шаардлагатай хэмээн хүсэлт гаргаж, улмаар Чингэлтэй дүүргийн шүүх түүнд тавьсан хилийн хоригийг цуцалж байлаа. Суллагдаад удаагүй байхдаа тэр дипломат паспорт ашиглан 2019 оны наймдугаар сарын 26-нд прокурорт мэдэгдэлгүйгээр Улаанбаатар-Сөүлийн онгоцоор Монгол Улсын хилээр гарч, АНУ-ыг зорьсон байдаг. Түүнийг эмчилгээ хийлгэхгүйгээр БНСУ-аар дамжин өнгөрч, өөр улсад очсон нь тодорхой болсон тул оргон зайлсан гэж үзэн, интерполоор эрэн сурвалжлуулах хүсэлт гаргаж, улмаар байршлыг тогтоосон билээ.

Суллагдаад удаагүй байхдаа тэр дипломат паспорт ашиглан 2019 оны наймдугаар сарын 26-нд прокурорт мэдэгдэлгүйгээр Улаанбаатар-Сөүлийн онгоцоор Монгол Улсын хилээр гарч, АНУ-ыг зорьсон байдаг.

    Үе үехэн сүржин мэдэгдэл хийж, Монголын ард түмнээр, тэр дундаа хууль хяналтын байгууллагынхныг “Очно” гэх ганцхан үгээр даажигнаж, суудаг Ч.Сайханбилэг хамгийн сүүлд Ерөнхийлөгч асан Х.Баттулгад ил захидал бичиж, гоморхлын хэдэн үг “чулуудаад” хэсэг сураггүй алга болсон. Тодруулбал, Х.Баттулгад зориулж, тэрбээр “Урд шөнө нойроо хугаслан Монголын шүүхийн, бишээ Ерөнхийлөгчийн халаасанд байсан шийдвэрийг сонслоо. Монгол Төрийн тэргүүний хувьд таныг хүндэтгэн гуайлах ёстой ч уучлаарай, ёстой чадахгүй нь. Баттулгаа чи сонс. Зэвүү дургүй хоёр зэрэг хүрч байна шүү, чамд.

       Бид байгаа юмыг байгаагаар нь шууд хэлэх ёстой. Хүмүүс тэрийг хэн хорьчихов, тэрний ард хэн байгаа бол гээд их эргэлздэг, янз бүрээр таамагладаг. Янз бүрийн хүмүүсийг харддаг. Одоо битгий эргэлз. Бүх юмны ард ганц эзэн л байгаа. Бүх “Шорон операци”-ийг ганц Маэстро л удирдаж байгаа. Тэр нь ганц Баттулга. Ямар зорилготой юм бэ. Эх орноос минь бүх гуравдагч хөршүүдийг, тэдний хөрөнгө оруулалтыг хөөн гаргах харийн хүний захиас биелүүлж байгаа талаар хангалттай ярьж бичиж байгаа тул түр орхиё. Харин ямар аргаар энэ зорилгоо биелүүлж чадаад байгааг нь би энд тайлбарлая” хэмээн ил захидлаа эхлүүлсэн байдаг.

Дубайн гэрээг байгуулахдаа “Асуудал үүсвэл хар толгойгоороо өөрөө хариуцна” гэж хэлээд алх цохисон Ч.Сайханбилэг өнөөдрийг хүртэл дайжсаар явна. Харин тэр одоо удахгүй эргэж ирээд шүүлгэх үү, шүүлцэх үү гэдэг нь тодорхой болох аж.