Нийслэлийн болон орон нутгийн эмнэлгүүдэд коронавируст халдварын үед нэн шаардлагатай нэг удаа 20 ам метр цэнэглэх хүчин чадалтай хүчилтөрөгчийн зөөврийн бэсрэг үйлдвэр, нэг удаа 10 ам метр цэнэглэх хүчин чадалтай баллон цэнэглэх байруудыг байрлуулж байна.

    Өнөөдрийн байдлаар нийслэлийн шинэ захиргааны байранд байрлах Яаралтай тусламжийн төв, Сонгинохайрхан, Баянгол дүүргийн Эрүүл мэндийн шинэ төв, Эх, хүүхдийн эрүүл мэндийн төвд тус бүр хоёр, Улсын III эмнэлэгт болон Дархан, Говь-Алтай, Булган, Завхан, Баянхонгор аймагт  тус бүр нэг үйлдвэр, нэг баллон цэнэглэх байрыг угсарч дуусчээ.

   Мөн Монгол-Японы эмнэлэгт нэг үйлдвэр, нэг баллон цэнэглэх байр буусан бөгөөд хүчилтөрөгчийн үйлдвэрийн суурь бэхжиж дууссаны дараа үйлдвэрийн холболт угсралтыг хийх аж. Цаашид бусад аймагт хүчил төрөгчийн баллон цэнэглэх байр байрлуулах ажлыг шат дараатай зохион байгуулах тухай УОК-ын Шуурхай штабаас мэдээллээ.