УИХ-ын чуулганы нэгдсэн хуралдаанаар “Монгол Улсын 2020 оны төсвийн гүйцэтгэл батлах тухай” Улсын Их Хурлын тогтоолын төсөл /Засгийн газар 2021.06.18-ны өдөр өргөн мэдүүлсэн, хоёр дахь хэлэлцүүлгийг хийж байна.

Хэлэлцүүлж буй асуудалтай холбоотой УИХ-ын гишүүд асуулт асууж, хариулт авч байна.

УИХ-ЫН ГИШҮҮН С.ГАНБААТАР: Өнгөрсөн хугацаанд 5.1 их наяд төгрөгийн зардал гаргачихаад МАН "Ковид-19" халдварын өмнө буулт өглөө. Өргөн хэрэглээний бараа бүтээгдэхүүний үнэ нэмэгдлээ. Мөн эрүүл мэндийн салбарын ажилтнуудын цалинг инфляцтай уялдуулж, үе шаттай нэмнэ гэсэн. Гэтэл үнийн өсөлт нь цалинг нь "идчихээд" байна. Эрүүл мэндийн салбарынхан найм хоног суулт зарласан ч шийдсэнгүй. Ардын нам үе үеийн сонгуулиар өгдөг амлалтаа биелүүлж чадах уу. 

УИХ-ЫН ГИШҮҮН Б.ПҮРЭВДОРЖ: Төсвийн зарлагын дэд хорооны хурал дээр МАН-ын гишүүд үг хэлж, асуулт асуудаггүй. Өөрөөр хэлбэл, эмнэлгийн ажилтны цалинг нэмэх асуудлыг Дэд хороо яриагүй. Хэлэлцэж байгаа энэ асуудал нь гүйцэтгэлийг хэлэлцэж байна. Төсвийн тодотголыг хэлэлцэх үеэр ярьсан эсэхийг мэдэхгү байна.

УИХ-ЫН ГИШҮҮН Ч.ХҮРЭЛБААТАР: Цар тахлын тархалт амаргүй байна. Болж байгаа, болохгүй байгаа зүйл ч байна. Улс төржүүлж байгаа зүйлүүд ч байна. Болж байгаа нэг зүйл бол Монгол Улс вакцинжуулалтыг маш сайн хийж байгаа шүү. Эрүүл мэндийн салбарын санхүүжилтийг шинэ тогтолцоо руу оруулж байгаа. Эмнэлгүүд удирдах зөвлөл гаргаж, санхүүжилтэй шийддэг болсон. Эрүүл мэндийн даатгалтайгаа уялдуулан санхүүжилтийн асуудлаа шийдвэрлэх боломжийг Эрүүл мэндийн тухай хуулиар олгосон. Одоо харин энэ чиглэлээр хурдтай ажиллах хэрэгтэй. Цар тахлын энэ үед хий улс төржөөд улс орон хөгжихгүй, коронагийн ард гарахгүй.