Цар тахлын үеийн эдийн засгийн уналт, алдагдлыг нөхөж, дахин сэргээх, хөгжүүлэх гаднын орнуудын бодлогууд сайн үр дүн үзүүлсэн. Гэсэн ч энэ долоо хоногийн эхлэлээс элхийн эдийн засгийн томоохон савлагаа үүсээд байгааг олон улсын эдийн засагчид тайлбарлаж байна.

           Мөн саяхан ОУВС-ын судлаачдын хийсэн дэлхийн орнуудын өрийн судалгаанд цар тахлын үе буюу өнгөрсөн гурван жилд бага орлоготой болон хөгжиж байгаа орнуудын өр буураагүй. Харин ч маш их хэмжээгээр нэмэгдсэн сөрөг дүн гарсан. Цар тахлын үед царцсан эдийн засаг дахин эргэлтээ олж эхэлж байх үеэр ийн суурь металлуудын үнэ огцом унасан нь эдийн засагт сөргөөр нөлөөлж ч болохоор байна.

Алтны үнэ сүүлийн хоёр долоо хоногийн хамгийн өндөн дүнгээр буурав

Зарим олон улсын хэвлэлээр “ОХУ Укрианы хилээс цэргийн хүчээ хэсэгчлэн татахаар болсон” гэх мэдээлэл түгсэнтэй холбоотойгоор алт, улаан буудайн үнэ унав.

           Украины асуудалтай холбоотойгоор ОХУ-ын экспорт саатна гэсэн арилжаачдын таамаг биеллээ олж, улаан буудайн үнэ 2.7 хувиар огцом буурч, алтны үнэ унц нь 1900 ам.доллар болжээ. Хамгийн сүүлийн мэдээллээр алтны спорт үнэ 0.11 хувиар буурч, 1851 ам.долларт хэлбэлзэж байна.

ОХУ, УКРАИНЫ ХУРЦАДМАЛ БАЙДАЛ СУУРЬ МЕТАЛЛЫН ҮНЭД ХЭРХЭН НӨЛӨӨЛСӨН БЭ

ОХУ-ыг Украин руу цэргээ оруулах эсэх, хэрэв хоёр орны хооронд дайн эхэлбэл эдийн засагт ямар нөлөө учруулах зэрэгт хүлээлтэй хоёр долоо хоног өнгөрч, Лондонгийн металлын бирж, Шанхайн фьючерсийн биржид суурь металлын үнэ “газарт” уналаа.

• Лондонгийн металлын биржид хөнгөн цагааны үнэ 0.6 хувийн буурч, тонн нь 3,186 ам.доллар
• Цайрын үнэ 1.2 буурч, тонн нь 22,955 ам.доллар
• Зэсийн үнэ гурван ам.доллароор унаж, тонн нь 9848 ам.доллар болсон байна.

Мөн зөвхөн суурь металлын үнэнээс гадна ОХУ, Украины хурцадмал байдалтай холбоотойгоор Шанхайн фьючерсийн биржийн гэрээнүүд уналттай байсан аж.

Хятад, Австралийн далайн боомтод коксжих нүүрсний үнэ буурч байна

Коксжих нүүрсний дотоодын нийлүүлэлт сайн байгаатай холбоотойгоор Хятад, Австралийн биржид  үнэ нь огцом унаж байна.

Хятадын Жинтан боомтод:

• Дээд зэрэглэлийн коксжих нүүрсний үнэ 1.68 ам.доллароор буурч, тонн нь 440.29 ам.доллар,
• Хатуу коксжих нүүрсний үнэ 15.15 ам.доллароор буурч, тонн нь 373.81 ам.доллар,

Австралийн Далримплын нүүрсний терминалд:

• Дээд зэрэглэлийн коксжих нүүрсний үнэ 1.68 ам.доллароор буурч, тонн нь 440.29 ам.доллар,
• Хатуу коксжих нүүрсний үнэ 2.08 ам.доллароор буурч, тонн нь 385.59 ам.доллар болжээ.

Төмрийн хүдрийн үнэ 8-10 хувиар буурчээ

           БНХАУ-д үнийн хэт хөөрөгдлийг зогсоох кампанит ажил эрчимжүүлсэнтэй холбоотойгоор төмрийн хүдрийн үнэ огцом буурсан байна. Бээжин өнгөрсөн жилийн түүхий эдийн инфляцийн сөрөг нөлөөллийг няцаахгүйгээр эдийн засгаа тогтворжуулах, гангийн хэрэглээг нэмэгдүүлэхийг хичээж байгаа ч, эсрэгээ Хятад болно гаднын дамын наймаачдын дундах “партизанын дайн” болж байгаа сурагтай.

           Олон улсын зах зээлд төмрийн хүдрийн үнийн өсөлт, бууралт нь эрэлттэй салшгүй холбоотой байдаг. Гэсэн ч судлаачдын дунд “партизанын дайн” гэж нэрлээд байгаа дамын наймаачдын үйлдэлтэй холбогдуулан эрэлт багасаж, Сингапурын биржид төмрийн хүдрийн үнэ 8.8 хувиар буурч, тонн нь 134.05 ам.доллар болжээ. Харин Даляний түүхий эдийн биржид 10 гаруй хувиар унасан байна.

“Их 20”-ийн бүлэг дэлхийн орнуудын Сангийн сайд, Төв банкны тэргүүнүүдтэй уулзана

Дэлхийн хөгжингүй эдийн засагтай орнуудаас бүрдэх “Их 20”-ийн бүлэг өнөөдөр, маргааш буюу хоёрдугаар сарын 17-18-нд дэлхийн орнуудын Сангийн сайд, Төв банкны тэргүүнүүдтэй хийх анхдугаар уулзалтаа зохион байгуулна.

           “Их 20”-ийн бүлгийг 2022 онд Индонези Улс даргалж байгаа бөгөөд уулзалтаар үүсээд байгаа нөхцөл байдалтай холбоотойгоор олон улсын инфляц, бодлогыг хэвийн болгох, дижиталжуулах тал дээр анхаарч, болзошгүй үнийн хэт хөөрөгдлөөс сэргийлэхэд анхаарах гэнэ.