Өнгөрсөн зун тасралтгүй хоёр, гурав хоног бороо орсны улмаас нийслэл хот үерт автаж, олон өрх, аж ахуй болон үйлчилгээний байгууллага хохирсон нь нууц биш. Үүнтэй холбоотойгоор эрх мэдэлтнүүд шалгагдаж, зөвшөөрөлгүй барьсан барилгуудыг нурааж эхэлсэн билээ. Харин энэ хаа сайгүй ихээхэн хэмжээний цас орж, зуд нүүрлээд буй. Тиймээс зудын дараах зуд буюу шар усны хаалга тогшиж эхэллээ. Нийслэл хотын гудам, жалганд овоорсон хог, хаягдал урсаж, шавар шавхай болсон автомашин хаа сайгүй холхих болов. Энэ жил шар усны үеэр аюулын хэмжээнд хор хохирол учруулж магадгүй байна. Ойрын хэдэн жил ороогүй их цасны ус удахгүй жалга, судгаар хоржигнон урсах нь ээ. Энэ тухай Хотын дарга Х.Нямбаатар "Шар усны үерийн бодитой аюул, эрсдэл бий болчихлоо. Халиа, тошин шар усны үерийн аюул “шар” түвшинд байна. Энэ жил 1991 оноос хойших цаг агаарын олон жилийн дунджаас температурын хэлбэлзэл хамгийн өндөр байгааг мэргэжилтнүүд хэлж байгаа. Ус цаг уурын Эрдэм шинжилгээний хүрээлэн шар усны үер болох эрсдэл “маш өндөр” гэх бичгийг ирүүлсэн. Иймд тэргүүн ээлжид Сэлбэ голын ай сав газрын мөсийг зөөж, Сонсголонгийн гүүрнээс баруун тийш гаргаж буулгаж байна” гэх мэдээллийг өгсөн билээ.

Ус цаг уурын Эрдэм шинжилгээний хүрээлэн шар усны үер болох эрсдэл “маш өндөр” гэх бичгийг ирүүлсэн. 

              Шар усны үер нь нийслэл хот гэлтгүй уул нурууд ихтэй хөдөө орон нутагт элбэг тохиолддог. Иймд  гуу жалганд хаягдсан малын сэг зэм болон гэр хороолол, нүхэн жорлонгуудын халдваргүйжүүлэлт хийхгүй бол  агаар, дуслын замаар дамжин нян өвчин ихээр түгдэг байна. Мөн шар усны үерт өртөх  эрсдэлт  байдлыг  гэр хорооллын айлууд өртөх нь элбэг. Учир нь, ахуйн хог хаягдал, үнс нурмаа шөнө оройн цагаар үерийн далан, суваг руу асгадаг нь  үерийн усны нэвтрэх чадварыг бууруулж халиа үүсгэж ойр орчмын айлуудыг үерт автуулах эрсдэлд оруулдаг байна.

              Монголд энэ жил сүүлийн 60 жил буюу 1975 оноос хойш ороогүй их цас орж, дийлэнх нутгаас зудын нөхцөл байдалтай байгаа. Тухайлбал, улсын хэмжээнд 190 мянга орчим малчин өрх байдгийн 72 мянга гаруйд нь зудын бодит аюул тулгарч, хүндэрсэн нөхцөл байдалтай байна. Мөн албаны мэдээллээр 2.1 сая мал хорогдсон тоо баримт бүртгэгдээд байгаа бөгөөд Засгийн газраас гаргасан шийдвэрийн дагуу УОК-оос зургаан Ажлын хэсэг гарган өвөлжилтийн нөхцөл байдал хүндэрсэн орон нутагт ажиллаж буй. 

Ойрын хэдэн жил ороогүй их цасны ус удахгүй жалга, судгаар хоржигнон урсах нь ээ

         Уг шийдвэрийг гаргасан Засгийн газрын хуралдаанаар яригдсан асуудлуудын нэг нь шар усны үер байсан. Сүүлийн 60 жилд ороогүй их цас орж, хөрсний усны хэмжээ нэмэгдсэнтэй холбоотойгоор Монголын дийлэнх нутагт халиа, тошин үүссэн бөгөөд урьд өмнөх жилүүдэд яригдаж ирсэн шар усны үер бодит аюул болсон. Тэгвэл Засгийн газрын хуралдаанаар учирч болзошгүй эрсдэлээс урьдчилан сэргийлэхийн тулд шар усны үер, өвөлжилт хүндэрсэн аймгуудад малын сэг, зэм устгахад 200 сая төгрөг зарцуулахаар болсон талаар БШУ-ы сайд Л.Энх-Амгалан мэдээлсэн. Гэсэн ч шар усны үерийн асуудал Засгийн газрын танхимд дөнгөж яригдаж эхлээд байхад нь танхимын хэд хэдэн сайдын бүрэлдэхүүнтэй Ажлын хэсэг орон нутаг руу томилогдон ажиллаж байгаа юм. Одоогоор сайдуудаар ахлуулсан Ажлын хэсэг өвөлжилт хүндэрсэн орон нутагт халдварт өвчин гарахаас сэргийлж, малын сэг, зэмийг устгах, хүнд нөхцөл байдалд байгаа малчин өрхүүдэд эмийн багц тараах ажилтай яваа. Гэсэн ч нийслэлдээ үлдсэн шар усны үерийн бодит аюул тулгараад байгаа олон мянган өрх ард нь хүлээгдэж байгаа гэдгийг санууштай.

Иймд айл өрх, аж ахуй байгууллага  шар усны аюулаас урдчилан сэргийлэхгүй бол шар ус аюулын харанга дэгдээхэд ойрхон байна.