• Өнөөдөр 2024-03-29

Ерөнхийлөгчийнх жижиг, Сангийн сайдынх том уу

2021-01-11,   955

-ЧАГТЫГ ХЭРХЭН ТАЙЛАХ БОЛ-

           Ерөнхийлөгч оны өмнөөс эхлээд “Би Монголын өрх бүрд нэг сая төгрөг өгмөөр байна” хэмээж буй. Үүнд нь Сангийн сайд Ч.Хүрэлбаатар сурсан зангаараа янгинатал чагт тавьсаар байгаа.

ЧАГТ 1

          Анх дээрх саналыг гаргахад нь л “Улсад тэгж тараах мөнгө байхгүй ээ. Таны гаргасан саналууд ерөнхийдөө Засгийн газрын хэрэгжүүлж байгаа ажлуудтай давхцаад байна. Гэхдээ таны саналуудыг ажил хэрэгтээ оруулсан гэж бодоорой. Харин нэг сая төгрөг тараах асуудлыг бол хүлээж авах боломжгүй” гэсэн утгатай хариулт өгөөд зогсож байлаа. Үүнээсээ гуравхан хоногийн дараа “Засгийн газар ирэх долдугаар сарын 1 хүртэл ийм, тийм хэрэглээний төлбөрийг 100 хувь чөлөөллөө” хэмээгээд, бөхөөр бол тэр Ерөнхийлөгчийг давж ойчсон билээ.

ЧАГТ 2

         Дээрх явдлаас хойш 20-оод хоног тэссэн Ерөнхийлөгч он солигдох мөчид “Нэг сая төгрөг өрх бүрд олгох саналаа ахин дэвшүүлж байна аа. Энэ амлалтаа оффшороос оруулж ирсэн мөнгөөрөө болгох бүрэн боломжтой болсон” гээд авсан. Хэвлэл мэдээллийнхэн төдийгүй ард иргэд “Ашгүй дээ, оффшороос хэдэн зуун мянган ам.доллараа аваад ирж. Төрийн мөнгийг гаднын улсад аваачиж хадгалсан хүмүүс нь хэн юм бол” хэмээн мөшгөж эхэлсэн ч хууль хяналтынхан төдийгүй албаныхан “Оффшороос орж ирсэн мөнгө байхгүй ээ. Шалгагдаж байгаа хүн ч байхгүй” гэх хариултыг давтаж гарав.

 Ерөнхийлөгч оны өмнөөс эхлээд “Би Монголын өрх бүрд нэг сая төгрөг өгмөөр байна” хэмээж буй. Үүнд нь Сангийн сайд Ч.Хүрэлбаатар сурсан зангаараа янгинатал чагт тавьсаар байгаа

ЧАГТ 3

            Ерөнхийлөгч “Надад ийм ийм боломж байна. Ийм учраас итгээрэй. Би өрх бүрд сая төгрөгийн дэмжлэг заавал үзүүлнэ ээ” гэж тайлбарлахаар өчигдөр МҮОНРТ-ийн шууд эфирт очсон боловч МАН-ынхан тэр ярилцлагыг МҮОНРТ-ийн шинэ дарга дээр амжилттай фокуслуулж чадлаа. Нүүр ном, твиттер, цахим сайтууд гээд байж болох бүх сувгаар Ерөнхийлөгчийн юу ярьсныг бус, “МҮОНРТ-ийн захирал шууд ярилцлагыг хөтөлж байгаа нь тэнэг хэрэг. Ууган телевизийн туршлагатай, мэдлэгтэй сэтгүүлчдийг доромжилсон явдал боллоо. Асууж байгаа нь, инээж байгаа нь, хөдөлж байгаа нь" гэх мэтээр ярилцлагын гол асуудлыг бус, ярилцлага авагч дээр олон нийтийн анхаарлыг бүрэн аваачиж чадлаа.

         Хамгийн гол нь өнөөдрийн байдлаар үнэхээр оффшор бүсээс өрх бүрд сая төгрөг тараах хэмжээний мөнгө битгий хэл, хэдэн ам.доллар ч орж ирээгүй нь МҮОНРТ-ийн захиралтай хийсэн ярианаас нь анзаарагдаад авсан. Үүнийг нь ч Сангийн сайд Ч.Хүрэлбаатар гялс өлгөн авч, нүүр номдоо “Зөвхөн Төрийн сан төдийгүй Монголд оффшорын гэгдэх мөнгө огтхон орж ирээгүй гэдгээ Ерөнхийлөгч сая ярилцлага өгөхдөө батлаад хэлчихлээ. “Монголбанк болон хууль хяналтын байгууллагынхнаас ”Оффшорын мөнгө” орж ирсэн үү” гэж асуухаа одоо больчих оо. Худал хэлж хам хэрэгтэн болохоосоо айж байгаа шүү дээ, тэд. Харин “Оффшорын мөнгө” нэрээр Монголбанкаар мөнгө хэвлүүлж тараалгавал төгрөгийн ханш 2012-2016 онд хоёр дахин унасан түүх давтагдана. Цалин, тэтгэврийнх нь худалдан авах чадвар хоёр дахин унасан гашуун туршлагаа монголчууд мартаагүй, мартах ч үгүй. Байхгүй мөнгийг тараана гэж юу байдаг юм бэ” хэмээн бичжээ.

Ард иргэд “Ашгүй дээ, оффшороос хэдэн зуун мянган ам.доллараа аваад ирж. Төрийн мөнгийг гаднын улсад аваачиж хадгалсан хүмүүс нь хэн юм бол” хэмээн мөшгөж эхэлсэн ч хууль хяналтынхан төдийгүй албаныхан “Оффшороос орж ирсэн мөнгө байхгүй ээ. Шалгагдаж байгаа хүн ч байхгүй” гэх хариултыг давтаж гарав

         Ерөнхийлөгчийн мулталсан чагт бүрийг МАН-ынхан сурмаг гэгч нь буцаан түгжиж байгааг дээрх үйл явдлууд харуулж буй. Ард түмэн ч “МАН-ын түгжсэн чагтыг Ерөнхийлөгч хэрхэн мултлах нь вэ” хэмээн анхааралтай харж, олонх нь хүлээж байгаа ч сүйдтэй өөрчлөлт гарахгүй байсаар Ерөнхийлөгчийн сонгуультай золгож мэдэхээр байна. Учир нь, Ерөнхийлөгчийн амлаад байгаа өрх бүрд олгох нэг сая төгрөг Ерөнхийлөгчийн ч хувьд, МАН-ынхны ч хувьд ирэх Ерөнхийлөгчийн сонгуулийн хэрүүлийн алим, ард түмнийг шилний цаанаас чихэр долоолгох "хамтарсан" тактик байх талтай. Сонгуулийн хугацаа эхэлтэл энэ маягаар нэг нь өгнө, нөгөөх нь өгөхгүй хэмээсээр, нөгөө талд цар тахалд туйлдсан ард иргэд “Бухын дордохыг харж үнэг турж үхэх”-ийн үлгэр болж байсаар сонгуулийн өмнөхөн тэд дундаасаа өнөөх сая төгрөгөө тараахыг ч үгүйсгэх аргагүй. Хамгийн тодорхой харагдаж байгаа зүйл нь, оффшор бүсээс мөнгө оруулж ирвэл гавьяаг нь Ерөнхийлөгч дангаараа бус, Засгийн газартай хамт хүртэх нь, мөнгө тараавал Ерөнхийлөгчийн санаачилгыг Засгийн газартай хамтатгасан байдлаар шийдэх нь сая өрнөсөн бүх үйл явдлаас ойлгомжтой байна.

      Өөрөөр хэлбэл, цар тахал эдийн засаг, бизнесийн орчныг тэр чигт нь сөхрүүлж байгаа ч монголчуудад цаашид Ерөнхийлөгчийг ч, Засгийн газрыг ч, өөр хэн нэгнийг ч ямар нэг юм өгнө, тараана гэж горьдолгүй, “Ковид-19”-ийн хүнд сорилт бүхий энэ цаг үеийг өөрсдийнхөөрөө, урьдынхаараа болгож, туулахаас өөр сонголт байхгүй. Хэн ч, ямар ч тэтгэмж, дэмжлэгээ “Цар тахлын үед дэм болох гэсэн юм” хэмээн хариу нэхэхгүйгээр өгөхгүй нь дээрх үйл явдлаас тун тодорхой байгаа биз. Өнөөх л танил арга, сонгуулийн өмнөх пи ар, тактик яг л бахь байдгаараа бидний өмнө ирснийг сэхээрэх цаг иржээ. Өмнөхөөс ялгаатай нь, “Ковид-19” цар тахлын хүнд үе таарч буй.       Төгсгөлд нь, одоогийн дүгнэлтээр Ерөнхийлөгчийн өрх бүрд тараахаар зүтгэж буй нэг сая төгрөгийн санал жижиг, Сангийн сайдын Засгийн газартайгаа хамтран хэрэгжүүлж буй элдэв хэрэглээний төлбөр тэглэж байгаа асуудал том гэх яриа, харьцуулалт хэвлэлээр дүүрэн “жиргэгдэж” байгаа ч цаг хугацааны эцэст хэнийх нь жижиг, хэнийх нь том байсан нь тодорхой болох биз ээ.

Цар тахал эдийн засаг, бизнесийн орчныг тэр чигт нь сөхрүүлж байгаа ч монголчуудад цаашид Ерөнхийлөгчийг ч, Засгийн газрыг ч, өөр хэн нэгнийг ч ямар нэг юм өгнө, тараана гэж горьдолгүй, “Ковид-19”-ийн хүнд сорилт бүхий энэ цаг үеийг өөрсдийнхөөрөө болгож туулахаас өөр сонголт байхгүй


Ерөнхийлөгчийнх жижиг, Сангийн сайдынх том уу
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 1
  • Сэтгэгдэл үлдээсэн: 2021-01-13 14:39:06
    Tngvvd: boow ni uu
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188