Цахим үндэстэн биш цар тахалтай үндэстэн болчихлоо, Б.Болор-Эрдэнэ дарга аа

2021-09-20, 1668

Ерөнхий сайд Л.Оюун-Эрдэнэ, Харилцаа холбоо, мэдээллийн технологийн газрын дарга Б.Болор-Эрдэнэ нар “Цахим үндэстэн” нэрийн дор Үндэсний соёл амралтын хүрээлэнд гурван хоногийн турш нүсэр шоу зохиож, өчигдөр шөнө сүр дуулиантайгаар хаав . “Цахим үндэстэн-2021” шоуны эхний өдөр буюу баасан гарагт есөн хүн, бямба гарагт 13 хүн, ням гарагт 12 нас барлаа. Өөрөөр хэлбэл, Ерөнхий сайд нь Харилцаа холбоо, мэдээллийн технологийн даргатайгаа нийлээд “Цахим үндэстэн” хэмээн “шоудсан” гурав хоногт цар тахлаар 34 хүн амиа алджээ. “Цахим үндэстэн” биш “Цар тахалтай үндэстэн” болчихоод байгааг тэд даанч мэдсэнгүй.

Тэгвэл цар тахлын цөвүүн цаг үеийг үл тоон, НОК-ын эсэргүүцсэн шийдвэрийг үл харгалцан хэдэн зуун хүн бөөгнөрүүлж, нүсэр арга хэмжээ зохион байгуулсан Харилцаа холбоо, мэдээллийн технологийн дарга Б.Болор-эрдэнэ гэгч ер нь хэн бэ.

Б.БОЛОР-ЭРДЭНЭ 18 НАСТАЙДАА АЗИЙН ХӨГЖЛИЙН БАНКНЫ МЭРГЭЖИЛТЭН, 26 НАСТАЙДАА Л.ОЮУН-ЭРДЭНИЙН ЗӨВЛӨХ БАЙСАН

Б.Болор-Эрдэнийн намтрыг нь харвал, 14 настайдаа Ерөнхий боловсролын сургуулиа, 18 настайдаа их сургуулиа төгсжээ. Улмаар 18 настайдаа Азийн хөгжлийн банк, 19 настайдаа Мянганы сорилтын сан, 20 настайдаа Дэлхийн банкинд ажиллажээ. Сонирхолтой нь, 18-20 насандаа ингэж дэлхийн хэмжээний байгууллагуудад ажиллаж байх зуураа БНСУ-ын их сургуулийг төгсөж амжжээ. Улмаар 24 настайдаа Английн Засгийн газарт судлаач, 26 настайдаа Ерөнхий сайд Л.Оюун-Эрдэнийн Хөгжлийн бодлого хариуцсан зөвлөх, 27 настайдаа Харилцаа холбоо, мэдээллийн технологийн газрын дарга болжээ. Монгол Улсын хөгжлийн төлөвлөгөөг 2050 он хүртэл гаргачихсан гэж боть ном хүртэл хэвлүүлж сайрхаад байсан Л.Оюун-Эрдэнэ үнэндээ 26 настай Б.Болор-Эрдэнээс хөгжлийн бодлогын зөвлөгөө авдаг байж л дээ. Гайхмаар төгс намтар биш гэж үү.

Боловсрол: 2007-2011 онд Хүмүүнлэгийн ухааны их сургуулийг Олон улсын харилцааны бакалавр, 2011-2014 онд БНСУ-ын Хандон Глобал их сургуулийг Бизнесийн удирдлагын магистр, 2017 онд Оксфордын их сургуулийг Төрийн удирдлагын магистр зэрэгтэй төгссөн.

Ажилласан байдал: 2011-2012 онд Азийн хөгжлийн банкны төслийн мэргэжилтэн, 2012 онд Мянганы сорилтын санд туслах мэргэжилтэн, 2013 онд Дэлхийн банкны төслийн хяналт, шинжилгээ, үнэлгээний мэргэжилтэн, 2017 онд Их британийн Нэгдсэн Вант улсын Засгийн газрын Анализ шинжилгээний газарт судлаач, НҮБ-ын Хүнс, хөдөө аж ахуйн байгууллагад гэрээт зөвлөх, 2018 онд Дэлхийн банкны Австрали улс дахь салбарт гэрээт зөвлөх, 2019 онд Засгийн газар, Английн Оксфордын их сургуультай хамтарсан “Цахим эрин дэх Монгол Улс” төслийн ерөнхий зохицуулагч, ЗГХЭГ-ын дарга Л.Оюун-Эрдэнийн Хөгжлийн бодлого хариуцсан зөвлөх, 2020 онд ЗГХЭГ-ын Цахим хөгжлийн үндэсний хорооны ажлын албаны дарга, 2020 оны долдугаар сараас Харилцаа холбоо, мэдээллийн технологийн газрын даргаар ажиллаж байна гэж намтартаа бичжээ.

Б.БОЛОР-ЭРДЭНЭ 944 САЯ ТӨГРӨГИЙН ОРОН СУУЦТАЙ

Харилцаа холбоо, мэдээллийн технологийн газрын дарга Б.Болор-Эрдэнэ АТГ-т мэдүүлсэн Хөрөнгө орлогын мэдүүлгийг нь харвал жилд 47 сая төгрөгийн орлоготой гэж мэдүүлжээ.

Тэгсэн атлаа 944 сая төгрөгийн үнэ бүхий гурван орон сууц, нэг зуслангийн байшинтай. 188 сая төгрөгийн үнэтэй Ланд круйзер-200 автомашинтай. 365 толгой малтай. 50 сая төгрөгийн үнэ бүхий газар, 50 сая төгрөгийн үнэт эдлэлтэй. Банк, санхүүгийн байгууллагад 284 сая төгрөгийн хадгаламжтай гэжээ. Мөн “Ард даатгал”ХК-д хувьцаа эзэмшдэг гэж мэдүүлсэн байна.

Б.БОЛОР-ЭРДЭНИЙГ Л.ОЮУН-ЭРДЭНЭТЭЙ "ХОЛБОСОН" "АКСЕСС СОЛЬЮШИНС" ХХК

Харилцаа холбоо, мэдээллийн технологийн газрын дарга Б.Болор-Эрдэнэ Хөрөнгө орлогын мэдүүлэгтээ дурдаагүй ч хувьдаа “Аксесс сольюшинс” ХХК-тай аж. Уг компаниа 2018 оны гуравдугаар сард байгуулжээ. Хонь, ямаа өсгөх, аялал жуулчлал, худалдааны зуучлал, бизнесийн зөвлөгөө, гадаад худалдаа, нано технологийн судалгааны чиглэлээр үйл ажиллагаа явуулна гэж улсын бүртгэлд бүртгүүлсэн байна.

Гэхдээ нэг сонирхолтой үйл явдал болжээ. Тодруулбал, Английн Оксфордын их сургууль, дэлхийн толгой баяны “Билл, Мелинда Гейтс” сан хамтарч хөгжиж буй орнуудын эдийн засгийн өсөлтөд технологийн хөгжлийг хэрхэн ашиглах талаар судалгаа хийх зорилгоор “Технологийн хөгжлийн комисс” гэгчийг 2018 онд байгуулжээ. Ингээд тус комисс Монгол, Өмнөд Африк, Этиоп улсыг сонгон судалгааны төслөө хэрэгжүүлэхээр болсон байна. Өөрөөр бол, “Монгол Улс технологийн хөгжлийг ашиглаж эхлэхэд бэлэн байна уу” гэдгийг судлахаар болсон гэсэн үг. Үүнийг нь манай улсын Засгийн газар дэмжиж, “Цахим эрин дэх Монгол Улс” нэрийн дор уг төслийг хэрэгжүүлэхээр болжээ. Тухайн үед “Цахим эрин дэх Монгол Улс” төслийн ерөнхий зохицуулагчаар Б.Болор-Эрдэнэ ажилласан бол судалгаа гүйцэтгэгчээр “Аксесс сольюшинс” ХХК ажиллаж, хамтран гүйцэтгэгчээр Засгийн газар, Харилцаа холбоо, мэдээлэл технологийн газар ажилласан байна. Харилцаа холбоо, мэдээллийн технологийн газрын дарга Б.Болор-эрдэнэ өөрөө төслийн ерөнхий зохицуулагчаар, хувийн компани нь гүйцэтгэгчээр ажилласан гэсэн үг. Тухайн судалгааг хэдэн төгрөгийн санхүүжилтээр гүйцэтгэсэн тухай мэдээлэл хараахан алга байна.

Улмаар Оксфордын их сургууль, “Билл, Мелинда Гейтс” сан, “Аксесс сольюшинс” ХХК манай улсад “Цахим эрин дэх Монгол Улс” судалгааны төслийг хэрэгжүүлснийхээ дараа 2019 оны есдүгээр сарын 17-нд уг төслийн судалгааны тайлан, бодлогын зөвлөмжийг танилцуулах “Цахим эрин дэх нүүдэлчид” олон улсын бага хурлыг зохион байгуулж байв. Тухайн үед одоогийн Ерөнхийлөгч У.Хүрэлсүх, Шадар сайд С.Амарсайхан нар тус хуралд оролцож, “Монгол Улс цахим улс болоход ойрхон байна” хэмээцгээж байлаа.

Одоогийн Ерөнхий сайд Л.Оюун-Эрдэнэ, Харилцаа холбоо, мэдээллийн технологийн газрын дарга Б.Болор-Эрдэнэ нарын хоршил энэ цаг үеэс эхлэлтэй аж. Өөрөөр хэлбэл, “Цахим шилжилт”, “Цахим үндэстэн” зэрэг үгс, санаа, төсөл анхнаасаа Л.Оюун-Эрдэнийн ч, Б.Болор-Эрдэнийн ч уураг тархинд бүрэлдсэн шинэ санаа бус, олон улсын төсөл байсан гэдэг нь эндээс харагдана. Харин уг олон улсын төслийг Л.Оюун-Эрдэнэ, Б.Болор-Эрдэнэ нар тун гярхай өлгөн авч, өөрсдийн амбицаа болгосон гэсэн үг.

Сонирхуулахад, Б.Болор-Эрдэнийн "Аксесс сольюшинс" ХХК нь Монгол Улсын Хөгжлийн банктай тэргүүтэй олон байгууллагуудтай гэрээлж байжээ.

Л.ОЮУН-ЭРДЭНЭ ЗӨВЛӨХӨӨС ХХМТГ-ЫН ДАРГА БОЛЖ ДЭВШСЭН Б.БОЛОР-ЭРДЭНЭ

"Цахим эрин дэх Монгол Улс" олон улсын судалгааны төслийн Ерөнхий зохицуулагчаар ажиллаж, судалгааг нь хувийн компаниараа хийлгэсэн Б.Болор-Эрдэнэ 2019 оноос Л.Оюун-Эрдэнэтэй их ойр ажиллаж эхэлжээ. Тэрбээр, Л.Оюун-Эрдэнийн Хөгжлийн бодлого хариуцсан зөвлөх болж, дараа нь ЗГХЭГ-ын Цахим хөгжлийн үндэсний хорооны ажлын албаны дарга, улмаар Харилцаа холбоо, мэдээллийн технологийн газрын дарга болсон. Харилцаа холбоо, мэдээллийн технологийн газрын дарга болсныхоо дараа Ерөнхий сайд Л.Оюун-Эрдэнийн гол амбиц "Е-Mongolia" системийг ашиглалд оруулж, өнгөрсөн жил гаруй хугацаанд нэг тэрбум гаруй төгрөгийг зөвхөн "E Mongolia" системийн сурталчилгаа, боршур, тараах материал, хурал зөвлөгөөн, хөгжүүлэлтэд зарцуулаад байгаа. Шилэн дансны мэдээллээр Харилцаа холбоо, мэдээллийн технологийн газрын дансаар хэдэн тэрбум төгрөг "Цахим" нэрийн дор урсаж буй.

Цахим үндэстэн биш цар тахалтай үндэстэн болчихлоо, Б.Болор-Эрдэнэ дарга аа

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 4

Сэтгэгдэл үлдээсэн: 2021-09-20 14:47:24

бө: АТГ ?
Сэтгэгдэл үлдээсэн: 2021-09-20 13:48:10

zochin: chaldvar ,virus taraagch ardiin daisan Bolorerdene ESaidtai thug ogchruulach estoi, Chaldvar aimaaar
Сэтгэгдэл үлдээсэн: 2021-09-20 13:40:37

Зочин: Мундаг боловсролтой охин бн даа уг нь
Сэтгэгдэл үлдээсэн: 2021-09-20 11:29:16

зочин: энэ эргүү хэтэрнээ олон залуус халдвар авсан бол яанаа

Шинэ мэдээ

Нийтлэлчид