• Өнөөдөр 2024-03-29

П.НАРАНБАЯР:Нийслэл ирэх оны төсвөө оновчтой баталж чадаагүй

2022-12-07,   450

      Нийслэлийн ирэх оны төсвийг ИТХ-аар хэлэлцэн, баталсан билээ. Уг төсөв оновчтой батлагдсан эсэх талаар Нийслэлийн ИТХ-ын төлөөлөгч, Хүн намын гишүүн П.Наранбаяртай ярилцлаа.

 

-Нийслэлийн ИТХ-аар 2023 оны нийслэлийн төсөв хэлэлцэн баталлаа. Та ИТХ-ын хурлын гишүүний хувьд энэ төсөл дээр өөрийн санал бодлоо хэр тусгаж чадсан бэ?

            -Бид энэ удаагийн төсөв дээр хүний хөгжлийн бодлого, боловсрол, эрүүл мэнд дээр анхаарч ажиллахыг зорьсон. Нийслэл ирэх оны төсвөө оновчтой батлаж чадаагүй. Нийслэлийн эрүүл мэнд, боловсрол гэсэн хоёр арга хэмжээ авч хэрэгжүүлдэг. Энэ арга хэмжээнд жил бүр 600 сая төгрөг төсөвлөж ирсэн. Харин энэ жил төлөөлөгчид ярилцаж байгаад төсвийг нэг тэрбум болгож нэмэгдүүлсэн. Энэ  нь Ерөнхий боловсролын сургуулийн сурагч, цэцэрлэгийн хүүхэд, эрүүл мэндээ үзүүлж буй иргэд, эмнэлгийн ажилчдад шууд хүрэх арга хэмжээ юм. Миний хувьд ИТХ дээр саналаа хангалттай хэлсэн ч тусгаж, чадаагүй зүйлс байгаа. Жишээлбэл, хүнсний аюулгүй байдал тэр дотроо Мэргэжлийн хяналтын байгууллага татан буугдаж байгаа энэ үед Мал эмнэлгийн лаборатори нэн шаардлагатай байна. Энэ асуудалд нэлээн саналаа  хэлж, төсөв батлуулахад дээр анхаарсан ч,  дэмжигдээгүй. Угтаа нийслэлд орж  буй мах, махан бүтээгдэхүүн дээр хяналт тавих,  шинжлэх мал эмнэлгийн лаборатори нэн шаардлагатай. Хүнсний аюулгүй байдалд анхаарах нь өдөр ирэх тусам багасаж байна гэж харж байна даа. Мөн "Улаанбаатар лифт" ОНӨААТҮГ гэж  компани бий. Нийслэлийн хэмжээнд 130 гаруй яаралтай шинэчлэх шаардлагатай, ашиглаж болохгүй гэсэн заалттай лифт байгаа. Үүнийг бүрэн шинэчлэхэд 1.5 тэрбум төгрөг хэрэгтэй. Харин энэ жил зөвхөн таван лифт л засахад 500 сая төгрөг төсөвлөсөн.

-Эдийн засгийн хүнд байгаа энэ үед төрөөс төсвийг алдагдалгүй батлах бодлого баримталж байгаа. Тэгвэл  Нийслэлийн төсөв энэ бодлогод нийцэж чадсан уу. Энэ  тал дээр таны байр суурь ямар байгаа вэ?

         -Нийслэлийн ажилтнуудын цалин, барилга ашиглалтын зардал,  татвар зэрэг урсгал зардал илт нэмэгдсэн. Бүтцээ томруулсантай холбоотой энэ асуудал үүсээд байгаа юм. Тиймээс үр ашиггүй, ажил үүргийн хувьд төстэй нэгж, агентлагуудаа хооронд нэгтгэх нь зүйтэй.

-Нийслэлийн Засаг дарга Д.Сумъяабазар зарим төслөө эргүүлэн татсан байсан. Тодруулбал, Сэлбэ голын төслийн нэгжийг буулгасан. Энэ талаар та юу гэж бодож байна вэ?

            -Миний хувьд энэ төслийг хэрэгжих хэрэгтэй төслүүдийн нэг гэж бодож байсан. Харин  тэгж өндрөөр төсөвлөх шаардлагагүй, мэргэжлийн удирдлага, шуурхай зохион байгуулалт хэрэгтэй байлаа. Сэлбэ голын эрэг орчмыг тохижуулснаар иргэд дулааны  улиралд салхилах газар нэгээр нэмэгдэнэ. Үнэндээ Улаанбаатар цэвэрхэн, тухтай амраад суух газар хэд билээ. Мөн энэ тохижилтыг дагаад хувиараа бизнес тэнд худалдаа эрхлэх ч боломж бүрдэнэ. Энэ мэт олон давуу талтай төсөл байсан. 

-Түгжрэлийн төсөв хэр оновчтой батлагдсан гэж бодож байгаа вэ?

            -Өнгөрсөн жил түгжрэлийн төсөвт 420 тэрбум төгрөг төсөвлөгдөж байсан.  Харин энэ жил түгжрэлийн төсвийн асуудал, шинэ шийдлийг Түгжрэлийг бууруулах хорооны дарга  Ж.Сүхбаатар хариуцна. Мөн нийслэлийн түгжрэлд зориулан төсөвлөсөн 600 орчим тэрбум төгрөгийг Засгийн газар татан авахаар болсон.Нийслэлээс өмнө жил түгжрэлийг бууруулах ажлын хүрээнд зарим замын бүтээн байгуулалтын ажлаа үргэлжлүүлэн хийж байгаа. Гэхдээ зам засаж, нэмлээ гээд түгжрэл буурахгүй.

 

 

 


П.НАРАНБАЯР:Нийслэл ирэх оны төсвөө оновчтой баталж чадаагүй
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188