Монгол Улсын Ерөнхийлөгч Ухнаагийн Хүрэлсүх Япон Улсад төрийн айлчлал хийж байна. Энэ онд Монгол, Япон Улс дипломат харилцаа тогтоосны 50 жилийн ой тохиож байгаа билээ. Айлчлалын хүрээнд Монгол-Японы Төр, хувийн хэвшлийн аравдугаар зөвлөлдөх уулзалт болж байгаа юм. Тус уулзалтад Монгол, Японы 200 гаруй бизнес эрхлэгч, аж ахуйн нэгжийн удирдлага оролцож байна. Уулзалтын үеэр Монгол Улсын Ерөнхийлөгч У.Хүрэлсүх ийнхүү үг хэллээ.   

           Тэрбээр, “Эрхэм хүндэт хатагтай, ноёдоо, эрхэм хүндэт бизнесийн төлөөлөгчдөө Монгол Улс, Япон Улсын хооронд  дипломат харилцаа тогтоосны түүхт 50 жилийн ойн баяр мэндийг хүргэж байна. Эрхэм та бүхэнтэй манай хоёр орны улстөрийн өндөр түүх дээр тулгуурласан худалдаа, хөрөнгө оруулалт, эдийн засгийн хамтын ажиллагааны шинэ 50 жилийг гарааг эхлүүлэх түүхэн мөчид уулзаж байгаадаа миний бие сэтгэл их өндөр байна. Монголын Улсын Ерөнхийлөгчийн Япон Улсад хийж буй төрийн айлчлалын хүрээнд энэ удаагийн зөвлөлдөх уулзалтыг зохион байгуулж буй хоёр улсын засгийн газар, хоёр орны бизнесийн төлөөлөгчид, баялаг бүтээгчдэдээ гүн талархал илэрхийлж байна.  Манай хоёр улсын өнө эртнээс эхлүүлсэн найрсаг харилцаа, хамтын ажиллагаа шинэ хөгжил дэвшлээр тасралтгүй баяжиж, энхтайван, хөгжил цэцэглэлтийн түвшинг шинэчлэн байгуулсан нь чухал үүрэг гүйцэтгэх болно. Монгол, Японы Стратегийн түншлэлийн харилцааны түвшинг ахиулан “Монгол Улс, Япон Улсын энх тайван, хөгжил цэцэглэлтийн төлөөх Тусгай стратегийн түншлэл”-ийн зарчимд тулгуурлан  хөгжүүлж, эрх чөлөө, ардчилал, хүний эрх, зах зээлийн эдийн засаг зэрэг нийтлэг үнэт зүйлсдээ тулгуурлан бүхий л салбарын “хүн төвтэй” харилцаа, хамтын ажиллагааг бэхжүүлэхийн сацуу дэлхий нийтийн өмнө тулгамдаж буй асуудлуудыг шийдвэрлэхэд хамтдаа хувь нэмэр оруулж, нягт хамтран ажиллахад бэлэн байна. Сүүлийн 30 жилийн хугацаанд Япон Улсаас Монгол Улс руу нэг тэрбум гаруй ам.долларын хөрөнгө оруулалтыг худалдаа, банк санхүү, уул уурхай, аялал жуулчлал, мэдээллийн технологийн салбарт хийсэн хөрөнгө оруулалт 2021 оны байдлаар 500 орчим сая ам доллароор хэмжигдэж байна. Мөн хоёр улсын бизнес эрхлэгчид бүхий л салбарт хамтран ажиллаж байгаа. Өнөөдрийн энэхүү уулзалт дэлхий дахинд дэгдсэн цар тахлын давлагаа үргэлжилсэн амаргүй цаг үед  зохион байгуулагдаж байна. Дэлхийн хүн амын тоо 8 тэрбумд хүрч, дэлхий нийтээр хүнс, эрчим хүчний хомстолд орж бараа үйлчилгээ, тээвэр ложестикийн хүндрэлтэй нөхцөл үүссэн амаргүй цаг үеийг туулсан Монгол Улсын засгийн газар эдийн засгаа сэргээх, эрчим хүчний чиглэлээр шинэ сэргэлтийн бодлогыг дэвшүүлэн хэрэгжүүлж байна.

            Эрхэм хүндэт зочдоо Монгол Улс хөрөнгө оруулалтын бодлогоо улам тодорхой болгож, тогтвортой тууштай байж, итгэл найдвартай удаан хугацааны түнш байх зарчмыг баримтлах болно. Хөрөнгө оруулагчдын эрх ашгийг хамгаалахад эрх зүйн шинэчлэлийг хийж байгаа. Энэ ажлын хүрээнд Монголын Улсын эдийн засаг хөгжлийн яамыг шинээр байгуулсан. Сүүлийн жилүүдэд хоёр орны бизнес эрхлэгчдийн хамтын ажиллагаа саарах хандлагатай болсон. Бид үүнд дүн шинжилгээ хийж байгаа. Бидэнд алдаа оноо байна. Алдаагаа бид засах ёстой. Япон хөрөнгө оруулагчдын итгэл, сэтгэлийг эргүүлэн олж авахын төлөө бүхий л боломжоо дайчлан ажиллах болно гэдгийг хэлэхийг хүсэж байна. Та бүхэн бол бидний үнэнч анд нөхөр. Та бүхэн Монгол Улсад асар их хөрөнгө оруулалт хийсэн. Цаашдаа Монгол Улсын хөгжил дэвшилд харилцан ашигтай хамтын ажиллагаа, томоохон төсөл хөтөлбөрүүдийг хэрэгжүүлэхэд Монголын төр анхааран ажиллах болно гэдгийг зориуд тэмдэглэн хэлэхийг хүсэж байна. Ирэх 50 жилд шинэ агуулгаар улам баяжуулж, эдийн засаг бизнесийн харилцан ашигтай түншлэлээ хөгжүүлэхэд өнөөдрийн уулзалт чухал үүрэг гүйцэтгэнэ гэдэгт итгэлтэй байна" гэлээ.