Эргэлт.мн мэдээллийн сайт долоо хоног бүр улс төр, нийгэм, эдийн засаг, дэлхий дахинд болж өрнөсөн онцлох үйл явдлыг тоймлон хүргэдэг билээ. Бид энэ долоо хоногт Засгийн газрын ээлжит хуралдаанаас гарсан хэд хэдэн шийдвэр, Оюутолгойн гэрээний асуудал, гурван тэгш ойд зориулсан 512 бөхийн барилдаанд оролцсон 18 бөхийн шинжилгээнээс дөрөвт нь допинг илэрч, No “Double Standard” хөдөлгөөний зохицуулагч Э.Одбаярыг сулласан зэрэг үйл явдлыг онцлон хүргэж байна.

Д.Мөнх-Эрдэнэ Ерөнхийлөгч асан Х.Баттулга, Х.Нямбаатар, Д.Дагвадорж нарыг АТГ-т шалгуулахаа мэдэгдэв

​          УИХ дахь АН-ын бүлгийн зөвлөх Д.Мөнх-Эрдэнэ энэ  сраын 25-нд Ерөнхийлөгч асан Х.Баттулга, Х.Нямбаатар, Д.Дагвадорж нарыг АТГ-т шалгуулахаа мэдэгдэв. Тэрбээр мэдэгдэл хийх үеэрээ“Д.Дагвадорж аварга таван тэрбум төгрөг, монголын цирктэй хамт идсэн. Сугар Д.Дагвадоржид 800 сая төгрөгийн тогтоол гаргаж 300 саяыг нь авч, үлдсэн мөнгийг нь авалгүй нутгийн дүүдээ өгсөн. Гэхдээ Ерөнхийлөгч асан Н.Энхбаярын даалгавраар бэлэглэсэн тухайгаа ярьсан. Гэтэл Д.Дагвадорж, Д.Сумъяабазар хоёрт циркчид сөгдөж байгаад өгөөгүй шүү. Харин Х.Баттулгыг Ерөнхийлөгч байхад нь  дэд дарга Г.Байгалмаа “Ерөнхийлөгчийн нэр төрд халдсан гэж цагдаагийн байгууллагад гомдол гаргасан. Үүний хариуд нь би өөрийн үзэл бодлоо илэрхийлсэн хэмээн шүүхэд гомдол гаргаж, ялсан. Би Баттулгыг доромжлоогүй. Г.Байгалмаа Ерөнхийлөгчийн Тамгын газрын дэд даргаар ажиллаж байхдаа иргэдэд гомдол гаргахаас өөр ажил хийгээгүй" хэмээсэн юм.

Ерөнхийлөгч У.Хүрэлсүх ОХУ-д, Ерөнхий сайд Л.Оюун-Эрдэнэ БНХАУ-д айлчилна

​          Монгол Улсын Ерөнхийлөгч У.Хүрэлсүх арвандугаар сард ОХУ-д айлчлахаар төлөвлөж байгаа талаар Гадаад харилцааны сайд Б.Батцэцэг мэдэгдсэн. Айлчлалаар үеэр төмөр замын асуудал түлхүү хөндөгдөх бололтой. Харин Ерөнхий сайд Л.Оюун-Эрдэнэ ирэх оны хоёрдугаар сард БНХАУ-д айлчилж, "Бээжин 2022" өвлийн олимпын нээлтэд оролцох юм.  

Дэлхийн А зэрэглэлийн дуурийн дуулаачдын уралдаанд Монголоос найман дуучин оролцоно

​          Италийн нэрт дуурийн дуучин Энрико Карузогийн 100 жилийн ойд зориулсан дэлхийн дуурийн дуулаачдын "Vencero World Opera Singing Competition" уралдааныг энэ онд зохион байгуулж, нийт 45 орны 730 дуучид өрсөлдсөн. Тэмцээний эхний шатны шалгаруулалтыг онлайнаар зохион байгуулж, одоогийн байдлаар 60 дуучин финалын шатанд шалгараад байна.

​          Тэгвэл тус А зэрэглэлийн дуурийн дуулаачдын уралдаанд Монгол Улсаас С.Бат-Эрдэнэ, Д.Бат-Эрдэнэ, Б.Жавхлантөгс, Д.Дагвадорж, Д.Эрдэнэ-Очир, Т.Энхбат, С.Батчимэг, Б.Батжаргал нар шалгарч төгсгөлийн шатны шалгаруулалтад оролцохоор бэлтгэлээ хангаж байгаа юм.

​          "Vencero World Opera Singing Competition" 2021 дэлхийн А зэрэглэлийн дуурийн дуулаачдын уралдааны төгсгөлийн шатны шалгаруулалтыг энэ амралтын өдрүүдэд Итали Улсын Наполи хотод зохион байгуулж буй. Тэмцээний шүүгчээр дэлхийн хамгийн том дуурийн 12 театрын захирал, удирдлагууд, найруулагчид, мөн алдартай шүүмжлэгчид ажиллаж байгаа нь олны анхаарлыг маш их татаж байгаа юм.

12 настай хүү сонирхогчдын  Дэлхийн аварга шалгаруулах тэмцээнээс мөнгөн медаль хүртсэн

​          Бүгд Найрамдах Грек Улсын Родес хотноо шатрын сонирхогчдын дэлхийн аварга шалгаруулах тэмцээн болсон. Тэмцээнд Монгол Улсаас таван тамирчин оролцсон бөгөөд 12 настай Н.Содбилэг чансааны оноо 1700 хүртэлх ангилалд мөнгөн медаль хүртжээ. Тэрбээр есөн өрөг тоглон найм хожиж, ганц тэнцэн коэффцентын ялимгүй зөрүүгээр мөнгөн медаль хүртсэн байна.

​          Мөн энэ ангилалд УИХ-ын гишүүн асан Д.Лүндээжанцан өрсөлдөн, 29 дүгээр байрт оржээ. Харин чансааны оноо 2000 хүртэлх ангилалд өрсөлдсөн Б.Тэнүүнболд 10 дугаар байр, М.Мандухай 17 дугаар байрт шалгарсан бол 2300 хүртэлх ангилалд өрсөлдсөн Б.Халиун 28 дугаар байр эзэлжээ.

Б.БОЛД: “Рио Тинто" өмнөх гэрээг муу байсан гэж хүлээн зөвшөөрч байгаа

​          “Рио Тинто”-гийн Зэсийн группийн захирал захирал Б.Болд болон тус компанийн Монгол дахь салбарын захирал Х.Амаржаргал нартай энэ сарын 26-нд Засгийн газраас байгуулсан Ажлын хэсгийнхэн уулзалт хийв.

​          “Рио Тинто”-гийн Зэсийн группийн захирал Б.Болд “Хөндлөнгийн шинжээчдийн дүгнэлтийн зарим хэсгийг хүлээн зөвшөөрч байгаа. Мэдээж ярилцах зүйлё бий. Ажлын хэсэгтэй яриа хэлэлцээ хийж байгаа учраас нарийн мэдээлэл өгөх боломжгүй байна. Манай компани мэдээллээ илүү нээлттэй болгох, менежментийн хариуцлагын тогтолцоог сайжруулах тодорхой саналуудыг хэрэгжүүлэх гээд явж байна. “Рио Тинто”-гийн талаас бодитой саналуудыг тавьсан. Үүнээс яриа, хэлцлийн явцад сайжруулах, хүлээж авах уу, үгүй юү гэдэг олон асуудал байна. Санал тавьсан нь өмнөх гэрээг муу байсан гэж хүлээн зөвшөөрч байгаа хэрэг биш” гэсэн байна.

Соёл урлагийн үзвэр, үйлчилгээг ирэх сарын 1-нээс нээнэ

​          Монгол Улсын Засгийн газрын ээлжит хуралдаанаас соёл урлагийн үзвэр, үйлчилгээг ирэх сарын 1-нээс эхлүүлэх шийдвэр гаргав. УОК-оос есдүгээр сарын 27-нд хоол үйлдвэрлэл, үйлчилгээний газруудыг оройн 22:00 цагаас хойш ажиллуулахгүй байх, баяр, тэмдэглэлт арга хэмжээг зохион байгуулахгүй байх шийдвэр гаргасан. Үүнд, Хичээл сургалтын үндсэн хөтөлбөрөөс бусад танхимын бус сургалт, танилцах үдэшлэг, оюутны хөгжлийн клуб, өдөрлөг, тэмцээн уралдаан, аялал, зугаалга, багш нарын баяр болон бусад тэмдэглэлт арга хэмжээ зохион байгуулахыг хориглосон.

​          Тэгвэл өнгөрсөн лхагва гарагт болсон Засгийн газрын хуралдаанаас соёл урлаг, спортын арга хэмжээг арваннэгдүгээр сарын 1-нээс 50 хувийн танхимын дүүргэлттэйгээр нээх шийдвэр гаргажээ.

Он дуустал мах экспортлохгүй

​          Монгол Улсын Засгийн газрын ээлжит хуралдааны шийдвэрийн талаар ХХААХҮ-ийн сайд З.Мэндсайхан мэдээлэл өгсөн. Тэрбээр “Махын үнийг тогтвортой байлгахын тулд экспортлохыг хязгаарлана. Засгийн газрын хуралдаанаар он дуустал мал, мах экспортлохгүй байх шийдвэр гаргалаа.

​          Нарийн ногооны хомстол үүссэн нь Эрээнд илэрсэн цар тахалтай холбоотой.  Өнөөдрийн байдлаар тээвэрлэлт нь зогссон хүнсний бүтээгдэхүүний 190 орчим вагон бий. 30 орчим вагоныг нь нэмж гаргах хүсэлт гаргаж, цаанаас ирж байгаа тээврийг Замын-Үүд рүү шууд гаргах боломж хайж байгаа” гэсэн юм.

Зорилтот бүлгийн 50 хувь нь гурав дахь тундаа хамрагдвал АНН байгууллагуудын үйл ажиллагааг нээнэ

​          Монгол Улсын Засгийн газрын ээлжит хуралдааны шийдвэрийн талаар УОК-ын нарийн бичгийн дарга Т.Баярхүү мэдээлэл өгсөн. Тэрбээр “ЭМЯ, ХӨСҮТ, УОК-ын дэргэдэх эрдэмтдийн багийн судалгаагаар Монгол Улсад цар тахлын идэвхтэй үе есдүгээр сарын 20-ноос аравдугаар сарын эхэн үе хүртэл үргэлжилсэн. Одоо халдварын тохиолдлын тоо буурч байгаа ч, буурах хурд нь удаан байна.

​          Гамшгийн үеийн дөрвөн төрөл буюу улаан, улбар, шар, ногоон түвшний зэрэглэлийн журмыг шинэчилж, цаашдаа вакцинжуулалттай холбож, тодорхой хэмжээний зохицуулалт хийх чиглэл өгсөн. Хэрэв зорилтот бүлгийн нийт иргэдийн 50 хүртэлх хувь нь коронавирусийн эсрэг вакцины гурав дахь тундаа хамрагдсан тохиолдолд ААН байгууллагуудад үйл ажиллагаа нээх боломж өгнө. Үүнд хариуцлагын гэрээ байгуулна. Цаашид ч энэ журамд холбогдох зохицуулалт орно” гэсэн юм.

Байгалийн түүхийн музейг 2022 онд “Чингис хаан” музейд нэгтгэнэ

​          Монгол төрийн түүхийн музейн үйл ажиллагааг 2022 оны нэгдүгээр сараас 1-ээс зогсоож, “Чингис хаан” музейд нэгтгэх шийдвэрийг Засгийн газрын хуралдаанаар гаргасан.

​          Музейн эд хөрөнгө, үзмэр, сан хөмрөг, эд өлгийн зүйлийг “Чингис хаан” музейд балансаас баланст шилжүүлэх арга хэмжээг холбогдох байгууллагуудтай хамтран хууль тогтоомжийн хүрээнд зохион байгуулахыг даалгасан байна.
Монгол төрийн түүхийн музей нь Төрийн ордны өргөтгөлд үйл ажиллагаа явуулдаг, үзмэрийн дөрвөн танхимтай, жилд дунджаар 24 мянган хүнд үйлчилдэг, орон тооны 18 ажилтантай юм байна. Их Монгол Улс, Монголын эзэнт гүрний хаадын алт, мөнгө, зэс зооснууд, Өмнөговь аймгийн Ноён сумын Цагаан ханангийн агуйгаас олдсон XIII зууны үеийн язгууртны хувцас хэрэглэл, Хэнтий аймгийн Дэлгэрхаан сумын Бурхан толгойн булшнаас гарсан Монгол хатны богтог малгай болон эрт, эдүгээгийн төрт ёсны түүхэнд холбогдох ховор нандин 1237 үзмэртэй аж.

"Андлалын өргөө" хөшөөний суурин дээр "Тэнгэрийн андгай" бүтээлийг урласан

​          2017 онд Хэнтий аймгийн Батноров суманд "Андлалын өргөө" цогцолбор барихаар 1.9 тэрбум төгрөг төсөвлөж, ажил нь эхэлсэн ч зохиогчийн эрхийн маргаанаар барилгын ажлыг зогсоосон. Тэгвэл "Андлалын өргөө"-ний суурин дээр  "Тэнгэрийн андгай" шинэ цогцолборыг байгуулжээ.  Тус цогцолборыг өнгөрсөн наймдугаар сард барьж эхэлсэн бөгөөд дуусах тун дөхсөн байна. "Тэнгэрийн андгай" цогцолборын уран бүтээлчээр гавъяат уран барималч А.Очирболд ажиллажээ.

Дөрвөн бөхийн А шинжилгээнээс допинг илрэв

​          Монгол Улсад залуучуудын байгууллага үүсэж хөгжсөний 100 жил, Монголын үндэсний бөхийн холбооны 30 жил, Монгол бөхийг дэлхийн дээд амжилт Гиннест бүртгүүлсний 10 жилийн ойд зориулсан хүчит 512 бөхийн барилдаан өнгөрсөн наймдугаар сарын 16-17-нд зохион байгуулсан. Барилдааны дараа 512 бөхийн барилдааны шөвгийн 16 болон улсын арслан Ц.Содномдорж, Э.Оюунболд нараас допингийн шинжилгээ авсан билээ.

​          Тэгвэл өнгөрсөн пүрэв гарагт Монголын үндэсний бөхийн холбооноос допингийн шинжилгээтэй холбоотой асуудлаар мэдэгдэл хийж, дөрвөн бөхийн А шинжилгээнээс допинг илэрсэн талаар мэдэгдсэн. Хэрэв А шинжилгээнээс нь допинг илэрсэн бөхчүүд Б шинжилгээгээ өгөөгүй тохиолдолд хариугаа хүлээн зөвшөөрсөн гэж үзэх юм.

Э.Одбаярыг суллах шийдвэр гаргаж, хилээр гарах эрхийг нь хязгаарласан

​          "No Double Standard" хөдөлгөөний зохицуулагч Э.Одбаяр, Д.Монголхүү нарыг 30 хоног цагдан хорьсон. Э.Одбаяр нь үндэслэлгүйгээр хэрэгт холбогдуулан яллагдагчаар татсаныг эсэргүүцэж, хоригдох хугацаандаа нойтон өлсгөлөн зарлаад 20 хонож, энэ хугацаанд 10 кг турсан талаар түүний өмгөөлөгч нь мэдэгдсэн. Түүнчлэн, Э.Одбаярын бие муудаж, бөөрний дутагдалд орсон гэх оноштойгоор хорих ангийн эмчийн хяналтад байгаа юм.

​          Тэгвэл Э.Одбаярыг суллах эсэх асуудлыг өмгөөлөгчдийн гомдлоор Сүхбаатар дүүргийн Эрүүгийн хэргийн анхан шатны шүүхээр хэлэлцээд суллах шийдвэрийг гаргав. Харин түүнийг хилээр гарах эрхийг нь хориглосон аж.