Эргэлт.мн мэдээллийн сайт долоо хоног бүр улс эх оронд болон дэлхий дахинд өрнөсөн үйл явдлуудыг тоймлон хүргэдэг билээ. Тэгвэл өнгөрөгч долоо хоногт өрнөсөн үйл явдлуудаас 2022 оны улсын төсөв хэлэлцсэн, Ц.Туваан гишүүн Ардчилсан намаас хөөгдсөн, 10 настай хүүг буудаж, амийг нь хөнөөсөн, Ливан Улсад зургаан хүн амиа алдаж, 32 хүн шархадсан зэрэг үйл явдлыг онцлон тоймлож байна.  

2022 оны улсын төсөв хэлэлцэв

       Улсын Их Хурлын 2021 оны хаврын ээлжит чуулганы энэ сарын 14-ны нэгдсэн хуралдаанаар Засгийн газраас 2021 оны есдүгээр схрын 30-ны өдөр өргөн мэдүүлсэн Монгол Улсын 2022 оны төсвийн тухай, Нийгмийн даатгалын сангийн 2022 оны төсвийн тухай, Эрүүл мэндийн даатгалын сангийн 2022 оны төсвийн тухай, Ирээдүйн өв сангийн 2022 оны төсвийн тухай хуулийн төслүүдийн нэг дэх хэлэлцүүлгийг эхэлсэн юм.

      Монгол Улсын 2020 оны төсвийн тухай, Нийгмийн даатгалын сангийн 2020 оны төсвийн тухай, Эрүүл мэндийн даатгалын сангийн 2022 оны төсвийн тухай, Ирээдүйн өв сангийн 2020 оны төсвийн тухай хуулийн төслүүдийн талаарх хууль санаачлагчийн илтгэлийг Монгол Улсын Ерөнхий сайд Л.Оюун-Эрдэнэ танилцуулсан билээ.

УИХ-ын гишүүн Ц.Тувааныг Ардчилсан намаас хөөлөө

         УИХ-ын гишүүн Ц.Туваан, УИХ-ын гишүүн асан З.Энхболд нарыг  намын дүрэм зөрчсөн гэх үндэслэлээр  намаасаа хөөсөн талаар Ардчилсан намын бүлгийн дарга Г.Ганбат энэ сарын 14-нд мэдээлсэн билээ. Тэрбээр "Ардчилсан намаас УИХ-ын гишүүн Ц.Тувааныг намын дүрэм зөрчсөн учир дөрвөн жилийн хугацаагаар хасах сахилгын шийтгэл ногдуулсан байна. Иймд бид дүрэм, хуулийн дагуу Ц.Тувааныг намын бүлгээс хасна. Цаашид Ардчилсан намын бүлгийн хуралд оролцохгүй. Мөн бие даан нэр дэвшсэн С.Ганбаатар, Н.Алтанхуяг нар бүлгийн үйл ажиллагаанд оролцох боломжгүй" гэсэн юм. Энэ талаар тус намын дарга М.Тулгат "Үндсэн дүрмийн хорооны хурлаар намын гишүүдээс ирсэн гомдлын дагуу Ц.Тувааны асуудлыг авч хэлэлцсэн.

      Намын дүрэмд тодорхой эрх зүйн үндэс байдаг. Үүний дагуу Ц.Тувааныг намаас хасах шийдвэр гаргасан. Бид энэ талаарх шийдвэрээ танилцуулсан. УИХ-ын гишүүн Ц.Туваан болон УИХ-ын дарга асан З.Энхболд нарыг намаас хасах хурал наймдугаар сарын 30-нд болсон. Би хассан гэдгийг нь мэдэж байсан ч сая гэнэтийн мэдэгдэл хийлээ" гэлээ. УИХ-ын гишүүн Ц.Туваан нь 2020 оны УИХ-ын сонгуулийн дараа Ардчилсан намын даргын үүргийг түр орлон гүйцэтгэгчээр ажиллаж байсан юм. Энэ талаар УИХ-ын гишүүн Ц.Туваан тайлбар, мэдээлэл өгсөн. Тэрбээр "Би хэдэн удаа хөөгдчихсөн юм мэдэхгүй. Бүлэгт нэгдэж ажиллаад жил гаруй болж байна. Бүлгийн бүтэц дотоод зохион байгуулалтын асуудлыг бид ярилцсан юм.

          Нөхөн сонгуулийн нэмэлт санал хураалттай холбоотой энэ асуудлыг түр хойшлуулаад байсан. Би Ардчилсан намаас сонгогдсон, намын гишүүн мөн. Би намын дүрмээр хэлэлцсэн хурлыг ч мэдээгүй. Намын гишүүдийг олонх сонгосон гишүүн нь О.Цогтгэрэл гишүүн байгаа. Сонгуулиар нэгдсэн гэдэг чинь зохиомол үйлдэл. Би байхгүй газраасаа хөөгдөж байгаагаа гайхаж байна. Байгаа Ардчилсан намдаа байгаа. Бүлгийн хурлын шийдвэр бүлгийн нийт гишүүдийн олонхоор гардаг. Бүлгийн дарга нэртэй нэг гишүүн шийдвэр гаргана гэж байхгүй" гэсэн юм.

Бууны сум алдаж,10 настай хүүгийн амийг хөнөөв

    Архангай аймгийн Өндөр-Улаан сумын Азарга багийн малчин Д-ийнд байсан 10 настай эрэгтэй хүүхэд бууны суманд өртөж, амиа алдсан харамсалтай хэрэг энэ сарын 13-нд гарсан. Тодруулбал, энэ хэргийн тухай дуудлага аравдугаар сарын 13-ны 22:55 цагт цагдаагийн байгууллагад иржээ. Дуудлагын дагуу  тус сумын хэсгийн төлөөлөгч хэргийн газарт ажиллаж, урьдчилсан байдлаар 10 настай эрэгтэй Х-г 38 настай эрэгтэй Д гэгч нь сум алдаж амийг нь хохироосон байж болзошгүй нөхцөл байдал тогтоогдоод байгаа аж. Холбогдох шалгалтын ажиллагааг Архангай аймаг дахь цагдаагийн газар үргэлжлүүлэн явуулж байна.

           Талийгаач хүү бүтэн өнчин байжээ. Хүүгийн ээж 2018 оны аравдугаар сард өвчний улмаас нас барж, хүү эмээтэйгээ амьдардаг байсан байна. Хүү тус сумын ерөнхий боловсролын тавдугаар ангид сурдаг байжээ. Хэрэг гардаг өдөр хичээлдээ яваагүй бөгөөд хөдөө гэртээ байсан аж.

Тус хэргийг үйлдсэн 38 настай Д-г цагдаагийн байгууллагаас саатуулж, цагдан хориод байна. Мөн талийгаачийн цогцсыг задлан шинжилгээнд оруулсан аж. Бид тус хэргийг үйлдсэн Д-ийн аав В-ээс тухайн үед юу болсон талаар тодрууллаа. Тэрбээр “Тун харамсалтай хэрэг гарлаа. Хүү минь хониндоо яваад, ирсэн юм билээ. Манай нутаг хээрийн амьтан, чоно элбэгтэй. Хониндоо явахдаа буугаа үүрч явсан гэсэн. Орой гэртээ ирээд сумнуудыг нь аваад, оруулсан юм билээ. Сум үлдсэн байсныг нь мэдээгүй гэртээ ороод, буугаа орныхоо толгойд тавих гэж байгаад сум алдчихсан гэсэн. Би сумын төвд амьдардаг юм. Хүү минь орой над руу залгаж, энэ тухай хэлээд, би эмнэлэг, цагдаад хэл дуулгасан.

Хүний амь насыг санамсар болгоомжгүйгээр хөнөөсөн тохиолдолд хуулийн ямар хариуцлага хүлээх талаар “Ашид мөнх консалтинг” хуулийн фирмийн захирал, хуульч Т.Батсүмбэр-Уулаас тодруулсан юм. Тэрбээр “Эрүүгийн хуулийн тусгай ангийн 10.6 хүний амь нас болгоомжгүйгээр хохироосон тохиолдолд 1-5 жилээр зорчих эрхийг хязгаарлах эсвэл 1-5 жил хүртэлх хугацаанд хорих ялаар шийтгэх зохицуулалттай. Зорчих эрхийг хязгаарлах, хорих ялаар шийтгэх эсэхийг шүүгч мэднэ" гэсэн юм.