Эргэлт.мн мэдээллийн сайт долоо хоног бүр улстөр, нийгэм, эдийн засаг, соёл урлагийн салбарт болон дэлхий дахинд болж өнгөрсөн онцлох үйл явдлыг тоймлон хүргэдэг билээ. Өнгөрөгч долоо хоногт шатахууны хомсдолд орж, иргэд шатахуун түгээх станцад өдөр, шөнөгүй дугаарласан зэрэг үйл явдлыг тоймлон хүргэж байна.

АИ-92, АИ-95 шатахууны хомсдолтой, шагийн наймаатай долоо хоног

       Нийслэлд шатахууны хомсдол үүсэж, жолооч нар шатахууны эрэлд гарсныг ашиглан шагийн бизнесүүд цэцэглэж эхэлсэн. Шатахуун түгээх станцын түгээгч, салбар хариуцсан удирдлагууд, холбоо сүлбээтэй, хөдөлгөөнтэй хэсэг залуус нийлж, хуйвалдах замаар шатахуун шаглах, мөнгө авч дараалалгүй үйлчлэх, “мах авбал шатахууны талон өгнө” гэж наймаалцах зэргээр хэтэвчээ зузаалж, нэг литрийг нь 5000 төгрөгөөр шаглаж байгааг манай сайтын сурвалжилах баг ил болгосон.Харин шатахууны хомсдол үүссэн энэ цаг үед холбогдох албан тушаалтнууд ямар тайлбар хийснийг хүргэе. Засгийн газрын хуралдаанаас гаргасан шийдвэрийг УУХҮ-ийн сайд Г.Ёндон танилцуулсан юм. Тэрбээр "Роснефть" компаниас сар бүр 28 мянган тонн бензин авах ёстой. Гэвч тэд 17 мянган тонныг нийлүүлэх боломжтой гэсэн тул БНХАУ-аас 43 мянган тонн шатахуун авах захиалга өгсөн. ОХУ-аас 17 мянган тонн шатахуун ирнэ гэж тооцсон ч энэ сард 7500 тонныг нийлүүлсэн. Үлдэгдлийг ирэх сарын 1-н хүртэл нийлүүлэх боломжгүй гэсэн юм. Мөн БНХАУ-ын талаас Хөх хотын боловсруулах үйлдвэрээс манай улсад бензин нийлүүлэх боломжгүй гэсэн. Тиймээс найм хоногийн турш шатахууныг хязгаартай худалдах боллоо.

        Бээжинд суугаа Элчин сайд нот бичиг өгч, холбогдох хүмүүстэй уулзаж байна. Тус улсад сүүлийн хоёр хоног амралтын өдрүүд байв. Зам тээврийн яам, ГХЯ энэ асуудлыг шийдэхээр ажиллаж байна. Хөх хотоос Жинин боомтод саатаж, Замын-Үүдээр дамжин шатахуун ачсан галт тэрэг орж ирнэ. Тээврийг аль болох хурдан хийхээр ажиллаж байна. Учир нь хоёр галт тэрэгнээс нөгөө рүү нь ачна, агуулахад буулгасны дараа аж ахуйн нэгжүүд авах гээд олон шат дамжлага бий. Манай арми, ОБЕГ өөрийн нөөцтэй. Бүх хэрэглэгчид жигд хүртээхийн тулд бид хязгаарлалт тавьж байна. Ерөнхий сайд даалгасны дагуу бид буруутай гэж үзсэн албан тушаалтанд арга хэмжээ авна. Мэдээллээ боловсруулаагүй юу, ажилдаа хайнга хандсан уу гэдгийг тогтооно” гэсэн юм.

Ерөнхийлөгч У.Хүрэлсүх НҮБ-ын Ерөнхий Ассамблейн 76 дугаар чуулганд оролцлоо

          Монгол Улсын Ерөнхийлөгч У.Хүрэлсүх  есдүгээр сарын 20-23-ны өдрүүдэд  НҮБ-ын Ерөнхий Ассамблейн 76 дугаар чуулганд оролцлоо. Тэрбээр энэ үеэрээ чуулганы Ерөнхий санал шүүмжлэлд оролцож, олон улсын харилцааны тулгамдсан асуудлаар Монгол Улсын байр суурийг илэрхийлж үг хэлэх ба НҮБ-ын Ерөнхий нарийн бичгийн дарга А.Гутерреш, НҮБ-ын Хөгжлийн хөтөлбөрийн захирагч А.Штайнер болон зарим улсын төр, засгийн тэргүүнтэй хоёр талын уулзалт хийсэн юм.  Covid-19 цар тахлын улмаас НҮБ-ын Ерөнхий Ассамблейн 75 дугаар чуулган 2020 онд цахим хэлбэрээр болсон бол  энэ удаагийн чуулганд 71 орны Ерөнхийлөгч, 34 орны Ерөнхий сайд биечлэн оролцох аж. Мөн Ерөнхийлөгч У.Хүрэлсүх НҮБ-ын Хүүхдийн сангийн Гүйцэтгэх захирал Х.Фортой  цахим уулзалт хийж, хамтын ажиллагааны асуудлаар санал солилцсон.

Цагдаагийн албан хаагч мансууруулах бодис хэрэглэсэн гэдэг нь тогтоогджээ

         Цагдаагийн дүрэмт хувцастай иргэн мансуурсан байж болзошгүй зураг цахим орчинд цацагдсан. Уг асуудалтай холбогдуулан ЦЕГ-аас тайлбар мэдээлэл өгсөн юм. Тодруулбал, Орхон аймгийн Цагдаагийн газрын гэрээт цагдаагийн хэлтсийн хамгаалалтын II тасгийн харуулын цагдаа, цагдаагийн дэд ахлагч Ц.Мөнх-Эрдэнэ нь 2021 оны есдүгээр сарын 13-ны өдөр ажлаасаа буугаад, албаны хувцастай бусадтай нийлэн мансууруулах төрлийн бодис хэрэглэсэн нь урьдчилсан байдлаар тогтоогджээ. Одоогоор холбогдох шалгалтын ажиллагаа үргэлжилж байгаа аж. Мансууруулах бодис хэрэглэсэн уг асуудалд Орхон аймаг дахь цагдаагийн газраас Эрүүгийн хуулийн 20.7-р зүйлийн нэгдүгээр хэсэгт заасны дагуу хэрэг бүртгэл нээн, мөрдөн шалгах ажиллагаа явуулж байгаа талаар албаныхан мэдээлсэн юм. Уг асуудалд холбогдсон цагдаагийн алба хаагчийг албанаас халах шийдвэрийг гаргасан байна.

Сүүлчийн долоо хоногийн ажлын өдрүүдэд 14781 хүн коронавирусийн халдвараар өвчилж, 63 иргэн нас баржээ

        Сүүлчийн долоо хоногийн ажлын өдрүүдэд 14781 хүн коронавирусийн халдвараар өвчилж, 63 иргэн нас барсан байна. Дунджаар өдөрт 2000 иргэн коронавирусийн халдвараар өвчилж байна. Манай улсын хүн амын 69.2 хувь нь дархлаажуулалтын нэгдүгээр тунд, 65.3 хувь нь хоёрдугаар тунд хамрагдсан байна. Мөн коронавирусийн халдварын улмаас нас барж байгаа иргэдийн 74.4 хувь нь архаг хууч өвчтэй хавсарсан, 22.6 хувь нь халдварын хүндрэлээр нас барсан байна. Архаг хууч өвчинд зүрх судасны өвчин 51 хувь, чихрийн шижин 16.1 хувь, бөөрний эмгэг 9.4, элэгний эмгэг 7.5, мэдрэлийн эмгэг 7.2, хавдар 5.2, хэт таргалалт 3.6 хувийг эзэлж байна.

Э.Содномпилжээг “Алтан од” одонгоор шагналаа

        Монголчууд“Токио-2020” паралимпын наадамд11 тамирчинтай оролцож, нэг алтан медаль хүртсэн амжилтаар багийн дүнгээр 59-р байрт жагссан билээ. Тэгвэл паралимпын наадамд түрүүлж, төрийн дууллаа эгшиглүүлсэн гавьяат тамирчин Э.Содномпилжээг МҮОХ-ны удирдлагууд хүлээн авч уулзан хүндэтгэл үзүүлсэн юм.

     Энэ үеэр Э.Содномпилжээг МҮОХ-ны дээд шагнал “Алтан од” одон болон мөнгөн шагналаар урамшуулсныг МҮОХ-ны Ерөнхийлөгчийн үүрэг гүйцэтгэгч Ч.Наранбаатар, Ерөнхий нарийн бичгийн дарга Э.Бадар-Ууган нар гардуулж өгөв. Мөн Э.Содномпилжээгийн дасгалжуулагч Д.Баттулгыг “Алтан очир” одонгоор, дасгалжуулагч Б.Энхбаярыг “Олимпын алдар” одонгоор тус тус шагналаа. Энэ үеэр Э.Содномпилжээ “МҮОХ-ны удирдлагууд паралимпын наадмаас медаль хүртсэн тамирчнаа урамшуулж, дээд шагналаа гардуулсанд маш их баяртай байна. МҮОХ, Монголын паралимпын хороо, БТСУХ-ны удирдлагуудад баярлаж талархсанаа илэрхийлье. Миний хувьд “Парис-2024” олимпод амжилтаа бататгах хэтийн зорилго тавиад бэлтгэл сургуулилтаа базааж байна” гэсэн юм.