Энэ жил тэд дунд ангид орж буй юм байна. Сургуульдаа мориор явдаг тэдний тухай уншаарай.

  Архангай аймгийн Өндөр-Улаан сумын Хануй багийн сургуулийн тавдугаар ангид Б.Чинзүрх сурдаг бол дүү Б.Чинбаяр нь дөрөвдүгээр ангийн сурагч. Тэд сургуульдаа мориор ирж очдог.

    Энэ талаараа Б.Чинзүрх  “Намар, хаврын цагт сургууль руугаа өдөр бүр мориор ирж, буцлаг. Сургуульд орсон цагаасаа л хичээлдээ мориор явж байна. Хүрэн халзан мориороо давхих, бүр сургуулийн гадаа ирэх, ялангуяа хүүхдүүдийн дэргэд буух хамгийн гоё. Манай гэр Хануй бага сургуулиас гурван километрийн зайтай болохоор дорхноо давхиад ирдэг юм өө. Уяж орхичихоод хичээлээ дуусахаар унаад харьдаг юм. Заримдаа морьдоо өрөвддөг, биднийг сургахын тулд уяатай өнждөг болохоор хайр төрдөг” гэв. Харин дүү нь “Сургууль руугаа мориор явах зугаатай байдаг. Ах, бид хоёр замдаа дуу дуулж, шүлэг уншина. Морьтой явахад ер нь даарахгүй дээ. Харин ч амар байдаг” гэж ярьлаа.

   Тэрсхэн ах, дүү хоёртой ярилцахад ийм нэгэн зүйл бодогдсоныг уншигч тантай хуваалцья. Гурван километрийн зайд ах, дүү хоёр юу эсийг ярьж, хөгжилдөх билээ. Тэдэнд сонирхолгүй юм гэж үгүй. Үзсэн, сонссон бүхэн л сонин байж, ургуулан боддог байх. Магад тэд сургуулийнхаа сонин сайхныг ярихын зэрэгцээ "Өнөөдөр хэн хониндоо явсан бол. Хоёулааг хичээлдээ явсан хойно хэн тугаландаа явсан бол. Хонины бэлчээрээс хоцроод байдаг хурга минь өнөөдөр яагаа бол" гээд л гэрийнхээ тухай, мал сүрэг, ахуй ажлынхаа тухай ч ярьсан байх. Зунжин хониндоо явж, тугалаа эргүүлж, аав, ээждээ тусалсан хоерт хичээлдээ явсан хойгуур нь өрнөх гэрийнх нь нэг өдөр сонин л байгаа. 
 
  Хөдөө өссөн хүүхдүүдэд хүний үгийг сонсож сурсан том чанар бий. Багаасаа л өвөө, эмээ, аав, ээжнийхээ үгнээс гарахгүй явж ирсэн болохоор хүний үгийг хачин дуулж сурсан байдаг. Энэ зан чанар ах, дүү хоёроос харагдахаас гадна дүү нь ярихаас өмнө ах нь урьтаж ярьж, нэгнийгээ сонсож байсан нь ярилцлага авахад тод харагдаж байв. Биднийг очиход хичээл нь тарж байсан ах, дүү ийн гэрийн зүг жолоо залж, бид буцсан юм.

    Ийн тэд хөдөөгийн буйдхан сумандаа эрдмийн дээдийг сурахаар сургуульдаа мориор ирдэг байна.