Арабын Нэгдсэн Эмират Улсын Абу Даби хотод зохион байгуулагдсан “CS:GO2” видео тоглоомын 400 мянган ам.долларын шагналын сантай “Ялла Компасс-2024” тэмцээнд Монголын “The MongolZ” баг тэргүүллээ. Тодруулбал, “The MongolZ” баг тус тоглоомын олон улсын тэмцээний S зэрэглэлд багтдаг томоохон тэмцээнүүдийн нэг болох “Ялла Компасс-2024”-т урилгаар оролцсон бөгөөд хэсгийн шатанд видео тоглоом сонирхогч залуусын эчнээ танил болсон олон багийг буулган авч, аваргын төлөө “Ninja in Pyjamas” багийг 2:1 харьцаатайгаар буулган авч, “Counter Strike” тоглоомын S зэрэглэлийн олон улсын тэмцээнд түрүүлсэн Монголын анхны баг болов.

-МОНГОЛЫН И-СПОРТЫН “THE MONGOLZ” БАГ-

Монголын “The MongolZ” баг нь 2013 оны наймдугаар сарын 20-нд байгуулагдсан 10 гаруй жилийн арвин түүхтэй и-спортын баг юм. Тус баг байгуулагдсан цагаасаа “Counter Strike: Global Offensive” видео тоглоомын тэмцээнүүдэд орж эхэлсэн бөгөөд тоглоом шинэчлэгдэн “GS:GO 2” болсноос хойш хилийн чанадад зохион байгуулагдаж буй чансаа өндөр тэмцээнүүдэд идэвхтэй оролцох болсон. “The MongolZ” багийн одоогийн бүрэлдэхүүнийг өдгөө “IHC Esports” болж яваа залуус тарснаас хойш цуглуулж эхэлсэн бөгөөд эргэн сэргээсэн “The MongolZ”-ын эхний гишүүд нь багийн менежер С.Мөнххишиг, дасгалжуулагч maaRaa буюу Б.Эрдэнэдалай, ахлагч bLitz Б.Гарьдмагнай, Techno4K М.Содбаяр нар байжээ. Түүнээс хойш 910 буюу Б.Өсөхбаяр, mzinho буюу Б.Аюуш хоёр багт нэгдсэнээр одоогийн “The MongolZ”-ын бүрэлдэхүүн бүрдсэн аж.

“The MongolZ”-ын урилгаар оролцсон Абу Дабигийн “Ялла Компасс-2024” тэмцээнд тив бүрээс цугласан шилдэг 12 баг аваргын төлөө өрсөлдсөн. Тэмцээний дүрмийн дагуу шилдэг 12 баг хоёр хэсэгт хуваагдан оролцсон бөгөөд манай баг “А” хэсэгт орсон. Улмаар нэг хэсгийн зургаан баг тойргийн журмаар тоглосон бөгөөд “The MongolZ” баг хэсэгтээ “Sashi Esport”, “ENCE”, “Ninjas in Pyjamas”, “HEROIC” зэрэг хэдийнэ олны танил болсон и-спортын томоохон багуудыг толгой дараалан буулган авч, “А” хэсгийг тэргүүлсэн байна. Харин хагас финалд хэсэгтээ ганц хожигдсон “Astralis” багтай дахин учраа таарч, тоглолтод 2:1 харьцаатайгаар буулган авчээ. Улмаар Монголын и-спортын “MongolZ” багийн залуус Абу Дабигийн тэмцээний финалд гарч, нэг хэсэгт таарч тоглосон “Ninjas in Pyjamas”-тай дахин тоглож, 2:1 харьцаатайгаар ялалт байгуулж, 200 мянган ам.долларын шагналын эзэн болсон юм. Мөн тус тэмцээний шилдэг тоглогчоор “MongolZ” багийн 910 буюу Б.Өсөхбаяр шалгараад буй. Түүнчлэн “MongolZ” баг энэ төрлийн видео тоглоомын S зэрэглэлийн тэмцээнд түрүүлсэн анхны Монгол баг болоод зогсохгүй энэ зэрэглэлийн тэмцээнд тэргүүлсэн 2010 оны БНСУ-ын "WeMade Fox" багаас хойших анхны и-спортын баг болж байгаа билээ.

Орчин цагт олон сая үзэгч татаж, өөрийн соёлоо тарьж байгаа и-спортод Монголоо таниулж яваа “The MongolZ”-ын залуусын дараагийн тэмцээн энэ сарын сүүлчээр Швед Улсад зохион байгуулагдах “ESL Challenger Jonkoping” тэмцээн. Хэрэв монгол залуус тус тэмцээнд дахин томоохон амжилт үзүүлж, өндөр оноо авч чадвал ирэх намар Мальта арал дээр зохион байгуулагдах “ESL Pro League S20” тэмцээнд уригдах эрхээ бүрэн баталгаажуулах юм.