Youtuber Гремикс буюу М.Ганбаяр Хан-Уул дүүргийн И-март дэлгүүрт очиход түүнтэй гар барьж, хамт зургаа даруулж, уулзах гэсэн олон хүүхэд цуглаж, оочер дараалал үүсгэж буй тухай зураг, дүрс бичлэг цахим сүлжээгээр тархаад байна. Тэгвэл үүнтэй холбоотойгоор Монголын хамгийн анхны “Youtube” хуудсанд сая дагагчтай болсон youtuber, хүүхдүүдийн үлгэр жишээ болж буй Гремикс буюу М.Ганбаяр гэж хэн болохыг танилцуулъя.

-“УЧИХА ГРЕМИКС” буюу М.ГАНБАЯР ГЭЖ ХЭН БЭ-

Сошиал сүлжээнд “Учиха Гремикс” нэрээрээ танигдсан youtuber М.Ганбаяр 1996 оны тавдугаар сарын 16-нд Улаанбаатар хотод төржээ. Тэрбээр “Багадаа хүнтэй нэг их үг дуугардаггүй. Ер нь даруухан талдаа хүүхэд байсан” тухайгаа нэгэн ярилцлагаа дурдсан байдаг бөгөөд сургуулийн сурагч байхдаа “RA”, “Lord of the Rings”, “Warcraft” зэрэг компьютер тоглоом тоглож байсан нь хожим youtuber болох эхлэл нь болсон байна. М.Ганбаяр ерөнхий боловсролын сургуулиа төгссөн жилээ одоогийн “Учиха Гремикс” нэртэй “Youtube” сувгаа нээсэн байдаг. Харин их сургуульд IT инженер суралцсан эхний жилүүддээ сошиал хуудастаа цөөнгүй бичлэг оруулсан ч тэгж их хандалт авч чадаагүй гэнэ.

М.Ганбаяр 2016 оноос “Youtube” хуудастаа идэвхтэй бичлэг хийж эхэлсэн бөгөөд шинээр гарч буй видео тоглоомын танилцуулга, тоглоомын үе, даалгавруудыг хэрхэн давах тухай харуулдаг дүрс бичлэгүүд нь сошиал хэрэглэгчдийн анхаарлыг татаж эхэлжээ. Түүнээс хойш удалгүй Учиха Гремикс видео тоглоом тоглож байхдаа гаргадаг хариу үйлдэл, ярьж буй зүйлсээрээ үзэгчдийг татаж эхэлсэн бөгөөд М.Ганбаяр 2023 оны сүүлчээр Монголын анхны сая дагагчтай youtuber болж, тус платформын “Gold Play Button”-ы эзэн болсон байдаг. Мөн youtuber Гремикс хүүхэд, залуусын сонирхлын татсан видео тоглоомын тухай видео оруулахаас гадна “Хүйтэн байна”, “Сангиймсал” зэрэг дуу гаргаж, тодорхой хэмжээний үзэлт авчээ. Одоогийн байдлаар youtuber “Учиха Гремикс” буюу М.Ганбаяр “Facebook” хуудаст 402 мянган дагагчтай, “Youtube” хуудаст 1.1 сая дагагчтай байгаа юм.

Ташрамд дурдахад, М.Ганбаяр өнгөрсөн хоёрдугаар сард Улсын их дэлгүүрийн дэргэд өөрийн тоглоомын дэлгүүрээ нээсэн. Харин дэлгүүр албан ёсоор нээснээс долоо хоногийн дотор бүх тоглоом нь борлуулагдаж дууссан байдаг.