ТҮҮНТЭЙ "ХАЙРЫГ ХАЙРЛА" ЖҮЖГИЙН ТУУЛЫН ДҮРЭЭР УУЛЗАХ НЬ

2024-04-26, 275

Төрийн шагналт, Соёлын гавьяат зүтгэлтэн Дармын Батбаяр зохиолчийн "Хайрыг хайрла” жүжгийг Төрийн соёрхолт, Урлагийн гавьяат зүтгэлтэн, найруулагч Н.Наранбаатарын найруулгаар Хүүхэд, залуучуудын театрын уран бүтээлчид өнөөдрөөс тавьж буй. Театрын хувьд 27 жилийн дараа дахин үйл ажиллагаагаа сэргээн эл жүжгээр хөшгөө нээж буй нь энэ.

Гэр бүл, хосуудын ээдрээтэй харилцааг зурвасхан хугацаанд өрнөлтэйгээр үзүүлдэг энэхүү жүжгийн гол дүрийн нэг болох Туулын дүрийг Соёлын тэргүүний ажилтан, жүжигчин Д.Оюунтуул бүтээж байна. Түүнийг бид "Овжид охид" киноны адтай сэргэлэн, дэггүй Мишээлийн дүрээс нь мэдэх билээ. Алаг нүд, алиа хошин зан, цалгисан инээдээрээ урлагт хөл тавьж, хошин урлагийн тайзнаа ч жавтайхан гялалзагч. Ээж, эгч, эхнэр, сэргэлэн цовоо эмэгтэйн дүрийг торохгүй тоглож, үзэгчдийн хайрыг татагч тэр мөн “Өндөглөдөг шарсан тахиа”, "Хүний наймаа", "Хуримын сюрприз", "Зүрхэнд дуссан нулимс" зэрэг дэлгэцийн цөөнгүй бүтээлд тоглосныг нь үзэгчид үзэх дуртай. Тэр бүрд ааштай, ширүүн, өрөвч зөөлөн, наалинхай гээд өөр, өөр Туултай уулздаг. "Хүний наймаа", "Зүрхэнд дуссан нулимс" киноны дүрүүдээрээ үзэгчдэд ч багагүй "үзэн ядагдсан" байх. Эд хөрөнгөд шунаж, түүний төлөө хэрхэн арга заль гаргаж, бусдыг хууран мэхэлж, зовоож буй эсрэг дүрүүд. Эсрэг дүрд тэр том өрсөлдөгч. Итгүүлж, үнэмшүүлж, үзэн ядуулж ч чаддаг.

Нийслэлийн 51 дүгээр сургуулийг 1997 онд төгсөж, СУИС-ийг 2001 онд жүжигчин мэргэжлээр төгссөн байдаг. Тэгээд Гавьяат Жүжигчин Б.Батзаяагийн хамтлагт ажиллаж байгаад “Шинэ үе” продакшнд 2014 онд оржээ. Энэ үедээ хамтлагаасаа түр завсарлан 25 дугаар суваг телевизэд нэг хэсэг ажилласныг ч андахгүй байх. Аав нь түүнийг урлагийн хүн болохыг төдийлөн зөвшөөрч байгаагүй гэдэг бол ээж нь харин эмч мэргэжлийг санал болгож байж. Гэсэн Туул багаасаа л сургуулийнхаа урлагийн үйл ажиллагаанд идэвхитэй оролцож, бүжиглэж, жүжиглэж, дуулдаг байсан бөгөөд шинэ жилээр сургуулийнхаа алиалагчийн дүрд тоглодог, өөртөө итгэлтэй сурагч байжээ. Энэ нь жүжигчин мэргэжлээр сурч, өөрт оногдсон дүрээ чадварлаг сайн гаргахад ихэд нөлөөлсөн гэдэг.

Харин “25 дугаар суваг” телевизийн бүтээсэн маршал Х.Чойбалсангийн тухай өгүүлсэн түүхэн теле зохиомжид эхнэр Бортолгойнх нь дүрийг чадварлаг бүтээсэн нь дүрүүдээс нь онцгойлон яригддаг юм. Тэгвэл энэ удаад тэр драмын жүжгийн гол дүрээр үзэгчидтэйгээ “уулзах" нь. Түрхэн зуурт нөхөртөө гомдож тунихдаа гаргаад явуулчихсан ч үүрд алдана чинээ санаагүй Туул хэмээх эмэгтэйн дүрээр. Сэтгэлзүйн хувьд хүнд, эмзэг, эргээд бүхнийг буцаах боломжгүй их харуусалтай эмэгтэй. Тэр эл дүрийг харин хэрхэн гаргах бол. Үргэлж л асан дүрэлзэж, хөөр хөгжилтэй нэгний дүрээр үзэгчдийг сэргэтэл тоглодог чадварлаг тоглолтыг нь үзэгчид үгүйлж байгаа нь ч мэдээж. Гэхдээ энэ удаад эмэгтэй хүний дотоод сэтгэлийн гүн рүү чиглэсэн, тэндээс үзэгчидтэй ярих, бүхнээ уудлах, гуниг, баяраа тэр хуваалцах нь. Туулын ертөнцөд тавтай морил. Тайзны бүтээлээс түүний авьяас чадварыг дахин нэг харах нь.

ТҮҮНТЭЙ "ХАЙРЫГ ХАЙРЛА" ЖҮЖГИЙН ТУУЛЫН ДҮРЭЭР УУЛЗАХ НЬ

Шинэ мэдээ

Нийтлэлчид