Улсын драмын эрдмийн театр энэ хавар Оросын алдарт зохиолч Лев Николаевич Толстойн “Анна Каренина” жүжгийг тавдугаар сарын 1-нээс тоглохоор болсон билээ. Тэгвэл Аннагийн дүрд театрын залуу уран бүтээлч О.Хонгорзул тоглохоор болжээ.

     Тэрбээр өмнө нь “Анна Каренина” жүжгийн Китигийн дублёрд тоглож, сувилагчийн дүр, олны хэсэгт ажиллаж байсан юм. О.Хонгорзул 2016 онд СУИС-ийн Хөгжимт театрын жүжигчний ангид элсэн орж, 2020 онд СТА Ц.Батнайрамдал, Г.Амгаланбаатар нарын удирдлагад сурч төгссөн байна. Сургуулиа төгсөөд УДЭТ-ын театр студи ангид шалгалт өгснөөр тэнцэн орж, өдгөө үндсэн жүжигчнээр ажиллаж буй юм. Тайзны бүтээлээс гадна мөн 2020 онд “Хувьсал” продакшны долоо дахь уран бүтээл болох “Ноён эмэгтэй” кинонд тоглосон юм.

Тэр “Багадаа урлагийн олон тэмцээн, наадамд ордог хүүхэд байлаа. Дуулна, бүжиглэнэ, хөгжимдөнө гээд хүүхэд нас минь их завгүй, өөрийгөө үргэлж хөгжүүлж байдаг хүүхэд байсан. Манайх Эрдэнэт байдаг байлаа. Тэгээд л драмын театрт жүжиг тавигдаж байгаа гэдгийг сонсоод, хотод өвөөгийндөө амрах гэж ирэхдээ жүжиг үзэхийн хүслэн болдог байлаа. Жүжиг үзэх бүрдээ өөрийгөө тайзан дээр байгаагаар төсөөлөөд гардаг байсан. Тэгээд л жүжигчин болох хүсэл улам их төрж эхэлсэн. Театрын хажуугаар явахдаа их сандарч, сүрддэг байсан ч “Заавал орно доо” гэж мөрөөддөг байлаа” гэнэ.

   О.Хонгорзул "Жүжигчин мэргэжлээр ажиллах бол маш том хариуцлага гэж боддог. Тайзан дээр гараад хэзээ ч алдах эрх байхгүй. Үзэгчдэд шууд хүрч байгаа учир байнгын анхааралтай байх хэрэгтэй. Тэгэхээр үргэлж бэлтгэл сургуулилттай байхыг шаарддаг мэргэжил гэж хэлж болох юм байна. Миний хувьд унтахаасаа өмнө өдрийнхөө ажлыг дүгнээд маргаашийн төлөвлөгөөгөө гаргаад, бодоод унтдаг" гэж ярьсан байдаг. Мөн түүхэн дүрд тоглохыг хүсдэг бөгөөд цаашлаад дэлхийд танигдсан чадварлаг уран бүтээлч болохыг мөрөөддөг байна.