Энэ сарын 22-нд СУИС-ийн магистрант, сонгодог төгөлдөр хуурч, Дэлгэрмэндийн Маралмаа анхны бие даасан тоглолтоо хийх гэж байна. Тэрбээр 17 жил төгөлдөр хуур тоглож байгаа бөгөөд тэрбээр тоглолтынхоо үеэр зургаан өөр урсгалын зохиолчдын хөгжмийг тоглохоороо онцлог билээ. Ингээд Д.Маралмаатай ярилцсанаа танд хүргэж байна.

-Танд энэ өдрийн мэнд хүргэе. Анхны бие  даасан тоглолтоо хийх гэж байгаа сэтгэгдлээсээ хуваалцахгүй юу?

                -Энэ өдрийн мэнд хүргэе. Анхны гэдэг утгаараа сандарч, догдолж байна. Тоглолтын өдөр ойртох тусам сандарч байгаа ч зориод ирсэн хүмүүст сайхан тоглолт үзэж, сэтгэлийн баяр баясгалан мэдрүүлэхийн тулд хичээж байгаа.

-Бие даасан тоглолт хийх амаргүй шүү дээ. Бэлтгэлээ хэрхэн хийж байна?

                -Өдөр бүр хувийн бэлтгэлээ хийж, тоглолтын өдөр хамгийн сайнаараа байхыг хичээж байгаа. Багштайгаа хамтарч  хичээллэх бүрдээ хэлсэн заавар зөвлөмж, магтаалыг нь ойлгож, цаашид илүү үр дүнтэй бэлтгэл хийхийг хичээж байна.

-Яагаад тоглолт хийхээр шийдсэн бэ. Энэ удаагийн тоглолтод тоглох хөгжмийн зохиолуудаа хэрхэн сонгов?        

                -Төгөлдөр хууртай нөхөрлөөд 17 жил болж байна. Энэ хугацаанд Монгол Улсын филармонийн зааланд найрал хөгжмийн бүрэлдэхүүнтэй тоглолт хийхийг их хүсдэг байлаа. Мөрөөдөлөө биелүүлэхийн тулд өнгөрсөн оны арванхоёрдугаар сараас эхлэн төлөвлөсөн. Зургаан өөр урсгалын төгөлдөр хуурчдын ур чадвар шаардсан зохиолуудыг тоглохоор сонгосон байгаа. Мөрөөдөлөө биелүүлэхэд гэр бүл, багш, найзууд минь нөлөөлж, хамгийн их дэмжсэн.

-Таны хувьд мэргэжлийн төгөлдөр хуурч ямар байх ёстой вэ?

                -Мэргэжлийн төгөлдөр хуурч байна гэдэг амархан зүйл биш. Бага наснаасаа эхлээд төгөлдөр хуурын онолын талаар судалж, анги дэвших бүрдээ дэлхийн шилдэг, алдартай зохиолуудтай танилцаж, сурдаг. Зохиолынхоо онцлог, утга санааг нь илэрхийлж, тоглож сурахын тулд чамгүй урт хугацаа шаарддаг. Мэргэжлийн төгөлдөр хуурч гэдэг амьдралынхаа ихэнх цаг хугацааг төгөлдөр хуурт зориулсан хүмүүс л байдаг даа.

-Төгөлдөр хуурын багш байхын юу нь танд хамгийн сайхан санагддаг вэ. Анхны хичээл зааж байсан үеэ дурсвал?

                -Над дээр ирж хичээл заалгасан хүмүүс урлаг, төгөлдөр хуурын талаар  ойлголттой, өөртөө хамгийн зөв хөрөнгө оруулалт хийсэн байдаг. Миний хамгийн анхны шавь таван настай байсан. Баруун, зүүн гараа ч ялгадаггүй байсан хүүхэд гурван сарын дараа төгөлдөр хуурын нотыг ойлгочихсон чадварлаг тоглож байгааг нь хараад үнэхээр бахархмаар санагдаж байлаа. Тэр үед гэр бүлийнхнээс нь сонсон талархлын үг цаашид багшлах уран зориг өгсөн дөө.

Таны энэ удаагийн тоглолтын онцлог юу вэ?

                -Тоглолтын хөтөлбөрийн найрал хөгжим ба төгөлдөр хуурт зохиулсан концерт бол тэр бүр олон тоглогдож байгаагүй тоглолт.  Тэр утгаараа энэ зохиол илүү онцгой, миний тоглолтын нэг чимэг болж байгаа.

-Таны хувьд төгөлдөр хуур ямар хөгжим бэ?

                -Хүмүүс төгөлдөр хуур хөгжмийг сонгодог хөгжмийн хаан гэдэг. Төгөлдөр хуур хөгжмийг хөгжимдөж байхад олон өнгө, аялгуу тэр бүү хэл хүний сэтгэл хөдлөлийг илэрхийлдэг баялаг дуугаралттай хөгжим л дөө. 

-Хөгжимдөө хамгийн их татагдаж байсан үе нь хэзээ вэ. Ямар нөхцөлд хөгжмөөсөө хайр мэдэрч байв?

                -Бага ангидаа багш нарынхаа хамтарсан тоглолтын үзсэн юм. Тэр үед “Багш нар минь ямар мундаг юм бэ” гэж бодож байлаа. Харин дунд ангидаа дахин сонсоод “Зохиолынх нь утга санаа ямар гоё юм бэ, багш нар минь ямар гоё илэрхийлэв ээ” гэж бодсон.  Өөрөө ойлгоод төгөлдөр хууртай илүү танилцаж байгаагийн шинж л дээ. Анги дэвшиж шилдэг зохиолууд тоглох бүрдээ тухайн хөгжмийн зохиолчийн мэдрэмж,ямар утга илэрхийлж байгааг нь хүмүүст мэдрүүлэхийг хүсэж, хичээдэг болсон. Төгөлдөр хуураар баяр хөөр, гуниг харуусал, уур бухимдлыг ч илэрхийлж мэдрүүлж болно.Гэр бүлийнхэн найзууддаа дуртай дууных нь аяг тоглож өгч тэднийгээ миний тоглож байгаа хөгжмөөс аз жаргал мэдэрч байгааг нь харах дуртай.

-Таны дараагийн зорилго төлөвлөгөө юу вэ?

                -Төгөлдөр хуурч гэх мэргэжлээ өөрийнхөө насан  туршийн хамгийн  хүндтэй цол болгохын төлөө илүү хичээн суралцаж, олон тоглолт хийх болно. Мөн төгөлдөр хуур сурахыг хүсдэг хүүхдүүдэд өөрийн мэддэг чаддаг хүчнээ зааж, сайн боловсрол олгохыг хичээх болно.

-Ярилцлага өгсөн танд баярлалаа, тоглолтод нь амжилт хүсье.

                -Баярлалаа.